Bazar günü axşam Rusiyanın Sankt-Peterburq şəhərində kafedə partlayış baş verib. Kafedə Kremlpərəst hərbi bloggerlərin görüşü keçirilirmiş. Kafeyə qoyulan bomba bir-birlərinə hədiyyələr təqdim edən Putinin təbliğatçılarını hədəf alıb.
“Street Food Bar No 1” adlı kafedə baş verən partlayışda bir nəfər ölüb, azı 25 nəfər xəsarət alıb. Daxili İşlər Nazirliyindən verilən açıqlamada həyatını itirən şəxsin Rusiya prezident Vladimir Putin dəstəkçi hərbi bloqçusu Vladen Tatarski kimi tanınan Maksim Fomin olduğu bildirilib. Hücuma görə məsuliyyəti heç kim üzərinə götürməyib.
Rusiya mətbuatında partlayışın mənbəyinin Tatarskiyə dostlarının hədiyyə etdiyi heykəlin içərisinə yerləşdirilmiş bomba olduğu iddia edilib. Partlayışdan sonra Telegram-da yayılan videoda ona heykəl verildiyi görünür, lakin BBC bu heykəlin sözügedən heykəl olub-olmadığını təsdiqləyə bilməyib.
Sankt-Peterburq mərkəzli “Fontanka” xəbər saytının məlumatına görə, hadisənin baş verdiyi kafenin keçmiş sahibi Rusiyanın muzdlu “Vaqner” qrupunun rəhbəri Yevgeni Priqojindir. .
Qeyd edək ki, ötən ilin sentyabrında Rusiyanın Ukraynanın 4 regionunu ilhaq etməsi ilə bağlı Kreml Sarayında keçirilən mərasimə qatılan Tatarski mərasimdə çəkdiyi videoda “Hamını yenəcəyik, hamını öldürəcəyik, ehtiyacımız olan hər kəsi soyacağıq. Hər şey istədiyimiz kimi olacaq" demişdi.
Rusiya Xarici İşlər Nazirliyinin mətbuat katibi Mariya Zaxarova Tatarski və digər bloqçuları “həqiqətin müdafiəçiləri” adlandırıb. "Rusiya jurnalistləri daim Kiyev rejiminin qisas təhlükəsini hiss edirlər. Tatarski Ukrayna üçün "təhlükəli" idi, lakin o, cəsarətlə sona qədər getdi və üzərinə düşən vəzifəni yerinə yetirdi", - o Telegram-da yazıb.
Ukrayna prezidenti Vladimir Zelenskinin müşaviri Mixail Podolyak isə Twitter-də Rusiyada "hörümçəklərin bir-birini bankada yediklərini" yazıb. O, həmçinin iddia edib ki, Rusiya daxilindəki siyasi münaqişə “terror aktlarına” çevrilib.
Tatarski Donetsk vilayətində anadan olub. Tatarskinin özünün dediyinə görə, o, silahlı soyğunçuluğa görə həbsdən çıxanda Donetskdə artıq separatçıların nəzarətində olub.
Əgər Tatarskinin partlayışda qəsdən hədəfə alındığı sübut olunarsa, bu, Rusiya-Ukrayna müharibəsi ilə əlaqəsi olan yüksək profilli şəxsə Rusiya ərazisində ikinci hücum olacaq. Rusiya hakimiyyətinin dəstəkçilərindən olan jurnalist Darya Dugina ötən il Moskva yaxınlığında bomba yüklü avtomobilin partlaması nəticəsində həlak olub. O, Putinin yaxınlığı ilə tanınan ultramillətçi Aleksandr Duqinin qızı idi.
TAHİR
