“Mədəniyyət beşiyi” Fransa ikiüzlü siyasətini günü-gündən daha da genişləndirir. “Siyasi mədəniyyət”, “demokratiya” barədə başqa ölkələrə “leksiya” oxuyan bu ölkə özü ən böyük qeyri-demokratik mənzərə sərgiləyib. Qarabağda yaşayan bir ovuc erməninin vəkilinə çevrilən Fransa öz ölkəsində yaşayan xalqların ana dilində danışmaq və sair hüquqlarını pozmaqla dünyaya pis nümunə göstərir.
Mətbuatda yayılan məlumata görə, Fransanın Korsika adasında korsikan dilinin istifadəsi qadağan olunub. Bu barədə BMT-nin azlıqlar üzrə xüsusi məruzəçisi Fernan de Varenn tviterdə bildirib.
“Korsikada yalnız fransızcanın istifadəsinə icazə ayrıseçkilikdir və beynəlxalq hüququn pozulmasıdır. Belə ki, ingiliscə dövlət universitetlərində istifadə olunduğu halda korsikan dili yasaqlanıb”.
Erməni xalqı və erməni dilinə hörmətlə yanaşan, Bakının mərkəzində erməni kilsəsini saxlayan Azərbaycanı az qala “soyqırım”da ittiham edən Fransada bütöv bir xalqın adını və dilini qadağan edirlər.
Aydın Mirzəzadə: “Bu, Fransa siyasi rəhbərliyinin riyakarlığını, digər xalqların mədəniyyətinə, dilinə sayığısızlığını göstərir”
Millət vəkili Aydın Mirzəzadə “Bakı-Xəbər”ə şərhində bildirdi ki, Fransanın son hərəkəti açıq-aşkar ikiüzlülükdür: “Bir tərəfdən dünya birliyində bütün xalqların birliyinə, dilinə, mədəniyyətinə hörməti təbliğ edir, digər tərəfdən isə öz ölkəsi daxilində regional dili qadağan edir. Şübhəsiz ki, bu, Fransa siyasi rəhbərliyinin riyakarlığını, digər xalqların mədəniyyətinə, dilinə sayığısızlığını göstərir. Bu özü özünü ifşa etmək deməkdir. Nəzərə alsaq ki, Fransa həmişə erməni millətçiliyini, Ermənistanın Azərbaycana qarşı işğalını dəstəkləyir. Nəzərə alsaq ki, Fransa son dövrlərdə Laçın yolunda baş verənlərə müdaxilə etməyə, özünü konfliktin bir tərəfi kimi aparmağa çalışır. Amma son hərəkətləri onu bir daha ifşa edir. Dünya bir daha Azərbaycan və Fransa nümunəsinin müqayisəsini görür və həqiqətin nə olduğunu özü üçün yəqin edir.
Bu gün Azərbaycan Prezident Administrasiyası Azərbaycanın Qarabağ bölgəsində yaşayan erməni icmasını danışıqlara, Bakıya görüşə dəvət etdi”.
A.Mirzəzadə hesab edir ki, bu fakt özü Azərbaycanın mövqeyini göstərir.
Qasım Hacıyev: “Fransanın bu hərəkəti korsikalıların dilinə qarşı soyqırım cinayətidir”
AMEA-nın Qafqazşünaslıq İnstititunun ermənişünaslıq şöbəsinin müdiri, professor Qasım Hacıyev də bizimlə söhbətində Fransanın riyakar olduğunu bildirdi və qeyd etdi ki, bu ölkənin siyasətində çox ciddi irticaçı məqamlar var. “Fransa özünü “mədəni ölkə” kimi təqdim etsə də, onun necə irticaçı, işğalçı, başqa xalqlara qarşı soyqırım törədən dövlət olduğu tarixindən bəllidir. Fransa neçə-neçə xalqın tarixinə qanlı səhifələr yazıb. Bu danılmaz faktlardır. Fransa həmişə başqa ölkələrin ərazisini işğal etməklə, xalqlara qarşı kütləvi qətliamlarla seçilib. Fransanın öz müstəmləkəsi olan ölkələrdə törətdiyi qətllər bəllidir. Fransa işğal etdiyi hər yerdə qan töküb. Korsika adası da Fransanın əlinə keçəndən sonra orada onun törətdiyi olaylar məlumdur. Korsikada neçə illərdir istədiyini edir və camaatı istismar edirlər. Hətta Fransanın korsikalılara qarşı mənfi, iryicaçı siyasəti ilə bağlı başqa ölkələrdə filmlər də çəkiblər. Fransanın korsikan dilini qadağan etməsi bütün beynəlxalq prinsiplərə ziddir. Bütün dünyaya demokratiya dərsi keçməyə çalışan Fransa bu gün öz daxilində yaşayan xalqın dilini qadağan edir, dilinə, mədəniyyətinə qarşı qəsbkarlıq nümayiş etdirir. Onun kimi daim işğalçılıq niyyətində olan və bu mənfur niyyəti həyata keçirmək istəyən dövlətlər o qədər də çoxdur. Fransanın Korsikada burada yaşayan xalqın ana dilini qadağan etməsinə dünya birliyi biganə qalmalı deyil, səslərini qaldırmalıdır. Bir ovuc erməninin təəssübünü çəkən Fransa Azərbaycanı etmədiyi əməldə ittiham edir, amma özü konkret olaraq başqa xalqın dilinə qarşı soyqırım törədir, dünya buna diqqət yetirməlidir. Fransanın bu hərəkəti korsikalıların dilinə qarşı soyqırım cinayətidir”-deyə Q.Hacıyev vurğuladı.
O qeyd etdi ki, Fransa bununla özünün bütün mahiyyətini ortaya qoyur.
İradə SARIYEVA
