Rusiya prezidenti Vladimir Putinə verdiyi dəstəklə hər zaman gündəmə gələn prezident Aleksandr Lukaşenko Rusiyada qiyam qaldıran rus muzdlu “Vaqner” qrupunun lideri Yevgeni Priqojinin Belarusda olduğunu açıqlayıb.
Bu arada Rusiyanın "Vaqner"ə qarşı ittihamları ləğv etdiyi açıqlanıb. Rusiya Müdafiə Nazirliyi muzdlu qrupun silahlarını orduya təhvil verəcəyini bildirib. Priqojin isə "Vaqner"in iyulun 1-dən etibarən fəaliyyətini dayandıracağını açıqlayıb.
ABŞ Mərkəzi Kəşfiyyat İdarəsinin keçmiş direktoru Devid Petreus Rusiyanın müdafiə naziri Sergey Şoyqu və Baş Qərargah rəisi Valeri Gerasimovu hədəf alaraq dövlət çevrilişinə cəhd edən "Vaqner" lideri Priqojinə xəbərdarlıq edib. Bəzi rusiyalı siyasətçilərin və iş adamlarının son ölümlərinə diqqət çəkən Petreus Priqojinə “Açıq pəncərələrdən uzaq durun” deyib.
MKİ-nin keçmiş direktoru, "O, öz həyatını xilas etdi, lakin "Vaqner"i itirdi. Getdiyi Belarusda açıq pəncərələrin ətrafında çox diqqətli olmalıdır" deyib.
"Vaqner"in üsyanını dəyərləndirən Petreus, "Priqojin açıq-aydın özünü itirdi. Demək olar ki, iki saata o, Moskvada müdafiə mövqelərinin hazırlandığı kənar məhəllələrə çatdı. Yolda bir az alqışla qarşılansa da, ancaq heç də gözlədiyi dəstəyi ala bilmədi. Bundan sonra anlaşma təklifini qəbul etməyə razılaşdı və səylərindən vaz keçdi" deyib.
Qeyd edək ki, Rusiyanın muzdlu “Vaqner” qrupunun yaradıcısı Yevgeni Priqojin Rusiya ordusunu "Vaqner"ə hücumda ittiham edib və cavab verməklə hədələyib. "Vaqner" döyüşçüləri iyunun 24-də Ukraynanı tərk edərək sərhəd Rostov vilayətinə daxil olublar.
Bu vəziyyətlə əlaqədar Federal Təhlükəsizlik Xidməti (FSB) “silahlı iğtişaş” maddəsi ilə cinayət işi açıb. Rusiya prezidenti Vladimir Putin də Vaqnerin üsyanını “vətənə xəyanət” adlandırıb. Priqojin Moskvaya gedəcəklərini açıqlayıb, Kreml administrasiyası isə ölkənin bir çox yerində ciddi təhlükəsizlik tədbirlərini artırıb. Rusiyanın Ukrayna sərhədinə yaxın bölgələrində, xüsusən də Moskva və Moskva vilayətində antiterror əməliyyatı elan edilib.
“Vaqner” lideri Yevgeni Priqojinlə Moskva arasında vasitəçi olan Lukaşenko "Vaqner" qoşunlarının Rusiya şəhərlərini mühasirəyə alaraq Moskvaya doğru irəliləməsinin qarşısını alıb. Priqojin Belarus prezidenti Lukaşenkonun Rusiyada gərginliyi azaltmaq təklifini qəbul edib. Priqojin tərəflərdən birinin üzərinə rus qanının tökülməsinin məsuliyyətini başa düşdüklərini və plana uyğun olaraq konvoylarını geri çevirərək səhra düşərgələrinə qayıdacaqlarını açıqlayıb.
Priqojin Belarusa gedib, əsgərləri isə əfv edilərək yenidən cəbhəyə göndərilib.
TAHİR
