Rusiya Xarici İşlər Nazirliyinin Beynəlxalq İnformasiya Təhlükəsizliyi Departamentinin direktoru Artur Lyukmanov bildirib ki, hər gün Rusiya qitə ölkələrindən ikinci Rusiya-Afrika sammitində iştirak təsdiqini alır, Moskva bütün Afrika liderlərinin görüşünü gözləyir:
“İyulda Sankt-Peterburqda keçiriləcək ikinci Rusiya-Afrika sammitinə hazırlıq tam sürətlə davam edir. Biz hər gün afrikalı dostlarımızın iştirakının təsdiqini alırıq. Biz Rusiya və Afrika arasında uzunmüddətli strateji əməkdaşlığın inkişaf etdirilməsi yollarını birgə müzakirə etmək üçün qitənin bütün liderlərinin sammitini gözləyirik”.
Bu sammit doğrudan da möhtəşəm bir hadisəyə çevrilə bilərmi və indiki şəraitdə bu tədbir Rusiyanın nəyinə lazımdır?
Politoloq Qabil Hüseynli “Bakı-Xəbər”ə açıqlamasında bildirdi ki, bu sırf təbliğat xarakteri daşıyır: “Rusiyanın ağır zərba dəymiş imicinə müəyyən pozitiv çalarlar daxil etmək məqsədini güdür. Bu sammitin çağırılması Afrika ölkələrinə, onların saysız problemlərinə heç bir köməklik etməyəcək. Rusiya əgər bu günə kimi öz taxılını aclıq çəkən Afrika ölkələrinə göndərmirsə, dünyada süni aclıq yaratmağa çalışırsa, bu Rusiyanın əsas niyyətlərini açıb ortaya qoyur. Ola bilsin ki, həmin sammitdə taxıl diplomatiyası yenə işə düşsün. Yaxud da NATO əleyhinə fikir səsləndirmək üçün həmin ölkələrdən istifadə edilsin. Hər halda dünyanı ilk növbədə Rusiya başda olmaqla fövqəlgüclər ciddi qarşıdurma meydanına çevirib. Bu qarşıdurma meydanında dünyanın problemləri yox, güclü dövlətlər və onların maraqları uğrunda mücadiləsi ön plana çıxır. Dünya inkişafının problemlərinin gündən - günə artması da belə xırda mahiyyətli oyunların təşkilindən yaranır”.
“Afrika ölkələrində Qərbin və ABŞ-ın təsiri güclü ola bilər, yoxsa onlara etiraz edənlərin”, - sualına ekspertin cavabı belə oldu: “Rusiya balansı necə tənzimləyə bilər? Məncə Amerikanın təsiri daha güclüdür. Rusiya burada Liviya, Tunis, Əlcəzair tipli ölkələrdən idtifadə etməyə çalışacaq. Amma, Fransanın da təsiri daha güclüdür. Mərkəzi Afrika respublikaları içərisində də kimin güclu, kimin zəif olmasını müəyyən edən onların problemlərinin həllinə maliyyə dəstəyindən asılıdır. Təbiidir ki, belə dəstəyi ABŞ Rusiyaya nisbətdə daha çox verə bilər”.
Rusiya mediası yazır ki, rəsmi Moskva Afrika ölkələrinin 20 milyard dollardan çox borcunu silib. Rusiya Prezidenti Vladimir Putin qeyd edib ki, Rusiyanın Afrika ölkələri ilə ticarətinin həcmi 2022-ci ildə təxminən 18 milyard dollara çatıb.
Putinin sözlərinə görə, Ukraynadan ərzaq məhsullarının daşınmasına imkan verən Taxıl Sazişi çərçivəsində ixrac edilən taxılın yalnız 3 faizi Afrika ölkələrinə göndərilib. O qeyd edib ki, Rusiya Federasiyasından Afrikaya təxminən 12 milyon ton taxıl göndərilib:
"Biz Afrika ölkələrinə elektrik enerjisi istehsalında kömək etməyə davam edəcəyik, qitə ölkələri elektrikə olan ehtiyacın yalnız dörddə birini təmin edir".
Məhəmmədəli QƏRİBLİ
