Fransada 17 yaşlı yeniyetmənin polis tərəfindən öldürülməsindən sonra başlayan aksiyalar iğtişaşa çevrilib. Ölkənin bir çox şəhərində polislə vətəndaşlar arasında şiddətli toqquşmalar yaşanır, çoxlu sayda maşın yandırılıb, mağazalar qarət edilib.
Makron hakimiyyəti aksiyaları dağıtmaq üçün şəhərlərə xüsusi təyinatlı polis dəstələri, zirehli texnika göndərib. Polis aksiyaçıların qarşısını almaq üçün müxtəlif vasitələrdən, o cümlədən güc vasitələrindən istifadə edir. Yüzlərlə şəxs həbs olunub, çoxlu sayda yaralı var.
Qeyd olunan vəziyyəti işıqlandırmaq üçün Fransada çəkiliş aparan “Azərbaycan Televiziya və Radio Verilişləri” (AzTV) QSC-nin əməkdaşları hücuma məruz qalıb, onlara xəsarət yetirilib, texnikaları əllərindən alınıb. Nəticədə müxbir və operator yüngül bədən xəsarətləri alıb, çəkiliş kamerası isə əllərindən alınaraq sındırılıb.
Fransada iyunun 27-dən sonra başlayan etirazlar və etirazçılara qarşı polisin davranışları bu ölkənin əsl mahiyyəti barədə nələri söyləməyə əsas verir?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, son günlər Fransada baş verən kütləvi etiraz aksiyaları və hökumətin vətəndaşlara qarşı sərgilədiyi amansız rəftar rəsmi Parisin əsl simasını bir daha bütün dünyada ifşa etmiş oldu: “Əvvəla 17 yaşlı vətəndaşı güllələyən Fransa polisi göstərmiş oldu ki, bu ölkənin hüquq-mühafizə orqanları, xüsusilə də polis yararsız bir quruma çevrilib. Biz əvvəllər də Fransa polisinin öz xalqına divan tutmasının, insanlara zülm etməsinin, vətəndaşlara zor tətbiq edilməsinin dəfələrlə şahidi olmuşuq. Görünən odur ki, Fransa polis orqanları insan hüquq və azadlıqlarının müdafiəçisi deyil, vətəndaşların hüququnu kobud şəkildə tapdayan, qanunları ayaq altına atan bir qurumdur. Son günlər kütləvi hal alan etiraz aksiyalarının zorla dağıdılması, insanlarla amansız rəftar, etirazçılara güc tətbiq edilməsi halları, çoxsaylı həbslər, işgəncələr buna əyani sübutdur. Dünyaya demokratiya dərsi keçən, özünü demokratiyanın beşiyi adlandıran, başqalarının daxili işlərinə burun soxan Fransa rəhbərliyi öz daxili siyasətinə baxıb utanmalıdır. Makron hakimiyyəti son davranışları ilə onsuz da sürətlə itirilən nüfuzunu daha aşağı səviyyəyə salmaqda davam edir. Yaxşı olar ki, Makron Azərbaycanın Qarabağ bölgəsində yaşayan ermənilərin hüquqlarından dəm vurmaqdansa, öz vətəndaşlarının qanuni tələblərinə yerinə yetirsin, insanların haqlarını bərpa etsin. Amma təəssüf ki, biz bunun əskini görürük. Çünki rəsmi Parisin yürütdüyü həm daxili, həm də xarici siyasət riyakarlıq üzərində qurulub”.
Bu həm də göstərir ki, Fransa demokratik ölkə deyil. Fransada jurnalistlərin sərbəst fəaliyyəti üçün şərait yaradılmır. Məhdudiyyətlər tətbiq edilir. Bu gün Frnasada günahsız insanlar qətlə yetirilir. Bu gün Fransada tətbiq olunan mitinqlərdə yalnız müsəlmanlar, burada yaşayan digər xalqların nümayəndələri deyil, hətta fransızlar da iştirak edərək öz etiraz və narazılıqlarını dilə gətirirlər. Bir neçə gündür ki, qarşıdurma səngimir. Bu həm də vətəndaşların dövlətə etimadının itdiyinin göstəricisidir. Yəni hazırkı hökumətə, hazırkı prezidentə Fransa xalqı güvənmir. Biz bunu sarı jiletlilərin etirazı zamanı da, pensiya islahatları zamanı da gördük. Son hadisələr Makronun nə qədər bacarıqsız, səriştəsiz olduğunu açıq şəkildə göstərdi.
Məhəmmədəli QƏRİBLİ
