Suriyanın şərqindəki Deyr əz-Zor əyalətində ABŞ qüvvələrinin yerləşdiyi Ömər neft və Kuniko qaz yatağına İranın dəstəklədiyi xarici terrorçu qrupların yerləşdiyi bölgələrdən raket zərbələri endirilib.
ABŞ qüvvələri raketlərin gəldiyi istiqamətə artilleriya və raket atəşi ilə cavab verib.
Bundan əvvəl də ABŞ qüvvələrinin Deyr əz-Zor əyalətində yerləşdiyi Ömər neft yatağına və ətrafına raket zərbələri endirilib.
Pentaqonun sözçüsü Rayder gündəlik mətbuat konfransında bildirib ki, Deyr əz-Zorda Yaşıl Kənd adlandırılan bazaya 10 raketlə hücum edilib.
Bundan əvvəl isə Suriyanın şimal-şərqində Haseke yaxınlığında koalisiya qüvvələrinə aid texniki xidmət obyekti pilotsuz uçuş aparatı (PUA) tərəfindən vurulub, nəticədə 1 ABŞ hərbçisi ölüb, 6 hərbçi yaralanıb.
ABŞ Müdafiə naziri Lloyd Ostin hücuma cavab olaraq İran İnqilab Keşikçiləri Korpusuna (SEPAH) bağlı terrorçu qrupların istifadə etdiyi obyektlərə hava zərbələri endirildiyini açıqlayıb. "Prezident Baydenin göstərişi ilə ABŞ Mərkəzi Komandanlıq qüvvələrinə İranın dəstəklədiyi qrupların istifadə etdiyi obyektlərə dəqiq hava zərbələri endirmək icazəsi verdim. Hava hücumları İran İnqilabı Keşikçiləri Korpusunun Suriyadakı koalisiya qüvvələrinə qarşı son hücumuna cavabdır" - Ostin deyib.
ABŞ prezidenti Co Bayden isə Suriyada ABŞ-ın rəhbərlik etdiyi koalisiya qüvvələrinə hücumların İran dəstəkli qruplar tərəfindən həyata keçirildiyini bildirib. Kanadada səfərdə olan Bayden İrana xəbərdarlıq da edib. ABŞ prezidenti İranla qarşıdurma güdmədiklərini, lakin Amerika xalqını qərarlı şəkildə qoruyacaqlarını bəyan edib.
Qeyd edək ki, Suriyada fəaliyyət göstərən ABŞ və koalisiya qüvvələrinə məxsus hərbi məntəqələr vaxtaşırı İranın dəstəklədiyi xarici terrorçu qrupların yerləşdiyi bölgələrdən raket hücumları ilə hədəfə alınır.
Ümumiyyətlə Deyr əz-Zor əyaləti İrandan Livana quru əlaqəsini təmin edən şəhərdir. İraq və İordaniyadan gələn boru kəmərləri və ticarət yolları da bu şəhərdən keçir. Deyr əz-Zorun mərkəzi və qərbi 2017-ci ilin noyabrında İranın dəstəklədiyi qruplar və Rusiyanın köməyi ilə İŞİD-in geri çəkilməsindən sonra Əsəd rejiminin əlinə keçib.
Burada əsasən rejimi dəstəkləyən İrandan idarə edilən xarici terrorçu qruplar yerləşib. Sünni ərəblərin məskunlaşdığı Deyr əz-Zorda yerləşdirilən İran, İraq, Livan, Əfqanıstan və Pakistandan gələn terrorçu qruplara İran İnqilab Keşikçiləri Korpusunun (SEPAH) zabitləri komandanlıq edir.
Fərat çayının şərqində qalan Deyr əz-Zor torpaqları isə ABŞ-ın dəstəklədiyi terror təşkilatı PKK/YPG tərəfindən işğal olunub.
TAHİR
