Ötən ilin fevralında başlayan Rusiya işğalı hələ də Putinin istədiyi kimi getmir. Müharibənin əvvəlində Zelenskinin qaçacağını düşünən Putin Qərb ölkələrinin Ukraynaya böyük dəstəyi ilə qarşılaşdı.
Ruslar müharibənin ən kritik rayonlarından biri olan Xersonu cəmi 8 ay əllərində saxlaya bildilər. Ukraynanın Xerson şəhərinin mühasirəsi şəhərin cənubda Krım yarımadası ilə əlaqəni kəsməsindən sonra baş verib. Xersonla Krım arasında Dnepr çayı üzərində yerləşən körpü raketlərlə partladılıb və 30 min rus əsgəri ərazidə sıxışdırılıb.
Krım son doqquz ildə Rusiya üçün ən həssas yerə çevrilib. Kiyevdəki siyasi hakimiyyət boşluğundan istifadə edən Moskva 2014-cü ilin martında Ukrayna ərazisi olan yarımadanı ələ keçirib. Bu, “elan edilməmiş müharibənin” başlanğıcı və iki ölkə arasında böhranın dönüş nöqtəsi idi. 2014-cü il martın 17-də Rusiya lideri Putin Rusiyanın Krımın ilhaqını təsdiqləyən qərarı imzalayıb.
Son vaxtlar Ukraynanın yarımadaya hücum edəcəyi ilə bağlı xəbərlər Rusiyanın müdafiə hazırlığını artıb. ABŞ mətbuatı Rusiya ordusunun Ukraynanın Krıma mümkün hücumuna qarşı tədbirlər görməyə başladığını yazıb. Analitiklər hücum ehtimalının az olduğunu desələr də, Rusiya cəmi bir neçə həftə ərzində Krımın qərb sahilində yerləşən Vitino şəhəri yaxınlığında kilometrlərlə istehkam inşa edib.
Peyk görüntüləri də bir neçə gün ərzində Krımda bəzi maneələrin qoyulduğunu təsdiqləyir. Bundan başqa, İnternetdə yerləşdirilən iş elanlarında Rusiya Krımda xəndəkləri taxta və betonla doldurmaq üçün günə 90 dollardan çox pul ödəməklə inşaat işçiləri axtarır.
"DailyMail" də çimərliklərdə və şəhərdə görülən tədbirlərdən yazıb. Rusların bölgəni müdafiə etmək üçün yüzlərlə metr səngər qazdığı qeyd edilir, bölgənin indiki vəziyyəti ilə 2 il əvvəlki vəziyyəti müqayisə edilir.
Moskva administrasiyası nəhəng turizm bölgəsi Ak-Monaidə "Əjdahanın dişləri" kimi tanınan tank tələləri qurur. Bir vaxtlar həm rus, həm də ukraynalı turistlərin sevimlisi olan çimərliklər indi cazibədarlıqdan uzaq görünür və çox güman ki, bütün yayı qapalı keçirəcək.
“Sun” qəzeti də bölgədə səngərlərlə yanaşı, çimərliklərə tank əleyhinə minaların yerləşdirildiyini də yazıb.
TAHİR
