İki gün əvvəl Rusiya lideri Putinin həbs olunacağını açıqlayan Almaniyanı müharibə ilə hədələyən Rusiya Təhlükəsizlik Şurasının sədr müavini Dmitri Medvedev yeni açıqlamalar verib. Medvedev bəyan edib ki, Rusiya ordusu müəyyən edilmiş hədəflərə çatacaq və lazım gəlsə, Ukraynanın Polşa sərhədində yerləşən Lvov şəhərini də ələ keçirəcək.
"Heç nə istisna edilməyəcək. Əgər bu "infeksiyanı" aradan qaldırmaq üçün Kiyevə qədər getmək lazımdırsa, Kiyevə qədər, Lvova qədər getmək lazımdırsa, Lvova qədər gediləcək" - Medvedev deyib.
ABŞ və Qərb ölkələrinin Kiyevə böyük dəstək verdiyini deyən Medvedev bildirib ki, Bayden və qərblilər Ukraynaya kömək etmək və ən qısa zamanda hər cür dəstəyi vermək üçün əllərindən gələni etdilər: "Ancaq nəticə əldə edilə bilməyən ABŞ və Qərb ölkələrində məyusluq başlayıb".
Rusiya ordusunun Ukrayna ordusu ilə döyüşərkən NATO silahları ilə qarşılaşdığını bildirən Medvedev rusların 3,6 milyon əsgəri olan NATO ilə döyüşdüklərini iddia edib: "Onlar hibrid münaqişədədirlər və artıq bunu gizlətmirlər. O cümlədən Kiyev rejiminə texnika, silah və pul göndərən 800 milyon əhali də bura daxildir. Nə demək istədiyim çox aydındır. Rusiya Ukrayna ilə, faşistlərlə və ya yarı nasist birləşmələrlə müharibə aparmır, 3.6 milyon əsgəri olan NATO ilə müharibə edir".
Böyük Britaniyanın Ukraynaya zəiflədilmiş uran mərmiləri göndərmək qərarını yenidən qiymətləndirən Medvedev Qərbə xəbərdarlıq edib: "Bu, birbaşa nüvə silahı deyil, nüvə izi olan bir silahdır. Bu silah növü əvvəllər Yuqoslaviyada istifadə olunub və dəqiq bir araşdırma aparılaraq bu silahlar qadağan edilmədi. Ancaq bunun nəticələri çox ciddi ola bilər. Çünki serblər xərçəng xəstəliyində çox ciddi artım olduğunu deyirlər".
Medvedev bildirib ki, xaricilərin Ukraynaya etdiyi silah yardımları nüvə qiyamətini yaxınlaşdırır: "Bu, nüvə müharibəsi anlamına gəlməsə də, "apokalipsis atları" artıq yola çıxıb və gəlməyə davam edir".
Tahir TAĞIYEV
