Rusiyanın müdafiə naziri Sergey Şoyqu bildirib ki, Ukrayna cəbhənin müxtəlif istiqamətlərində çoxdan vəd etdiyi hücuma başlayıb:
"Ukrayna rejimi üç gün ərzində cəbhənin müxtəlif istiqamətlərində çoxdan vəd etdiyi hücuma başlayıb, lakin heç bir istiqamətdə uğur qazana bilməyib və xeyli itki verib".
Şoyqunun sözlərinə görə, Ukrayna Silahlı Qüvvələrinin son üç gündə bütün istiqamətlərdə döyüş əməliyyatları zamanı itkiləri 3715 hərbçi və 52 tank təşkil edib.
Müharibənin daha dramatik fazaya daxil olduğunu və Rusiyanın sərhədləri daxilinə sirayət edəcəyini iddia etmək olarmı?
Hərbi-siyasi şərhçi, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, əlbəttə, Rusiyanın Ukraynaya bağlı planları tamamilə alt-üst oldu: “Rusiya xəyal qırıqlığına uğradı. Onun hədəfi qısa müddətdə Ukrayna girmək və Ukrayna xalqını öz nəzarəti altına almaq idi. Yəni xüsusi xidmət orqanlarının, xüsusi kəşfiyyat orqanlarının əhalinin münasibəti ilə bağlı verdiyi rəylər özünü doğrultmadı. Əgər vəziyyət real olaraq Rusiya rəhbərliyinə çatdırılsaydı, mən inanıram ki, Rusiya bu müharibəni başlatmayacaqdı. Hər gün Rusiya xəyal qırıqlığına uğradıqca, müharibədə çox ciddi dərinləşmələr baş verir. Bir sıra Qərb və Avropa ölkələrinin də istəyi də bundan ibarətdir. Rusiyanı daha çox qəzəbləndirməkdir məqsəd. Rusiya nə qədər çox qəzəblənirsə, o qədər çox bataqlığa batır, itkilər verir, o qədər çox simasını itirir, vəziyyətə nəzarəti itirir. Əlbəttə, bütün bunlar Rusiyanın ən yaxın vaxtlarda daha çox itkilər verəcəyinə, eyni zamanda müharibənin sərhədlərinin, koordinatlarının dəyişəcəyinə əminlik yaranır. Onsuz da ukraynalılar Rusiyaya məxsus bir sıra yaşayış sahələrini vururlar. Ancaq su bəndinin, platinanın partladılması ümumiyyətlə müharibəyə aid məsələ deyil. Bu konkret olaraq insanlıq cinayətidir. Müharibə o demək deyil ki, su platinasını partladıb, dinc insanların yaşayış sahələrini su altında qoyasan. Görün, Rusiya nə vəziyyətdədir ki, bu cür əskikliyə, bu cür insafsızlığa əl atır. Yenə də təkrar edirəm. Platinanın partladılması müharibəyə aid olmayan bir məsələdir. Bu, Rusiyanın gücsüzlüyünü, müharibə simasızlığını, əlacsızlığını daha çox büruzə verir. Mən düşünürəm ki, həm konturlar, həm də koordinatlar dəyişəcək. Yenə də Rusiya bu müharibədə qalib gələ bilməyəcək. Çünki Ukrayna xalqının Rusiyaya münasibəti indi daha aydındır. Vaxtilə onların münasibətlərində Rusiyaya qarşı bir qəzəb, nifrət var idi. Bunun da arxasında tarixi faktlar dayanırdı. İndi isə bunu artıq böyükdən kiçiyə Rusiya öz əməlləri ilə başa salıb. Rusiya ona görə məğlub olacaq ki, Ukraynaya Qərb və Avropa ölkələri yardım edir. Rusiyanı məğlub edən əsas faktor Ukrayna xalqının birliyi və Rusiyaya münasibətdə daha konkret mövqedə qərarlaşmasıdır. Əlbəttə, müharibənin hüdudları daha da artacaq. Daha idbar, daha da simasız bir kampaniyaya çevriləcək”.
Məhəmmədəli QƏRİBLİ
