Ukraynanın Xerson vilayətində "Nova Kaxovka" su elektrik stansiyası qismən dağılıb. Ukrayna Xerson vilayətinin Rusiyanın nəzarətində olan ərazilərində yerləşən "Nova Kaxovka" bəndinin Rusiya qüvvələri tərəfindən partladıldığını bildirilir, Kreml isə hücumun Ukraynanın təxribatı olduğunu bildirir.
Ukrayna administrasiyası bildirir ki, hücum Ukrayna ordusunun regionda irəliləyişini ləngitmək üçün həyata keçirilib. Xerson şəhər mərkəzi Ukraynanın nəzarəti altındadır, lakin bölgənin cənubu Rusiyanın əlindədir. Bundan Ukraynanın Krıma qarşı hücumda istifadə edəcəyi gözlənilirdi. Ukrayna ordusunun Rusiya tərəfindən işğal olunmuş bölgəyə əsgər daşımaq üçün bənd divarındakı yoldan istifadə edəcəyi üçün Moskvanın belə bir hücumu həyata keçirdiyi versiyası üzərində dayanılır.
Kremlin sözçüsü Dmitri Peskov isə Rusiyanın nəzarətində olan "Nova Kaxovka" su elektrik stansiyasına hücumun Ukraynanın təxribatı olduğunu iddia edib. “Rusiya olaraq, hücumların bizim tərəfimizdən törədildiyinə dair iddiaları tamamilə rədd edirik”, - Peskov bildirib. Təxribat Ukrayna ordusunun 2 gün öncəki hücum cəhdinin uğursuzluğu ilə bağlıdır.
Məlumata görə, rusların nəzarətində olan "Nova Kaxovka" su elektrik stansiyasına bombardmanlar nəticəsində ciddi ziyan dəydiyi üçün Dnepr çayında su səviyyəsi sürətlə yüksəlir. Yeni Kaxovka şəhərinin mərkəzi sular altında qalıb, bölgədən çəkilən görüntülərdə suyun səviyyəsinin binaların ikinci mərtəbəsinə qədər qalxdığı görünür.
Rusiya hakimiyyəti təxminən 44 min əhalisi olan şəhəri və daşqından zərər çəkmiş Qolopristanskiy və Aleşi rayonlarını təxliyə etməyə başlayıb.
Ukrayna da suyun səviyyəsinin sürətlə yüksəldiyini, bəndin yaxınlığındakı Xerson şəhəri və ətrafındakı təhlükə altında olan ərazilərdən evakuasiyaya başlanıldığını açıqlayıb. Qeyd olunur ki, Dnepr çayının sağ sahilində bir çox ərazilər də daşqın təhlükəsi ilə üzləşib.
Rusiya tərəfindən təyin edilmiş Nova Kaxovka meri Vladimir Leontyev bəndin dağılmadığını, elektrik stansiyasında partlayış olmadığını, lakin suların nəzarətsiz axdığını bildirib. Leontyev bəyan edib ki, vəziyyət Krımın su təchizatında problemlər yaradacaq.
Ukraynanın Milli Nüvə Enerjisi İstehsalı Korporasiyası (Energoatom) bəndin dağılmasını “gələcək illərdə ətraf mühitə və yüz minlərlə insanın həyatına mənfi təsir edəcək bir fəlakət” kimi qiymətləndirib. Ən azı 150 ton mühərrik yağının Dnepr çayına qarışdığı və 300 tondan çox sızma risqinin olduğu bildirilir.
"Politico" nəşri bəndin dağılmasının Ukraynada Çernobıldan sonra ən böyük ekoloji fəlakətə səbəb olduğunu yazıb. Su bəndinin dağılması Zaporojye AES-dəki vəziyyətlə bağlı narahatlıqları da artırıb. Beynəlxalq Atom Enerjisi Agentliyi, AES-dəki ekspertlərin bəndin dağıdılması ilə bağlı hadisələri diqqətlə izlədiyini, lakin nüvə təhlükəsizliyi üçün hələlik risq olmadığını bildirib. Ancaq soyuducu suyun zavoda buradan verilməsi gələcəkdə risq yarada bilər. Soyuducu hovuzların hələlik dolu olduğu bildirilir.
Tahir TAĞIYEV
