İran və ABŞ diplomatlarının Yəməndəki böhranla bağlı Londonda gizli görüş keçirdiyi iddia edilir. Baki-xeber.com xarici mediaya istinadən xəbər verir ki, bu barədə Küveytin “El Ceride” qəzeti adı açıqlanmayan avropalı diplomata istinadən məlumat yayıb.
Iddialara görə, İran və ABŞ diplomatları, Avropa və Omanın vasitəçiliyi ilə İngiltərənin paytaxtı Londonda bir oteldə gizlicə bir araya gəlib.
Adı açıqlanmayan avropalı diplomat İran və ABŞ diplomatlarının görüşün mətbuata sızmaması üçün diplomatik pasportlarla deyil, ümumi pasportlarla Londona gəldiklərini deyib. Tərəflər Londonda qaldıqları otelin bir otağında gizli görüş keçiriblər.
Görüşün nə vaxt keçirildiyinə dair məlumat verməyən avropalı diplomat, İsveçin paytaxtı Stokholmda BMT-nin vasitəçiliyi ilə reallaşan Yəməndə qarşıdurma tərəfləri arasında müzakirələrin bu görüş sayəsində baş tutduğunu bildirib.
Görüşdə İran tərəfinin, husilərin İsveçdəki müzakirələrə qatılması və bəzi məsələlərdən imtina edəcəyinə dair zəmanət verdiyini deyən diplomat, ABŞ müdafiə naziri Ceyms Mattisin Yəmən müzakirələrini bir ay əvvəldən xəbər verməsinin də bu görüşün nəticəsi olduğunu iddia edib.
Diplomat qeyd edir ki, İranla Yəmənlə bağlı razılıq əldə etdikdən sonra Vaşinqton bu ölkəyə qarşı sanksiyaları yumşaldıb: "İranın Yəmən mövzusunda müsbət addımları, ABŞ-ın Tehranla münasibətlərdə mövqeyinin yumşalmasına səbəb oldu. Vaşinqton məhz bundan sonra İranın neft ixrac etdiyi ölkələrə (180 günlük) güzəşt edərək, sanksiyaların təsirini azaltdı. Avropa, İrandan Suriya böhranında da, eyni yanaşmanı göstərməsini və beynəlxalq ictimaiyyətlə əməkdaşlıq etməsini gözləyir".
Görüşdə ABŞ-ın Tehrana qarşı sanksiyalarının da müzakirə edildiyini deyən diplomat, İranın ABŞ-dan sanksiyaları dayandırmasını və istisna müddətlərini uzatmasını tələb etdiyini, bu şərtlər qəbul edilməyəcəyi halda, Vaşinqtonla bütün ünsiyyət kanallarını bağlamaqla təhdid etdiyini bildirib.
Avropalı vasitəçilər tərəfindən, İran və ABŞ-ın, yenidən bir araya gəlmək üçün bir-birinə qarşı irəli sürdükləri şərtləri, Ruhani və Trampın daxili siyasətdə problem yaşamaması üçün rəsmi açıqlama olmadan, yerinə yetirilməsi ilə bağlı razı salındığı bildirilir.
