Türkiyə Suriyanın şimal-şərqində suriyalı kürd döyüşçülərə qarşı hərbi əməliyyatı ertələyir. Baki-xeber.com xəbər veri ki, bunu Türkiyə Prezidenti Rəcəb Tayyib Ərdoğan deyib.
ABŞ prezidenti Donald Trampla Suriya ilə bağlı bir çox məsələni müzakirə etdiklərini deyən Ərdoğan, hadisələrin gedişinə görə, Türkiyənin Fərat çayının şərqində keçirəcəyi əməliyyatla bağlı bir gözləməyi qərara aldıqlarını bildirib.
“Donald Tramp telefon danışığımızda dedi: “Siz İŞİD-i təmizləyə bilərsiniz?”. Dedim “təmizləyərik”. Lazımi logistik dəstəyi siz tәmin edin,qalanını biz edərik. Cerablusda 3 min İŞİD terrorçusunu zәrәrsizlәşdirdiyimiz kimi PKK, PYD,YPG terrorçularına da lazımi zәrbәni endirәcәyik. Bütün terrorçu qruplaşmaları zərərsizləşdirməyə qadir Türkiyə hərbçisi və Azad Suriya Ordusu var” - Әrdoğan deyib.
Qeyd edək ki, Trampın bu həftə gözlənilmədən Vaşinqtonun təxminən 2 min qoşununu Suriyadan geri çəkəcəyini elan etməsi Amerikanın Yaxın Şərq siyasətinin əsas sütunlarından birini aradan qaldırıb. Tənqidçilər deyir ki, Trampın bu addımı Suriyada yeddi ildir davam edən müharibəyə diplomatik həll yolu tapmağı çətinləşdirəcək.
Türkiyə üçün bu addım Birləşmiş Ştatlarla toqquşma mənbəyini aradan qaldırır. Ərdoğan uzun müddət NATO müttəfiqini İslam Dövləti qrupuna qarşı mübarizədə Suriyanın kürd YPG döyüşçülərini dəstəklədiyinə görə kəskin tənqid edib. Türkiyə YPG-ni terrorçu qrup və PKK-nin qolu hesab edir.
NATO müttəfiqləri Fransa və Almaniya xəbərdarlıq edir ki, ABŞ-ın siyasi kursunu dəyişməsi İslam Dövləti qrupuna qarşı mübarizəyə xələl gətirə bilər. ABŞ-ın dəstəklədiyi YPG-nin başçılıq etdiyi hərbi dəstə isə xəbərdarlıq edib ki, Türkiyə tərəfindən hücum onları döyüşçülərini İŞİD-ə qarşı mübarizədən geri çəkməyə vadar edəcək.
Ərdoğan bir müddət əvvəl Suriyanın şimalında Fərat çayının şərq sahilində nəzarət etdiyi əraziləri YPG-dən təmizləmək üçün əməliyyat başlatmaq planını elan etmişdi. Bu həftə o, əməliyyatın hər an başlayaca biləcəyini söylədi. Ancaq indi Vaşinqtonun addımı və Trampla danışıqları səbəb göstərərək gözləyəcəklərini deyir. “Biz Amerikanın Suriyadan geri çəkilmək qərarının nəticələrini görənədək Fərat çayının şərq sahilindəki hərbi əməliyyatımızı təxirə salmışıq”, Ərdoğan söyləyib.
Lakin Türkiyə prezidenti qeyd edib ki, bu “sonu açıq gözləmə müddəti” deyil.
Xarici işlər naziri Mevlüt Çavuşoğlu da hazırkı vəziyyətdə əməliyyatın təxirə salınmasının məntiqli olduğunu deyib: “İndi bölgədə olan bir ölkənin çəkiləcəyini açıqlamasından sonra onların çıxma müddəti kimi bir çox məsələlər var. Bu müddətdə əməliyyatı təxirə sala bilərik, amma bu bizim YPG-ə qarşı başlayacağımız əməliyyatlardan imtina etməyimiz mənasına gəlmir. Bu barədə qərarımız qətidir”.
