Azərbaycana və Türkiyəyə qarşı ənənəvi olaraq qərəzli, qeyri-obyektiv münasibət sərgiləyən ATƏT bu dəfə də əməlindən qalmadı. Belə ki, qardaş ölkədə keçirilən son prezident seçkilərinin nəticələrini qaralamağa başladı. ATƏT-in qərəzli rəyini tirajlayan erməni mediası “ATƏT müşahidəçiləri Türkiyədə keçirilən seçkiləri ədalətli adlandırmaqdan imtina edirlər” - deyə yazır.
Panorama.am RİA Novosti-yə istinadən iddia edir ki, ATƏT müşahidəçiləri birgə bəyanatda Türkiyədəki prezident seçkilərini “ədalətli” və “azad” kimi xarakterizə etməkdən imtina ediblər.
Erməni mediası haray salır ki, guya Türkiyədəki seçkilər demokratik olmayib. Bu gün ATƏT və erməni mediası ağız-ağıza verib qardaş ölkəyə qara yaxmaqla, bu ölkənin vətəndaşlarının seçiminə sayğısızlıq göstərməklə məşğuldur. Bir sözlə, ATƏT müşahidəçiləri Türkiyə seçkilərinə qərəzsiz yanaşa bilmədi. Bu nədən qaynaqlanır?
“Bu qərəzlidir”
Türkiyədə keçirilən seçki prosesini yaxından izləyən, proseslərə şahidlik edən siyasi şərhçi Azər Həsrət “Bakı-Xəbər”ə açıqlamasında ATƏT-in yanaşmasının tamamilə qərəzli və yanlış olduğunu qeyd etdi. “Bu xəbərin özü bir daha göstərir ki, şəxsən mən ATƏT müşahidə missiyasının üzvü olaraq ikinci turda müşahidədən imtina etməkdə düzgün qərar vermişəm. Xatırlayırsınızsa, mayın 14-də keçirilən seçkinin birinci turundan sonra verdiyim açıqlamada qeyd etmişdim ki, bizim gördüyümüz bir başqa şeydir ATƏT-in yaydığı ilikin dəyərləndirmə tamam başqa bir şeydir. Yəni sahədə olub seçkiləri müşahidə etmişdim, eyni zamanda seçkinin necə keçirilməsi ilə bağlı çoxsaylı informasiyalarımız vardı. Kiçik texniki qüsurları bir yana qoysaq, vətəndaşın iradəsinin ifadəsinə təsir edəcək hər hansı pozuntu qeydə alınmamışdı. Amma təəssüflər olsun ki, ATƏT-in müşahidə missiyası ilkin dəyərləndirmədə elə bir tablo cızmışdı ki, sanki bu seçkilər müharibə içində keçirilib. Əlbəttə ki, şəxsən mən o missiyanın üzvü olaraq buna biganə qala bilməzdim. Ona görə də dəvət almağıma və bu dəvəti təsdiqləməyimə baxmayaraq, ikinci turda seçkini müşahidə etməkdən imtina etdim. İmtinanı da onunla əsaslandırdım ki, bizim müşahidələrimiz heç nəyi həll etmir, bu müşahidə missiyasının başında duranlar əvvəlcədən planlaşdırdıqları nə varsa onu da cəmiyyətə açıqlayırlar. Əlbəttə ki, biz bununla razılaşa bilməzdik. O baxımdan ikinci turdan imtina etdim.
İndi artıq bu informasiya üzə çıxıb və bəlli olur ki, ATƏT-in müşahidə missiyası yenə də nala-mıxa vurur, Türkiyədəki seçkilərə kölgə salmaq istəyir. Halbuki, müxalifətin özü hər hansı ciddi pozuntular haqqında danışmır, ümumiyyətlə, vətəndaşın iradəsini bu və ya digər şəkildə zədələyəcək, ona təsir edə biləcək nəyinsə baş verdiyi barədə heç nə demir. Amma bunlar seçkinin azad və ədalətli olmasını deməkdə “çətinlik” çəlirmişlər. Nəyə görə çətinlik çəkirlər? Bu qərəzlidir”.
A.Həsrətin sözlərinə görə, əvvəlcədən bəlli idi ki, Qərb dairələri müxalifət namizədi Kamal Qılıcdaroğlunun qalib gəlməsi üçün bütün varlıqları ilə çalışıblar, hətta açıq şəkildə qardaş Türkiyənin daxili işlərinə qarışaraq onun qələbəsini təmin etməyə çalışırdılar. A.Həsrətin qeyd etdiyinə görə, lakin Türkiyə xalqı buna imkan vermədi, məhz öz iradəsini ifadə edərək özlərinin uyğun gördükləri adamı ölkənin cumhurbaşkanı seçdilər. “ATƏT-in də münasibəti məhz bundan qaynaqlanır ki, biz istədiyimizə nail ola bilmədik, heç olmasa qaralayaq, seçkilərin nəticələrini gözdən salaq. Əlbəttə ki, biz bununla barışa bilmərik. Vurğulamaq istəyirəm ki, artıq ATƏT-in seçki müşahidə missiyalarından imtina etməyin vaxtı çatıb. Yəni ATƏT üzvü olan ölkələr, o cümlədən də Azərbaycan, Türkiyə, eləcə də başqa dövlətlər ATƏT qarşısında məsələ qaldırmalıdır ki, ölkələrin daxili işi olan seçki prosesini kənardan gəlib kiminsə müşahidə etməsinə gərək yoxdur, xalqlar özləri özlərinə uyğun şəkildə seçki keçirirlər, parlamenti də seçirlər, prezident də seçirlər. Buna üçüncü tərəfin müşahidəsinə elə də gərək yoxdur”-deyə A.Həsrət vurğuladı.
İradə SARIYEVA
