Sentyabrın 30-da səlahiyyət müddəti başa çatacaq NATO baş katibi Yens Stoltenberqin yerinə namizədlər müzakirə olunmağa başlayıb. İngiltərə mətbuatı iddia edir ki, bu vəzifəyə ən güclü namizədlərdən biri kimi göstərilən İngiltərə müdafiə naziri Fransa prezidenti Emmanuel Makronun vetosu ilə üzləşib.
“The Telegraph” qəzeti yazır ki, Fransa lideri Böyük Britaniya "Brexit" qərarı ilə Aİ-dən çıxdığı üçün Ben Uollesin namizədliyinə müsbət yanaşmır. O, NATO-nun yeni baş katibinin AB üzvü olan bir ölkədən olmasını istəyir. Qeyd olunub ki, Makronun mövqeyi Almaniya və NATO üzvü olan Aİ-yə üzv ölkələrin əksəriyyəti tərəfindən dəstəklənib. Ancaq Hollandiya və Polşanın ingilis bir namizədə dəstək verə biləcəyi iddia edilir.
Fransa prezidenti Makron düşünür ki, Britaniya Aİ-dən çıxdığı üçün bədəl ödəməlidir. İddia olunur ki, Fransa lideri həm də Aİ üzvü olan ölkədən seçiləcək baş katibin köməyi ilə NATO-nun Vaşinqtondan asılılığını azaltmağı hədəfləyir.
Fransanın Uollesin namizədliyinə qarşı çıxmasına münasibət bildirən Britaniya İcmalar Palatasının keçmiş Müdafiə Komitəsinin sədri Julian Levis deyib: “Avropa İttifaqından çıxdığımız üçün Ben Uollesin NATO-nun baş katibi olmasına mane olmaq, iki təşkilatın fərqli rollarının nəzərə alınmadığını göstərir və ittifaqın harmoniyasını pozur”.
Digər tərəfdən, Ben Uolleslə yanaşı NATO baş katibliyinə namizədlərdən biri kimi adı çəkilən Danimarka baş naziri Mette Frederiksenin də namizədliyinə Fransa tərəfindən veto qoyulduğu iddia edilir. Paris administrasiyası bu fikirdədir ki, alyans liderinin Şimali Avropa ölkələrindən ardıcıl üç müddətə seçilməsi disbalansa səbəb olacaq.
"Teleqraf" yazır ki, Türkiyənin Kopenhagendəki səfirliyi qarşısında Quran və türk bayrağının yandırılmasından sonra Türkiyə də Frederiksenin NATO baş katibi vəzifəsinə namizədliyinə veto qoyub.
TAHİR
