“Rosselxoznadzor” Ermənistan tərəfinin pis nəzarəti və məhdudlaşdırıcı tədbirləri pozması səbəbindən Ermənistandan Rusiyaya süd məhsullarının idxalına məhdudiyyətlər qoyub.
Bununla bağlı yayılan məlumata görə, Ermənistanın süd emalı müəssisələri İran müəssisələrinin istehsal etdiyi xammaldan istifadə edir. “Rosselxoznadzor” mütəxəssislərinin 2023-cü il martın 20-dən 24-dək apardığı yoxlama zamanı Ermənistan istehsalçılarının Rusiyaya tədarük hüququ olmayan İran müəssisələrindən xammaldan istifadə etməsi faktı təsdiqlənib. Buna görə də “Rosselxoznadzor” tərəfindən Ermənistandan idxal olunan süd məhsullarına məhdudlaşdırıcı tədbirlər tətbiq edilib: “Müəyyən edilmiş pozuntuların xarakteri həm də dövlət baytarlıq xidməti tərəfindən süd emalı müəssisələrinin fəaliyyətinə lazımi nəzarətin olmamasından xəbər verir. Bu da keyfiyyətsiz və təhlükəli məhsulların Rusiyaya idxalı risqini artırır”.
Məsələ ilə bağlı Ermənistana xəbərdarlıq edilib, bu, ciddi qanun pozuntusu hesab edilib. Departament onu da əlavə edib ki, Rusiya tərəfi ilə razılaşmadan və ya rəsmi imtinaya baxmayaraq, üçüncü ölkələrin müəssisələrinin Gömrük İttifaqının reyestrlərinə daxil edilməsi halları “Rosselxoznadzor” üçün xüsusi narahatlıq doğurur.
“Burada siyasi amillərin də olması istisna deyil”
Məsələyə münasibət bildirən ekspert Rəsul Cahangirlinin fikrincə, Rusiya şirkətinin belə addım atması təsadüfi deyil: “Bunun başlıca səbəbi Ermənistanın öz öhdəliklərini yerinə yetirməməsi olub. Çünki Ermənistan tərəfi Rusiyaya tədarük hüququ olmayan İran müəssisələrindən xammal alıb. Bu da, öz növbəsində, məhsulun keyfiyyətinə mənfi təsir edir. Ermənistan Rusiyaya bir sıra ənənəvi aqrar məhsullar ixrac edir. Ancaq onların içində süd məhsullarının payı elə də böyük deyil. Lakin Ermənistan Avrasiya İqtisadi İttifaqının üzvü olduğu üçün bu ölkəyə müəyyən güzəştlər edilir. Belə görünür ki, Ermənistan şirkətləri bundan sui-istifadə edərək keyfiyyəti aşağı olan İran süd məhsullarını bura qatıblar. Məqsəd o olub ki, daha çox məhsul satıb, daha çox gəlir əldə etsinlər. Çünki Rusiya bazarı çox böyükdür və bir sıra kənd təsərrüfatı məhsullarına tələbat böyükdür. O məhsullar ki, onlar xaricdən idxal edilir. Bu gedişlə Ermənistanla İranın birgə müəssisəsi müflisləşəcək. Çünki məhsul satılmırsa, o zaman istehsalın minimuma enməsi və ya dayanması qaçılmazdır. Başqa bir tərəfdən, burada siyasi amillərin də olması istisna deyil. Çünki Rusiyanın hansısa ölkə ilə münasibətləri pisləşirsə, o dəqiqə iqtisadi rıçaqları işə salır. Son vaxtlar Moskva-İrəvan münasibətlərində soyuqluğun müşahidə olunduğunu nəzərə alsaq, burada siyasi amillərin də olduğu istisna deyil”.
Vidadi ORDAHALLI
