Kremlin dronlanması, ardınca Putinin saxta "səfərbərlik videosu"...
Naməlum şəxslər Rusiyanın regional radio dalğalarına sızaraq, Ukrayna qüvvələrinin bir sıra sərhədyanı rayonların ərazisinin işğalı ilə bağlı prezident Vladimir Putinin adı və səsi ilə Rusiya vətəndaşlarına təcili müraciət ünvanlayıblar. Putinin səsi ilə yayılan müraciətdə aşağıdakılar qeyd olunub:
“Ruslar, qardaşlar və bacılar, bu gün səhər saat 4-də Qərb və NATO-nun dəstəyi ilə Ukrayna qoşunları Kursk, Belqorod və Bryanskı işğal etdilər.
Sərhədçilərimiz və Silahlı Qüvvələrimiz təcavüzkar qüvvələrin qarşısını kəsərək layiqli əks-hücuma keçdilər. Bu ərazilərdə hərbi vəziyyət tətbiq edilib. Bu gün mən ümumi səfərbərlik haqqında fərman imzalayacağam, çünki təhlükəli və məkrli düşməni məğlub etmək üçün Rusiya Federasiyasının bütün qüvvələrini cəlb etməklə ona qarşı çıxmaq lazımdır. Düşmən məğlub olacaq, qələbə bizimdir”.
Kremlin sözçüsü Dmitri Peskov hadisəyə münasibət bildirib və bunun haker hücumu olduğunu deyib:
“Putinin radioda yayımlanan təcili mesajı haker hücumudur. Bu gün Putin heç bir müraciət etməyib”.
Kremlə edilən dron hücumlarından sonra belə bir hadisənin yaşanması necə şərh edilə bilər?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, müharibə getdikcə daha da qızışır: “Müharibə Rusiya ərazisindən keçib, Belqoroq, Bryansk, Kursk vilayətlərində davam edir. Rusiya əhalisi bu müharibəni öz üzərlərində görürlər. Kremlə, Putinin iqamətgahı istiqamətinə dronlarla hücumlar oldu. Yəni artıq Rusiya müharibənin ağırlığını öz üzərində görür. Putinin radioda olan çıxışı, təbii ki, təxribatdır və çox məharətlə hazırlanmış əməliyyatdır ki, kiber hücum nəticəsində əmələ gəlib. Bu da Ukrayna kəşfiyyatının çox böyük məharəti, işidir. Onu da bildirmək istəyirəm ki, Rusiyada mərkəzdənqaçma meylləri, mərkəzə tabe olmamaq meylləri yaranır. Baxmut ətrafında gedən döyüşlərdə “Vaqner”in təşkilatçısı Priqojin dəfələrlə Rusiya Müdafiə Nazirliyini, xüsusilə də nazir Şoyqunu təhqir edir, onu ağır sözlərlə ittiham edirdi. Eyni zamanda Priqojinin Kadırovla da münasibətləri kəskindir. Onlar bir-birinə çox aqressiv yanaşırlar. Hətta Kadırov öz dəstəsini də ora göndərməyi təklif etmişdi. Müharibənin şiddətlənməsini göstərən digər səbəblərindən biri də Kaxovkada su elektrik stansiyasının dağıdılması oldu. Sosial şəbəkələrdən də bunu rusların etdiyi məlum olur. Ancaq ruslar da rəsmi olaraq Ukraynanın bu işi gördüyünü bildirirlər. Bu işdə iştirak edən rus əsgəri özü etiraf etdi ki, bunu onlar törədiblər. Kaxovkada su elektrik stansiyasının partladılması nəticəsində 80 yaşayış yerinin su altında qalmaq təhlükəsi yarandı. Ona görə də Zelenski təcili olaraq Təhlükəsizlik Şurasının iclasını çağırıb və əhalinin evakuasiya məsələləri gündəmə gətirib. Eyni zamanda dronların Ukrayna ərazisindən Moskvaya göndərilmədiyi məlumdur. Bu onu göstərir ki, artıq Ukrayna kəşfiyyatı Rusiya ərazisində öz adamlarını yerləşdirib və onlar Moskva ətrafında həmin dronları Kremlə və digər obyektlərə yönəldirlər. Bu da, təbii ki, əhali arasında çox böyük təşviş və panika yaradır. Rusiyanın daxilində müharibənin dayandırılması ilə bağlı mitinqlər aparılır. Bu günlərdə Kiyevdə olan İngiltərənin xarici işlər naziri də Ukraynanın qələbə qazanacağını söyləyib və bildirib ki, Böyük Britaniyanın köməyinə arxayın ola bilərlər. Bu çox böyük, xüsusi bir detaldır. Artıq bildiyimiz kimi, uzun müddətdir NATO və ABŞ Ukraynaya fərdi yardım göstərir. Əks hücum planı artıq təsdiqlənib və bunun üçün də Ukraynaya müasir silahları, raketləri, eyni zamanda F-16 təyyarənin verilməsi haqqında razılığa gəlinib. Ukrayna xarici işlər naziri öz çıxışında bildirdi ki, Ukraynada əks hücuma keçmək üçün kifayət qədər silah-sürsat var. Ukraynanın əks hücuma keçməsi hazırlığını ABŞ ordusunun baş qərargah rəisi yüksək qiymətləndirir. Ona görə də bu günlərdə bəzi mənbələr deyir ki, artıq əks hücumlar başlayıb. Ukrayna ordusu Donbas istiqamətində əks hücumlara keçib. Baxmutda müəyyən irəliləyişlər olub. Rusiya ordusunun məlumatına görə, dünən 1500 Ukrayna əsgəri həmin əks hücum nəticəsində məhv edilib. Görünən odur ki, Ukrayna əməlli-başlı əks hücuma keçib. Təsəvvür edin ki, Rusiyada Putinin sözünə baxılmır. Çünki bir tərəfdən Müdafiə Nazirliyi, digər tərəfdən Ramzan Kadırov, hər kəs öz istədiyini deyir. Dövlət Dumasının deputatları arasında da Putinin bu siyasətinə etiraz bildirənlər var. Dövlət Dumasının komitə sədrinin müavini ermənipərəst Zatulin artıq açıq şəkildə Putinin Ukrayna siyasətinin iflasa uğradığını bildirdi. Bu da mərkəzdənqaçma meyllərinin artdığını göstərir. Son zamanlar belə hallar daha da artacaq və Rusiyanın çöküşünə gətirib çıxaracaq”.
Məhəmmədəli QƏRİBLİ
