Rusiya qoşunları Ukrayna silahları üçün mümkün qədər əlçatmaz məsafəni təmin etmək məqsədilə cənubda təmas xəttindən uzaqlaşırlar. Bu barədə Ukrayna ordusunun “Cənub” hərbi dairəsinin sözçüsü Nataliya Humenyuk deyib.
Onun sözlərinə görə, Ukrayna ordusu bunun qarşısını almağa və hərəkət zamanı rus qüvvələrini məhv etməyə çalışır:
“Nəqliyyat yollarını atəşə tuturuq ki, bunlardan istifadə edə bilməsinlər. Baş verənləri izləyirik, texnika və canlı qüvvənin hərəkətini və geri çəkilməsini dayandırırıq”.
Humenyuk vurğulayıb ki, hazırda güclü hazırlıq mərhələsi gedir, bu mərhələdə Ukrayna ordusu Rusiya qoşunlarının resurslarını, anbarlarını, texnikalarının və şəxsi heyətinin toplandığı əraziləri məhv edir:
“Əlbəttə, silahlarımızın təsir dairəsinə düşməmək üçün məsafəni hesablayırlar, amma Ukrayna ordusunun harada dayanmasından asılı olmayaraq, rahatlıq tapmayacağını tədricən anlayırlar”.
Qeyd edək ki, Ukrayna cəbhəsinin bəzi yerlərində Rusiya ordusunun geri çəkilərkən körpüləri və digər vacib nəqliyyat infrastrukturlarını partlatdığı da bildirilir. Rusiyanın bəzi media resursları belə bir qərarın şəxsən Putin tərəfindən verildiyini bildirir. Ruslar niyə bu taktikaya əl atır?
Hərbi-siyasi şərhçi Ramil Məmmədli “Bakı-Xəbər”ə bildirdi ki, Ukraynada gedən müharibədə rus ordusu bir sıra qeyri-adi hadisələrlə, döyüş taktikası ilə yadda qalıb: “Məsələn, Kiyevin yaxınlığında olmağına baxmayaraq, Quça istiqamətində olan bir neçə yaşayış məntəqəsini almasına rəğmən, sonradan həmin istiqamətlərdə geri çəkildi. Digər bir fakt isə, Xarkov istiqamətində ciddi üstünlük əldə etsə də, Xerson şəhərinin yaxınlığındakı vacib məntəqələri ələ keçirsə də, daha sonra Xerson şəhərini Ukrayna ordusuna geri qaytarmaqla ənənəvi döyüş qaydalarına rəayət etmədiyini, məsələlərə fərqli yanaşdığını nümayiş etdirdi. Burada əsas odur ki, Rusiya yaranmış bəzi stiuasiyalardan daha rahat çıxış yolu əldə etmək üçün bu addımı atır. Bəzən müxtəlif məntəqələrin nəzarətdə saxlanılması, onun müdafiəsinin təmin olunması çətinlik yaradır. Ya da hər hansı bir taktiki strateji əhəmiyyəti olan, olmayan məntəqələrdə hücum əməliyyatının keçirilməsi üçün güc sərf edilməsinə ehtiyac olmur. Başqa bir məsələ isə odur ki, yeni hücumun başqa istiqamətlərdən həyata keçirilməsi üçün belə addımlar atıla bilir. Rusiya ordusunun ümumiyyətlə döyüş taktikası və döyüşü idarə etmə taktikası son vaxtlar ənənəvi qaydalardan kənarda qalıb, uzaqlaşıb. Hesab edirəm ki, Rusiya bəzi məntəqələrdə müdafiə xəttini gücləndirmək, həmin ərazilərə güc sərf etmək kimi problemlərdən uzaqlaşmaq üçün belə addımlar atır. Yoxsa mən düşünmürəm ki, Ukrayna ordusunun güclü təzyiqi, güclü hücumu sayəsində Rusiya geri çəkilməyə məcbur olur. İndiyə kimi müharibədə Ukraynanın bütün cəbhəboyu güclü hücum əməliyyatı həyata keçirməsinin şahidi olmamışıq. Bir neçə istiqamətdə lokal döyüşlər olub. Daha çox Ukrayna ordusu müdafiənin təmin olunması məsələsində yadda qalıb. Bu baxımdan biz Rusiya ordusunun geri çəkilməsini Ukrayna ordusunun güclü əks-hücum əməliyyatları kimi əsaslandıra bilmərik”.
Məhəmmədəli QƏRİBLİ
