Xəbər verildiyi kimi Beynəlxalq Cinayət Məhkəməsi (ICC) Putinin həbsinə order verib. Bu qərardan sonra Almaniya Putin ölkəyə addım atdığı zaman qərarı həyata keçirəcəyini bəyan edib.
Rusiya Təhlükəsizlik Şurasının sədr müavini Dmitri Medvedev isə Almaniyanın ədliyyə naziri Marko Buşmanın "Putin Almaniyaya gələrsə, həbs olunacaq" açıqlamasına sərt reaksiya verib.
"Təsəvvür edək, açığı, bu, heç vaxt baş verməyəcək, amma yenə də təsəvvür edək ki, bu baş verdi. Nüvə dövlətinin başçısı (Putin) Almaniya ərazisinə getdi və həbs olundu. Bu nə deməkdir? Bu, Rusiya Federasiyasına qarşı müharibə elanı olardı. Bu halda bizim bütün raketlərimiz Bundestaq (Almaniya Federal Məclisi) və kanslerin (Almaniya kansleri Olaf Şolz) ofisinə uçar” - Medvedev deyib.
Böyük Britaniyanın Ukraynaya zəiflədilmiş uran tərkibli sursat göndərmək planına da toxunan Medvedev deyib ki, Ukraynaya hər gün xarici silahların çatdırılması nüvə apokalipsisini daha da yaxınlaşdırır.
Qeyd edək ki, ötən cümə günü Beynəlxalq Cinayət Məhkəməsi uşaqları Ukraynadan qanunsuz deportasiya etməkdə ittiham etdiyi Putinin həbsinə order verib.
Tahir TAĞIYEV
