“Rusiya ona müraciət edən hər bir xalqın suverenliyinin və dövlətçiliyinin tarixi müdafiəçisidir. O, ən azı iki dəfə ABŞ-ı xilas edib - Müstəqillik Müharibəsi və Vətəndaş Müharibəsi zamanı”. Bunu “Rossiyskaya qazeta”ya müsahibəsində Rusiya Təhlükəsizlik Şurasının katibi Nikolay Patruşev bildirib.
Onun sözlərinə görə, ABŞ-ın dağılması təhlükəsi indi də mövcuddur, onun əlaməti Respublikaçılar və Demokratlar partiyalarının nümayəndələri arasında “antaqonizmin artması”dır. N.Patruşev hesab edir ki, “adi vətəndaşlar Amerikanın bütövlüyünü qorumaq üçün barmaqlarını belə qaldırmayacaqlar”. Həmçinin, Rusiya Federasiyası Təhlükəsizlik Şurasının katibinin fikrincə, “BLM, yəni Qaraların həyatı önəmlidir” kimi layihələr və transgender nəzəriyyələrinin universal şəkildə yayılması” Amerika dövlətçiliyinin dağılmasına gətirib çıxarır.
O, izah edib ki, ABŞ-dakı daxili siyasi ziddiyyətlər fonunda Meksika "amerikalıların 1848-ci ildə ələ keçirdikləri" əraziləri geri qaytarmağa cəhd edə bilər. Bundan əlavə, N.Patruşevin fikrincə, digər Latın Amerikası dövlətlərinin liderlərinin də oxşar planları ola bilər. “Şübhə yoxdur ki, gec-tez ABŞ-ın cənub qonşuları onlardan oğurlanmış əraziləri geri alacaqlar”-deyə Patruşev əlavə edib.
Rusiya Federasiyası Təhlükəsizlik Şurasının katibi vurğulayıb ki, ABŞ-ın dağılması təhlükəsi reallaşarsa, o zaman Moskva Amerika hakimiyyətinə kömək etməyəcək: "Hesab edirəm ki, bu dəfə dövlətlərə öz bütövlüyünü qoruyub saxlamaqda kömək etmək məqsədəuyğun deyil”.
Patruşev düzmü deyir? Rusiya iki dəfə ABŞ-ı xilas edib?Amerika doğrudan parçalana bilərdi?
“Onun bu bəyanatı hər cür ciddilikdən uzaq və dövlət adamına qətiyyən yaraşmayan bir bəyanatdır”
Siyasi ekspert Abutalıb Səmədov “Bakı-Xəbər”ə “Nikolay Patruşev Rusiyanın Təhlükəsizlik Şurasının katibidir və Rusiyada ən nüfuzlu, Putinə ən yaxın olan adamlardan biri sayılır. Ancaq onun bu bəyanatı hər cür ciddilikdən uzaq və dövlət adamına qətiyyən yaraşmayan bir bəyanatdır. Rusiya Amerikanı 200 il bundan əvvəl parçalanmaqdan xilas edib. Təbiidir ki, 200 il bundan əvvəl çox şeylər olub. Ancaq bunun müasir tarixlə nə əlaqəsi var? Rusiya da ən azı son 150 il ərzində dəfələrlə belə vəziyyətdə olub, parçalanıb, sonra müəyyən əraziləri zorakılıqla özünə birləşdirib. Ona görə də tarixə belə ekskrusiya etmək, bu cür bəyanatlar vermək təbii ki, yanlışdır. Dünyada böyük dövlətlərinheç biri parçalanmaq təhlükəsindən tamamilə sığortalanmayıb. Əgər belə dövlətlərin siyahısı tutulsa, parçalanmaq təhlükəsi ilə üz-üzə olan dövlətlərin başında Rusiya gəlir. Patruşevin belə bir təhlükədən qorunmaq üçün çarəsi varsa birincisi, onu Rusiya üçün düşünsün. “Keçəl dərman bilsə öz başına çəkər” məşhur məsəlini unutmasın. Bu gün parçalanmaq təhlükəsi olan ən böyük dövlət Rusiyadır. ABŞ belə bir təhlükə ilə üz-üzədirmi? Təbiidir ki, ola bilər. Ancaq bu təhlükə Rusiya ilə müqayisədə dəfələrlə azdır, yox dərəcəsindədir. Ancaq hər bir dövlətin başına belə bir şey gələ bilər. Gələcək yaxın 50-100 ildə nə baş verə bilər, bunu söyləmək çox çətindir. Bu vəziyyətdə əgər ABŞ parçalanmaq təhlükəsi ilə üz-üzə olsa və ştatlardan hansısa ABŞ-ın tərlibindən çıxıb müstəqil olmaq istəsə Rusiya hansı köməyi göstərə bilər? Bunun qarşısını nə cür ala bilər? Məsələ BMT Təhlükəsizlik Şurasının müzakirəsinə çıxsa əleyhinə səs verməkləmi? ABŞ və onun Təhlükəsizlik Şurasındakı müttəfiqləri istəməsələr, bu məsələ heç müzakirəyə də çıxmaz. Ona görə də Rusiyanın burada kömək göstərmək imkanı yox dərəcəsindədir”- deyə bildirdi.
