Ukraynanın Bahmut şəhərinin ələ keçirilməsi üçün Ukrayna əsgərləri ilə toqquşmalarda öndə olan Rusiyanın muzdlu şirkəti "Vaqner Qrup"un lideri Kremlə çağırış edib.
Qrupun lideri, Rusiya prezidenti Vladimir Putinə yaxınlığı ilə tanınan Yevgeni Priqojin Kremlə müraciət edərək müharibəyə son qoymağa çağırıb: “Bizim üçün ən uyğun variant xüsusi hərbi əməliyyatın başa çatdığını və Rusiyanın istədiyinə nail olduğunu elan etməkdir. Müəyyən mənada biz bu məqsədlərə həqiqətən nail olduq. Ukrayna Silahlı Qüvvələrinin çoxlu əsgərini öldürdük və missiyamızı yerinə yetirdik deyə bilərik".
"Vaqner"in lideri Rusiyanın Ukraynanın işləyən kişi əhalisinin əksəriyyətini məhv edib, Avropaya qaçanlara da göz dağı verərək bu işi nəzəri cəhətdən çoxdan bitirdiyini iddia edib.
Priqojin keçən həftə döyüşçülərinin Bahmutda bələdiyyə binasını ələ keçirdiklərini və şəhərin ələ keçirildiyini iddia etmişdi. Ukrayna isə iddiaları rədd edərək müqavimətin davam etdiyini bildirib.
Britaniya Müdafiə Nazirliyi 9 aydır müharibənin ən uzun və ən qanlı səhnələrinə şahidlik edən Bahmuta Rusiyanın hücumlarının yenidən şiddətləndiyini və Ukrayna əsgərlərinin şəhərin bəzi bölgələrindən geri çəkilmək məcburiyyətində qaldığını bildirib:
"Ukrayna hələ də şəhərin qərb hissələrini əlində saxlayır, lakin Rusiya artilleriyasının ağır atəşinə məruz qalırlar".
Ola bilərmi ki, Putinın ətrafı bu yolla müharibəni dayandırmağı təşviq etsin?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə bildirdi ki, burda müxtəlif ehtimallar var: “Söhbət müharibə faktından gedir. İlkin məqsəd, planda Ukraynanı bütövlükdə zəbt edib, öz əhatə dairəsində saxlamaq idi. Ancaq heç də Rusiya öz məqsədinə nail ola bilmədi. Rusiya elə bilirdi ki, bütün Ukrayna onu ağ bayraqla qarşılayacaq. Amma bu olmadı. Rusiyanın öz məqsədinə çatması birmənalı olaraq ikinci plana keçir. Sadəcə, burda vəziyyət ondan ibarətdir ki, artıq dünya düzənində bəzi məsələlərə nəzər yetirəndə görürsən ki, bütün dünya Rusiyaya qarşıdır. Rusiyaya qarşı çox ciddi sanksiyalar tətbiq olunur. Rusiya hər ay milyardlarla dollar vəsait itirir, insanını itirir. Bütün bunlar Rusiyanın infrastrukturunda müəyyən deformasiyalar, ciddi problemlər yaradır. Bu problemlərin aradan qaldırılması məsələsi də artıq uzun illərin işi olacaq. Bilirsiz ki, ictimai rəyə görə artıq Rusiyada bu məsələ ilə bağlı fikir yaranıb. İnsanların böyük əksəriyyəti müharibənin əleyhinədir. Faktiki olaraq, zaman Rusiyanın əleyhinə işləyir. Ona görə də, mən düşünürəm ki, bu məsələdə Rusiyanın geri çəkilməsi rəsmi Moskva üçün ən optimal variantdır”
Əlbəttə, ictimai rəyin formalaşdırılması dedikdə, biz ilk baxışdan gözə görünməyən, lakin daxildə kifayət qədər Putin rejiminə qarşı müxalif mövqedə dayanan adamları da nəzərdə tuturuq. Bu adamların böyük bir qismi ziyalılardır, ehtiyatda olan generallardır, eyni zamanda Rusiyanın tanınmış mədəniyyət xadimləridir”.
Ekspertin sözlərinə görə. Rusiyanın Ukrayna müharibəsi ilə bağlı durumu heç də xoşagələn deyil: “Hər gün daha çox bataqlığa batdığından, ola bilsin ki, lap yüksək səviyyədə ictimai rəyi formalaşdırmaq məqsədilə geriyə çəkilmək üçün bir fon yaratmaq istəyirlər. “Ziyanın yarısından qayıtmaq da xeyirdi”, kimi addım atmaq niyyətləri var. Ancaq birmənalı şəkildə Rusiya Ukraynada qələbə qazana bilmədi. Əksinə, Qərb cameəsi Rusiyanı asanlıqla Ukrayna bataqlığına cəlb etdi. Bu məsələdə mən həmişə öz fikrimi bu şəkildə bildirmişəm ki, nə Qərbi, nə də Avropanı Ukrayna xalqının taleyi maraqlandırır. Onlar Ukraynadan istifadə edərək Rusiyaya qarşı müharibə aparırlar. Poliqon olaraq da Ukrayna ərazisi seçilib. Ən çox əziyyəti çəkən də Ukrayna xalqıdır. Yoxsa milyardlarla vəsaiti Amerika, İngiltərə kimi ölkələr Ukraynaya niyə göndərsinlər? Kim öz pulundan keçər? Təbii ki, bu, Rusiya-Avropa qarşıdurmasıdır. Bu qarşıdurmada Rusiya getdikcə daha çox bataqlığa batır. Ona görə də, yəqin ki, bu cür çağırışlarla “ xüsusi əməliyyat” kimi xarakterizə etdikləri bu xoşagəlməz hadisənin bitməsinə nail olmağa çalışırlar”.
Məhəmmədəli QƏRİBLİ
