Ötən həftə Pentaqondan sızan məxfi sənədlər dünyada şok effekti yaradıb. Sözügedən sənədlər əsasən Rusiyanın Ukraynaya təcavüzü ilə bağlıdır. Maraqlı kəşfiyyat məlumatlarının yer aldığı sənədlər ukraynalıların yaxın aylar üçün planlaşdırdıqları hücum taktikasını da üzə çıxarıb.
Digər tərəfdən Pentaqondan sızan sənədlərdə ABŞ-ın Yaxın Şərqdə ən mühüm müttəfiqlərindən birinin prezidentinin birbaşa əmri ilə Rusiyaya silah və sursat dəstəyi təklif etdiyi məlum olur. "Washington Post" qəzeti sızdırılan sənədlərə istinadən Rusiyaya ən böyük dəstəklərdən birini "gizli şəkildə" Misirin verdiyini yazıb.
Amerikanın Yaxın Şərqdəki ən yaxın müttəfiqlərindən biri olan Misir, prezident Sisinin əmri ilə Rusiyaya 40 min raket, çoxlu sayda top və mərmi göndərib. Sənədlərdə Sisinin “Qərblə problem yaşamamaq üçün” səlahiyyətli şəxslərə raketlərin istehsalı və daşınmasını gizli saxlamağı tapşırdığı yazılıb.
Adı açıqlanmayan bir ABŞ hökumət rəsmisi isə Rusiyaya raket tədarükü planının həyata keçirilməsindən xəbərsiz olduqlarını deyib.
Fevral ayında sızdırılan və qəzəb doğuran sənəddə Sisinin fevralın 1-də “Qərblə problem yaşamamaq üçün” raket tədarükünü gizli saxlamağı əmr etdiyi və yalnız Salah əl-Din adlı şəxsi bununla bağlı təlimatlandırdığı bildirilir.
Salah əd-Din isə zavod işçilərinə bildirib ki, istehsal olunan raket və mərmilər Misir ordusu üçün istifadə olunacaq. "Washington Post" qəzeti yazır ki, Salah əl-Din adlı şəxs hərbi istehsala cavabdeh olan nazir Məhəmməd Salah əl-dindir. Sənəddə o da bildirilir ki, Rusiyaya tədarük edilən barıt onilliklər boyu fəaliyyət göstərən kimya istehsalı müəssisəsi “18-ci zavod”da istehsal olunacaq.
Senator Kris Merfi də sözügedən məsələ ilə bağlı açıqlamalar verib: “Misir Yaxın Şərqdəki ən qədim və ən mühüm müttəfiqlərimizdən biridir. Sisinin gizli şəkildə Rusiya üçün Ukraynada istifadə oluna biləcək raketlər hazırladığı doğrudursa, münasibətlərimizin vəziyyəti ilə bağlı ciddi düşünməliyik".
Mövzu ilə bağlı açıqlamalar verən Misir Xarici İşlər Nazirliyinin sözçüsü Əhməd Əbu Zeid isə sənədlərin doğruluğu ilə bağlı sualları belə cavablandırıb: "Misirin mövqeyi əvvəldən bu böhrana qarışmamaq və hər iki ölkə ilə bərabər məsafə saxlamaq öhdəliyinə əsaslanır"
