ABŞ-da növbəti dəfə məxfi sənədlər sosial mediada dərc edilib. Ötən günlərdə Ukrayna müharibəsi planlarının sızmasından sonra bu dəfə ABŞ-ın Çin və Yaxın Şərq planları sosial mediada yayılıb.
Ukraynaya silah göndərilməsinin təfərrüatları və Ukrayna ordusuna aid fotoşəkillərin sızmasının ABŞ kəşfiyyatı üçün “çox ciddi məlumat pozuntusu” olduğu bildirilirdi. Sızma ilə bağlı yeni xəbər isə narahatlıqları daha da artırıb.
Bu dəfə ABŞ-ın Yaxın Şərq və Çin planları ilə bağlı məxfi sənədlər yayılıb. Yeni sızan sənədlər arasında ABŞ-ın Ukrayna müharibəsini təhlil etdiyi xəritələr, ABŞ-ın Yaxın Şərq və Çinlə bağlı təhlilləri və qlobal terror təhlükəsi araşdırmaları var.
Ukrayna rəsmiləri iddia edirdilər ki, sızmanın arxasında çox güman ki, Rusiya dayanır. Ukrayna prezidenti Vladimir Zelenskinin müşaviri Mykhailo Podolyak bildirib ki, bu sənədlər Rusiyanın dezinformasiya əməliyyatının bir hissəsi kimi görünür.
Britaniyanın "Reuters" xəbər agentliyinə danışan ABŞ rəsmiləri, sənədlərdə Rusiya ordusunun Ukraynadakı itkilərinin az olduğunu göstərmək üçün eedilən dəyişikliyə diqqət çəkib. ABŞ mətbuatı vəziyyətin Qərb kəşfiyyat agentlikləri üçün “kabus” olduğunu yazıb.
ABŞ Müdafiə Nazirliyi (Pentaqon) ABŞ və NATO-nun Rusiyaya qarşı Ukrayna ordusunu gücləndirməyə yönəlmiş gizli müharibə planlarının sosial media platformalarında və mesajlaşma proqramlarında yayılması ilə bağlı araşdırmaya başlayıb.
“New York Times” qəzeti yazır ki, Ukraynanın Rusiyaya qarşı gözlənilən əks-hücumu ilə bağlı ABŞ və Ukrayna arasında aparılan danışıqları ehtiva edən məxfi sənədlərdə Ukrayna əsgərlərinin sayı və silahları kimi Rusiya üçün faydalı məlumatların yer alması diqqət çəkir.
Sənədlərin orijinaldan fərqli olduğu, ilkin sənədlərdə bəzi dəyişikliklər edildiyi və ölən rus əsgərlərinin sayının az göstərildiyi bildirilir.
“The New York Times” yazıb ki, ABŞ hakimiyyətinin yazıları silmək cəhdləri uğurlu olmayıb. Pentaqonun sözçüsü Sabrina Sinq, sosial media yazıları ilə bağlı xəbərlərin nəzərdən keçirildiyini deyib.
Tahir TAĞIYEV
