Rusiyanın Ukraynaya təcavüzündə əsas rol oynayan və son zamanlar Kremllə tez-tez toqquşan rus muzdlu qruplaşması “Vaqner” Moskvaya qarşı qiyam qaldırıb. Rusiya prezidenti Vladimir Putinin yaxın adamı kimi də tanınan “Vaqner” lideri Yevgeni Priqojin Rusiya ordusunun "Vaqner" düşərgəsinə raket hücumu həyata keçirdiyini və çoxlu əsgərini öldürdüyünü iddia edib.
Priqojin rus ordusuna cavab vermək üçün hərəkətə keçdiklərini açıqlauıb və iki nəfəri hədəfə aldı. Rusiya müdafiə naziri Sergey Şoyqu və Rusiya Baş Qərargah rəisi Valeri Gerasimovu günahlandıran Priqojin onların Qızıl Meydanda asılmasını tələb edərək qarşılarına çıxanların məhv edəcəklərini bildirib.
Telegram-da video yayımlayan Priqojin Rusiya ordusuna qarşı üsyan etdiyini açıq şəkildə bildirib. Onun çağırışından sonra "Vaqner" və rus ordusu üz-üzə gəlib. Sayısının 60 min olduğu bildirilən "Vaqner" qrupunun Rostov və bir çox şəhərdə əsgərləri küçələrə çıxardığı bildirilir.
"Vaqner" lideri Priqojinin “Rostovu mühasirəyə alıb Moskvaya keçəcəyik” bəyanatından sonra rus ordusu Voronej şəhərini bağlayıb. Rusiya Müdafiə Nazirliyi Rostov sakinlərini evlərini tərk etməməyə "Vaqner" döyüşçülərindən təslim olmağa çağırıb.
Rusiya prezidenti Vladimir Putin ölkdə çevriliş cəhdi ilə bağlı ictimaiyyətə müraciət edib: “Gecə bütün cəbhələrdə ordu hissələrinin komandirləri ilə görüşdüm, ordumuz qəhrəmancasına döyüşür. Mən Rusiya xalqına, onun əsgərlərinə, təhlükəsizlik qüvvələrinə, yalan və hədələrlə silahlı üsyan yoluna sürüklənənlərə səslənirəm. Rusiya öz gələcəyi üçün ciddi mübarizə aparır. Qərbin bütün hərbi və informasiya vasitələrindən Rusiyaya qarşı istifadə olunur. Konstitusiya quruluşunu, vətəndaşların həyatını və azadlığını qorumaq üçün hər şeyi edəcəyəm. Vətəndaşlarına qarşı silah çəkənlər Rusiyaya xəyanət ediblər və bunun bədəlini ödəyəcəklər.
Biz bu gün dövlətimizi qorumaq üçün hər şeyə hazırıq. Bu gün baş verənlər vətənə xəyanətdir. Biz indi öz mənafeyini düşünən insanlara qarşıyıq. Biz ordumuzu dəstəkləyirik. "Vaqner" qüvvələri də Rusiya üçün canlarını qurban verirdilər. Amma indi onların arasında satqınlar da var. İndi onların arasında silahlı üsyana başlayanlar da var. Bu qiyamın ölkəmizə heç bir faydası olmayacaq. Vətən xainləri ciddi şəkildə cəzalandırılacaq. Bu cinayətkarlar bilsinlər ki, cavabımız sərt olacaq. Onlar qanun qarşısında və xalqımız qarşısında cavab verəcəklər. Konstitusiya quruluşunu, vətəndaşların həyatını və azadlığını qorumaq üçün hər şeyi edəcəyəm”.
Rostov şəhərində vəziyyət mürəkkəbdir. Dövlət qurumlarının fəaliyyəti iflic olub. Amma sabitliyə doğru addımlar atılacaq. Bizim birliyimizi parçalayan hərəkətlər əslində xalqımıza, hazırda cəbhədə vuruşan silahdaşlarımıza qarşı xəyanətdir. Bu, xalqımızın kürəyinə bıçaq soxmaqdır. Xalqımızın gələcəyinin müəyyən olunduğu bu müharibə (Ukrayna müharibəsi) bütün qüvvələrin birləşməsini tələb edir. Bu, birlik, konsolidasiya və məsuliyyət tələb edir. Bizi zəiflədən hər şey, xarici düşmənlərimizin istifadə edə bildiyi, hətta indidən istifadə edərək, bizi daxildən korlamaq üçün istifadə edə biləcəyi bütün savaşlar bir kənara atılmalıdır".
Putinin açıqlamalarından sonra Priqojinin cavabı çox gecikməyib. "Heç kim Putinin əmri ilə təslim olmağı planlaşdırmır. Biz artıq korrupsiya, yalan və bürokratiyanın hökm sürdüyü ölkədə yaşamaq istəmirik” deyib.
Çeçenistan lideri Ramazan Kadırov çeçen əsgərlərin rus əsgərlərini kürəyindən bıçaqlayan "Vaqner"in lideri Yevgeni Priqojinə qarşı savaşmağa hazır olduğunu bəyan edib.
Məlumatlara görə, Rusiya Hərbi Hava Qüvvələri Voronejdən Moskvaya doğru irəliləyən "Vaqner"in hərbi karvanına zərbələr endirməyə başlayıb.
“Vaqner”in rəisi Yevgeni Priqojin ölkənin cənubundakı Rostov şəhərində “bütün hərbi obyektləri” ələ keçirdiklərini bildirib. Onların Moskvadan təxminən 500 km (310 mil) cənubda yerləşən Voronej şəhərində də hərbi obyektlərə nəzarəti ələ keçirdiyi bildirilir.
Paytaxt Moskva və digər bir neçə şəhərdə terrorla mübarizə çərçivəsində təhlükəsizlik tədbirləri gücləndirilib.
Tahir TAĞIYEV