A.Səmədovun vurğuladığına görə, hərbi və digər sahələrdə yardımları da düşünmək qeyri-ciddi olardı. A.Səmədov qeyd etdi ki, ona görə də, əgər ABŞ nə vaxtsa parçalanmaq təhlükəsi ilə üz-üzə olsa və hansısa ştatlardan biri, yaxud bir neçəsi dövlətin tərkibindən çıxmaq istəsə, təbiidir, bu, ABŞ-ın daxili işi olacaq, onun qarşısını almaq da ABŞ hakimiyyətinin işidir. “Mümkün olsa qarşısını alarlar, mümkün olmasa da yox. Bu cəhdin qarşısını almaq çətin olar, amma burada Rusiyanın hər hansı bir rolunun olması mümkünsüzdür. Yenə təkrar edirəm, bu gün, dünən parçalanmaq təhlükəsi ilə üz-üz olan dövlət Rusiya olub. Boris Yeltsin hakimiyyəti dövründə onun verdiyi məşhur bəyanat Rusiyanı parçalanmaq təhlükəsi ilə üz-üzə qoyub, eyni zamanda onun apardığı siyasət də belə bir təhlükəni tam real etmişdi. Xatırlayırıq ki, Yeltsin deyirdi, nə qədər həzm edə bilərsizsə o qədər müstəqillik götür. Bəzi respublikalar düşündülər ki, tamamilə müstəqilliyi də həzm edə bilərlər və Çeçenistan problemi üzə çıxdı. Çeçenistan müstəqil olmaq istəyirdi. Növbədə digər respublikalar da var idi və onlar da gözləyirdilər ki, Çeçenistandakı proseslər uğurla başa çatsa onlar da müstəqilliyə doğru addım atsınlar. Ancaq Rusiya rəhbərliyi verdiyi sözdən imtina etdi və Çeçenistanı qan içində boğdu. Tədricən o biri respublikaların da bütün səlahiyyətlərini əllərindən aldı. Hələlik, o təhlükə azalıb. Ancaq Ukrayna müharibəsindən sonra necə olacaq, sanksiyalar Rusiyanı hansı həddə gətirib çıxaracaq, Rusiya dünyada çıxdaş olumuş dövlət vəziyyətində necə yaşayacaq və bu bunun gələcək taleyində hansı rolu oynayacaq, bütün bunlar çox ciddi suallardır. Rusiya Təhlükəsizlik Şurasının katibi Nikolay Patruşev ABŞ-ın gələcək taleyi barədə bəyanat verməkdənsə, Rusiya barədə, Rusiyanın ərazi bütövlüyünü qorumaq haqda düşünsün və artmaqda olan mövcud təhlükələri necə aradan qaldırmaq barədə düşünsün. Məncə, bu həm onun, həm də Rusiya üçün daha düzgün yol olardı”.
İradə SARIYEVA
