İranın sabiq prezidenti Həsən Ruhani növbəti dəfə hökumətə təklif edib ki, İranda referendum keçirilsin. Azad İran Teleqram kanalı məlumat yayıb ki, Xamnei referendum keçirilməsini təklif edən Həsən Ruhaniyə sərt cavab verib:
“Ölkənin müxtəlif məsələləri referenduma çıxarılır? Dünyanın harasında bunu edirlər? Referendumda iştirak etməli olan insanların hamısının bu məsələni təhlil etmək imkanı var? Bu nə sözdür?!"
Qeyd edək ki, Ruhani indiyə qədər bir neçə dəfə molla rejiminə referendum təklif edib və ölkə daxilində pik həddə çatan etirazların, probelmlərin yalnız bu yolla həllinin mümkün olduğunu bildirib.
Ruhaninin referendum təklifi Xamneini niyə əsəbləşdirib? Bu niyə onu özündən çıxarıb?" Nə baş verir?
Azərbaycan Milli Dirəniş Təşkilatının sözçüsü, əslən Güney Azərbaycandan olan və hazırda Türkiyədə yaşayan Məcid Cavadi Araz “Bakı-Xəbər”ə şərhində “bu referendum məsələsi İranda rejim içində rəqabətdə olan güclərin çatışmasından və çəkişməsindən xəbər verir. Referendum məsələsi yeni deyil, neçə dəfə İranda bu məsələ gündəmə gətirilib ki, bəzi islahatlar aparılsın. Reformist qüvvələr neçə dəfə bu məsələni gündəmə gətiriblər. O cümlədən Həsən Ruhani ki, islahatçıların Xameneiyə ən yaxın qanadına mənsub olan birisidir. O da neçə dəfə bunu gündəmə gətiriblər. Çünki islahatçılar belə düşünürlər ki, rejim böhran içərisindədir, bu böhrandan keçmək və basqıları bir az azaltmaq üçün isə referenduma getmək lazımdır. Hər dəfə islahat mövzusu gündəmə gələndə Xamenei və ifratçı qanad, mühafizəkarlar bu tələbi rədd ediblər. Yenə də Ruhaninin referendum təklifindən sonra Xamenei çıxıb açıq şəkildə “referendum olmaz”, “xalq nə bilir bu işləri”, “xalqa niyə sormalıyıq, xalq məgər belə şeyləri bilər” dedi. Bu Xameneinin və mühafizəkar qanadın nə qədər anti-demokratik, nə qədər orta çağ zehniyyətinə malik olduğunu göstərir”-deyə bildirdi.
O qeyd edir ki, bu yanaşmadan onların modern standatlardan uzaq olduqlarını görmək mümkündür. Onun sözlərinə görə, bu onu göstərir ki, onlar xalqa heç bir haqq, hüquq və düşünmə haqqı tanımırlar. “Bu, rejim içindəki güclərin çəkişməsinin göstəricisidir ki, ən üst səviyyədə davam edir. Amma təbii ki, ifratçı qanad bütün ipləri əlində tutur və imkan vermir ki, islahatçılar hər hansı bir hərəkət etsinlər. Amma onu da deyim ki, İranda olan toplumlarda, bütün xalqlarda, millətlərdə artıq islahatçıların da bir hörməti, izzəti qalmayıb. Çünki islahatçılar da nəticə etibarı ilə bu nizamın, bu Vilayət-Fəqih sisteminin qalmasından yanadırlar. Amma xalqlar, millətlər artıq bu rejimdən, Vilayəti-Fəqihdən, bu sistemdən, dini diktaturadan beziblər, ondan qurtulmaq istəyirlər”-deyə M.C.Araz bildirdi.
Əli TURABOV
