Rusiyada iyunun 24-də baş qaldıran hərbi qiyam Priqojinin geriyə addım atması ilə yekunlaşdı. "Vaqner"in rəhbəri Yevgeni Priqojin teleqram kanalında bildirib ki, bu addımı qan tökülməsin deyə atır:
"Vaqner" PMC-nin əsgərləri hərbi kolonlarının istiqamətini geri çevirir. Tərəflərdən birində rus qanı töküləcəyinə görə bütün məsuliyyəti dərk edərək, plana uyğun olaraq, hərbi kolonlarının istiqamətini geri çevirib düşərgələrə yola düşürük".
Qeyd edək ki, “Vaqner” PMC-nin təsisçisi və rəhbəri Yevgeni Priqojin bir gün əvvəl Rusiya Müdafiə Nazirliyini artilleriya və hücum helikopterlərindən istifadə etməklə onun yarımhərbi birləşməsinin arxa düşərgələrinə raket zərbələri endirməkdə ittiham edib.
Priqojin sərəncamında 25 min döyüşçünün olduğunu bildirib və nizami ordu hərbçiləri də daxil olmaqla, bütün istəkli rusları onlara qoşulmağa çağırıb.
Federal Təhlükəsizlik Xidməti silahlı üsyan faktı ilə bağlı cinayət işi açıb.
Priqojinlə ilk danışıqları Belarus prezidenti Aleksandr Lukaşenko Vladimir Putinin razılığı ilə aparıb.
Bu barədə Lukaşenkonun mətbuat xidməti məlumat yayıb.
Bildirilir ki, Priqojin Belarus liderinin "Vaqner"in Rusiyada antitəbliğatını dayandırmaq və gərginliyi azaltmaq üçün əlavə addımlar atmaq təklifini qəbul edib. Kremlin sözçüsü Dmitri Peskov isə mediaya açıqlamasında deyib ki, Belarus prezidenti Aleksandr Lukaşenko özü təklif edib ki, “Vaqner”in təsisçisi Yevgeni Priqojinlə danışıqlar aparan şəxs olsun. Çünki o, Priqojini 20 ilə yaxındır tanıyır:
“Bu onun şəxsi təşəbbüsü idi və prezident Putinlə razılaşdırılıb. Kreml bu təşəbbüsü yüksək qiymətləndirib”.
Rusiya prezidentinin sözçüsü Dmitri Peskov həmçinin bildirib ki,
“Vaqner" özəl hərbi şirkətinin rəhbəri Yevgeni Priqojinə qarşı cinayət işinə xitam veriləcək, o, Belarusa gedəcək.
Peskov qeyd edib ki, PMC "Vaqner" döyüşçüləri səhra düşərgələrinə qayıdacaqlar, cəbhədəki xidmətlərin nəzərə alaraq qanunla təqib olunmayacaqlar.
Rostov vilayətinin qubernatoru Vasili Qolubev öz Teleqram kanalında bildirib ki, “Vaqner” kolonu şəhəri tərk edərək öz düşərgələrinə yollanıb.
Rusiyanın sabiq prezidenti, hazırda ölkənin Təhlükəsizlik Şurasının sədr müavini olan Dmitri Medvedev deyib ki, Konsepsiyanın yüksək hazırlığını, hərəkətlərin peşəkar uyğunluğunu və qoşunların hərəkətinə yüksək keyfiyyətli nəzarəti nəzərə alaraq, düşünülmüş hərbi planın mövcudluğundan və üsyanda iştirakdan danışmaq olar: “Prosesdə Rusiya Federasiyası Silahlı Qüvvələrinin elit bölmələrində xidmət etmiş şəxslər və çox güman ki, xarici mütəxəssislər iştirak edib”.
Medvedyevin bu açıqlamasından belə qənaətə gəlmək olar ki, qiyamın yatırılmadı prosesi Rusiyada tam bitməyib və ordunun elit bölmələrində təmizləmələr aparılacaq. Rusiya Baş Prokurorluğunda başlayan cinayət işinin istiqaməti dəyişdiriləcək, Rusiya MN istintaqa cəlb ediləcək və təhqiqat əsl günahkarı tapana qədər uzanacaq.
Heç şübhə yoxdur ki, geri çəkilməsi Priqojini xilas etməyəcək, onun özünün və “Vaqner” hərbi qruplaşmasının məhv edilməsi prosesinə başlanılacaq. Buna nail olunsa belə, son biabırçılıq Rusiyanın imicinə ağır zərbə vurmuş oldu. Əlbəttə ki, “Vaqner”i FTX və Rusiya Milli Qvardiyası dayandırmağı bacaracaqdı. Ancaq vaqnerçilər də Rusiya Qvardiyası və FTX-yə ciddi itkilər yaşadacaqdı: Putinin əsas dayaqları sarsıla bilərdi ki, bundan da ordu daxilində bəzi qüvvələr istifadə edəcəkdi. Beləliklə, Putin ən dəhşətli ssenaridən, ağır zərbədən qansız xilas oldu.
Məhəmmədəli QƏRİBLİ
