Fransada pensiya yaşının mərhələli şəkildə 64-ə qaldırılmasını nəzərdə tutan islahata qarşı 1 milyondan çox fransız küçələrə çıxıb.
Həmkarlar ittifaqlarının çağırışı ilə küçəyə çıxan nümayişçilər hökumətdən parlamentdə səsvermə keçirilmədən qəbul edilən islahatdan imtina etməyi tələb ediblər.
Dijon, Renn və Rouen şəhərlərində polislə nümayişçilər arasında toquşmalar olub. Paytaxt Parisdə də etiraz aksiyasında polislə nümayişçilər arasında qarşıdurma yaranıb. Nümayişçilərdən bəziləri Paris küçələrindəki zibil qutularını yandırıb, avtobus dayanacaqlarını dağıdıb.
Həmkarlar ittifaqları isə nümayişlərə aksiyaları davam etdirməyə çağırıb. Ölkənin aparıcı həmkarlar və tələbə həmkarlar ittifaqları birgə bəyanatda islahat əleyhinə həftə sonu və çərşənbə axşamı, martın 28-də nümayişlərə və tətilə çağırıblar.
Fransanın daxili işlər naziri Gerald Darmanin yerli mətbuata açıqlamasında nümayişlər zamanı azı 172 nəfərin saxlandığını, 149 polis və jandarmanın isə yaralandığını bildirib. Darmanin ölkə üzrə 140 yanğının söndürüldüyünü, Parisdə isə 50 yanğının hələ də davam etdiyini qeyd edib.
Təşkilatçıların məlumatına görə, Fransada nümayişlərdə 3,5 milyon, Daxili İşlər Nazirliyinin məlumatına görə isə 1 milyon 89 min nəfər iştirak edib.
İslahat əleyhdarları Bordo şəhərində bələdiyyə binasının darvazasını yandırıblar.
Baş nazir Elisabeth Borne nümayişlərdə baş verən zorakılıq və dağıntıların "qəbuledilməz" olduğunu bildirib.
Fransanın ictimai təşkilatı İnsan Hüquqları üzrə Milli Məsləhət Komissiyası (CNCDH) ölkədə pensiya islahatlarına qarşı nümayişlərdə polisin etirazçılara zorakılıqlarını pisləyib.
CNCDH-nin “Sərbəst toplaşmaq azadlığı və mətbuat azadlığı təhlükə altında” başlığı ilə dərc etdiyi bəyanatda hökumətin pensiya islahatlarının ciddi sosial hərəkətliliyə səbəb olduğu vurğulanıb.
Nümayişlərdə polisin rəftarının narahatlıq doğurduğu vurğulanan açıqlamada polisin sərt müdaxiləsi, zorakılıqları pislənilib və vəziyyət barədə Birləşmiş Millətlər Təşkilatı və Avropa Şurasının məlumatlandırıldığı bildirilib.
Açıqlamada bir çox nümayişçinin heç bir əsas olmadan saxlandığı və onların arasında 2 jurnalistin də olduğu barədə məlumat paylaşılıb.
TAHİR
