ABŞ Suriyanın şimal-şərqində Avropadakı müttəfiq ölkələrlə birlikdə təhlükəsizlik zonası yaratmaq niyyətindədir.
Baki-xeber.com xəbər verir ki, “Washington Post” (WP) qəzeti adı açıqlanmayan mənbələrə istinadən, ABŞ Müdafiə Nazirliyinin (Pentaqon), hələlik heç bir ölkə əsgər göndərməyi təklif etməsə də, Suriyanın şimal-şərqində təhlükəsizlik zonası qurulması planları üzərində işlədiyini yazır.
Plana uyğun olaraq Avropa ölkələrinin 1500 əsgər göndərəcəyini ifadə edən qaynaqlar, plan reallaşacağı halda Trampın 200 ABŞ əsgərini bu bölgədə saxlayacağını bildirib.
Qeyd edilir ki, hazırda NATO bayrağı altında yeni bir koalisiyanın qurulub qurulmayacağı bilinmir, ancaq 3 ittifaq ölkəsinin - Böyük Britaniya, Fransa və Almaniyanın bölgəyə əsgər göndərəcəyi gözlənilir.
Qəzet amerikalı senator Lindsey Grahamın Münhen Təhlükəsizlik Konfransında sözügedən planla əlaqədar açıqlamasına da yer verib: "Prezident Tramp sizdən kömək tələb etdiyində, 'bəli' deyəcəyinizə ümid edirəm. Planla bağlı Trampla danışdım. ABŞ nümayəndələri konfrans zamanı avropalı müttəfiqlərini plana daxil olmağa çağıracaqlar".
Əgər plan baş tutmasa, Türkiyənin Suriyaya girəcəyini və PKK-nın Suriya qolu YPG-yə qarşı əməliyyata başlayacağını deyən Graham, Qərbi Suriyada “böyük uğurlar” əldə edən kürd qüvvələrini qorumağa çağırıb.
Qeyd edək ki, bir neçə gün əvvəl Türkiyə prezidenti Rəcəb Tayyib Ərdoğan Birləşmiş Ştatları Suriyada təhlükəsizlik zonasının yaradılmasının gecikdirilməsinə görə, tənqid edərək deyib ki, Vaşinqton bu səylərə töhfə verməsə, Ankara bunu özü edəcək.
Ərdoğan və ABŞ prezidenti Donald Tramp Suriyada Fərat çayının şərqində təhlükəsizlik zonasının yaradılması məsələsini bir müddət əvvəl telefon söhbəti zamanı müzakirə edib. Türkiyə Suriya kürdlərinin hərbi dəstələrinin həmin ərazilərdən çıxmasını tələb edir. Ərdoğan buna nail olunması məqsədilə Vaşinqtondan logistika və maliyyə dəstəyi istəyir.
Türkiyə prezidenti deyib ki, ABŞ regionun terrorçulardan təmizlənməsi vədinə əməl etməsə və Türkiyənin nəzarətində təhlükəsizlik zonasının yaradılmasına töhfə verməsə, biz öz işimizə özümüz baxacağıq. Ərdoğan xəbərdarlıq edib ki, Ankaranın kürd döyüşçülərinin Suriyanın Menbic şəhərindən çıxarılmasında ləngimə ilə bağlı səbri tükənir.
Onu da qeyd edək ki, Türkiyənin Suriyada keçirməyi planlaşdırdığı yeni əməliyyatın əsas hədəfi kürd silahlıların nəzarətində olan Menbic şəhəri olacaq.
