Türkiyə müxalifəti ölkədə mayın 14-ü keçiriləcək prezident seçkilərinə vahid namizədini açıqlayıb. “Altılı masa”nın prezidentliyə namizədi CHP lideri Kamal Kılıçdaroğlu olub.
Bu barədə qərar bu günlərdə “altılı masa”nın keçirilən iclasında alınıb. İclasdan sonra Kılıçdaroğlu tərəfdarları qarşısında çıxış edib. Alınan qərara əsasən, Kılıçdaroğlu seçilərsə, Milli İttifaqda yer alan partiya sədrləri Prezident köməkçiləri təyin ediləcək.
Türkiyənin İYİ Partiyasının sədri Meral Akşener “altılı masa”ya geri dönüb.
Türkiyə mediası xəbər verir ki, bu barədə məlumatı partiyanın rəsmi sözçüsü Kürşad Zorlu açıqlayıb.
Xatırladaq ki, martın 2-si Türkiyədə müxalif partiya liderlərindən ibarət “altılı masa” mayın 14-ü keçiriləcək prezident seçkilərinə vahid namizədin müəyyən edilməsi ilə bağlı iclas keçirib. İclas zamanı danışıqlardan narazı qalan M.Akşener partiyasının “altılı masa”nı tərk etdiyini açıqlamışdı.
Qarşıdan gələn seçkilərdəki Ərdoğan-Kılıçdaroğlu dueli Türkiyənin gələcəyi üçün nə vəd edir?
Politoloq Qabil Hüseyinli “Bakı-Xəbər”ə açıqlamasında bildirdi ki, Kılınclaroğlunun uğur qazanacağına inanmır: “Kılınclaroğlu ümumiyyətlə indiyə kimi kiçik dövlət vəzifələrində çalışıb, sığorta müşaviri olub. Mənim zənnimcə, dövləti idarə işlərini o qədər də yaxşı mənimsəməyib, harizmatik adam deyil və əhali arasında da o qədər populyar sayılmır. İndi keçirilən rəy sorğuları da göstərir ki, Ərdoğan böyük üstünlüklə qələbə qazana bilər. Hətta birinci turda seçkinin taleyini öz xeyrinə həll edə bilər. Bunu rəy sorğuları ilə birlikdə, aparıcı qəzetlərin köşə yazılarının yazarlarının qeydlərində də görə bilərik. Hətta İngiltərənin nüfuzlu qəzetləri də Ərdoğanın öz rəqiblərini xeyli qabaqladığını qeyd edir. Bəziləri elə hesab edirdilər ki, zəlzələ məsələləri ilə cəmiyyətdə yaranan sarsıntı Ərdoğanın reytinqinə təsir göstərəcək. Amma belə olmadı. Əksinə, xilasetmə işlərinin sürətlə aparılması, insanların qısa müddətdə çadırlarda və yaxud ictimai yerlərdə yerləşdirilməsi, onlara hər ay bəlli məbləğdə dövlət vəsaitindən pul ayrılması və s. digər məsələlər sübut etdi ki, bu hakimiyyət, bu iqtidar daha səriştəlidir. Zəlzələ və onun doğurduğu sosial-iqtisadi nəticələri aradan qaldırmaq istiqamətində daha səylə çalışır. Eləcə də, qısa müddətdə həmin ərazilərdə yeni evlərin tikilməsi haqqında verilən qərar, onların eskizlərinin hazırlanması və bunun üçün büdcə vəsaitlərinin ayrılması təsdiq edir ki, uzağı bir, yaxud bir il yarıma Ərdoğan hakimiyyətdə qalarsa, Ərdoğan iqtidarı zəlzələnin bütün nəticələrini aradan qaldıra bilər və evi-eşiyi dağılmış bütün insanları evlə təmin edə bilər. Beləliklə, AKP iqtidarı insanlar arasında neqativ rəyi tezliklə aradan qaldırmağı bacardı və indi isə proseslər AKP və Ərdoğanın hərəkətləri istiqamətində gedir. Bu baxımdan da, Ərdoğanın daha bir dönəm də prezident olacağına şübhə qalmır”.
Türkiyənin Ədalət və İnkişaf Partiyası (AK Parti) da Kılıçdaroğlunun namizədliyinə münasibət bildirib.
AK Partiya Qrup sədr müavini və millət vəkili Bülent Turan Kılıçdaroğlunun namizədliyi ilə bağlı fikirlərini çatdırıb:
"Cənab Kamal Kılıçdaroğlunu namizədliyi münasibətilə təbrik edirəm, millət ən yaxşı hakimdir".
Məhəmmədəli QƏRİBLİ
