Türkiyədə siyasi gündən qaynayır. CHP, İYİ, Səadət, DEVA, Gələcək və Demokrat partiya liderlərinin seçki bloku olan "6-lı masa"nın uzun sürən iclası yekunlaşıb.
Səadət Partiyasının sədri Temel Karamollaoğlunun ev sahibliyi etdiyi toplantıdan yayılan ilk məlumata görə, "6-lı masa" yenə də prezidentliyə namizədini müəyyən edə bilməyib.
Bildirilib ki, partiya sədrləri martın 6-da yenidən toplanacaq: "Prezidentliyə namizəd həmin iclasın yekununda elan olunacaq"
Blokun namizədinin ya CHP lideri Kamal Kılıçdaroğlu, ya da Ankara bəılədiyyəsinin sədri Mansur Yavaş olacağı gözlənilir. Ancaq namizəd ola biləcək digər şəxslərin də adları çəkilir.
Yayılan digər məlumatlarda isə bildirilir ki, Türkiyədə müxalifət partiyalarının “6-lı masa”sı prezidentliyə vahid namizədi müəyyənləşdirib. Hətta bununla bağlı “6-lı masa”da iştirak edən siyasi partiyalar bəyanat imzalayıb. Partiya sədrlərinin imzaladığı sənəddə deyilir ki, “Millət İttifaqı”nda birləşən partiyalar prezident seçkilərində vahid namizədlə iştirak edəcək;
“Vahid namizəd və “yol xəritəsi” mövzusunda ortaq rəyə gəldik. Sədrlər partiya rəsmilərini məlumatlandırdıqdan sonra 6 mart tarixində vahid namizədin adı açıqlanacaq”.
Blokun müəyyənləşdirəcəyi namizədin kim olacağı gözlənilir?
Azərbaycanda fəaliyyət göstərən Cümhuriyyət Xalq Partiyasının sədri Bədrəddin Quliyev “Bakı-Xəbər”ə bildirdi ki, vahid namizədin üzərinə çox böyük məsuliyyət düşəcək: “Çünki yalnız prezident seçilməklə iş bitməyəcək. Ölkədə referendum keçirilməli və ciddi konstitusion islahatlar aparılmalıdır. Bunun üçün təmənnasız və nüfuzu böyük olan siyasi lider lazımdır. Bu, ağır siyasi yük olacaq. Çünki müxalifətin məqsədi ölkəni yenidən parlamentar sistemə keçirməkdir.
Bəzi adamların adı hallanır. Əsasən, İYİ Partiyanın sədri Merel Akşener Əkrəm İmamoğlunun namizədliyini dəstəkləyirdi. Qalan beş partiya isə Kamal Kılıcdaroğlunun namizəd olmasının tərəfdarıdır. Faktiki olaraq, Kılıçdaroğlu namizəd kimi təsdiqlənib. Sadəcə, onun rəsmi elan edilməsi qalır. Bunu da martın 6-da elan edəcəklər. Nə Əkrəm İmamoğlu, nə də Mansur Yavaş namizəd olmayacaq.
Artıq İstanbul Böyükşəhər Bələdiyyəsinin sədri Əkrəm İmamoğlu Türkiyədə keçirilməsi planlaşdırılan prezident seçkilərində namizəd olaraq adının hallanmasına münasibət bildirib.
İmamoğlunun sözlərinə görə, prezident seçkilərində namizəd olması məsələsi gündəmdə deyil. O deyib ki, hər CHP-linin namizədi partiya sədridir. Onun da namizədi partiya sədri Kamal Kılıçdaroğludur.
Düşünürəm ki, İmamoğlu tam kənarda qalmayacaq. Partiyanın sədri postuna onun adı hallanır. Ya Mənsur Yavaş, ya da İmamoğlu partiyanın gələcəkdəki seçki kampaniyalarına rəhbərlik edəcəklər. Bu, eyni zamanda Baş nazirliyə aparan yoldur. Düşünürəm ki, müxalifətin vahid namizədinin qalib gəlmək şansı çoxdur.Türkiyədəki ictimai rəy, zəlzələdən sonrakı gərginlik, ölkə iqtisadiyyatının real vəziyyəti müxalifətin qalib gəlmə şansını daha da artırır. Keçən seçkidə Ərdoğan 51 % səslə qalib gəlmişdi. Hazırda isə rəy sorğuları hakim partiyanın nüfuzunun 35% civarında olduğunu təsdiqləyir”.
Ancaq Türkiyənin özündəki bir çox analitiklər hesab edirlər ki, prezident seçkilərində partiyanın və həmin namizədə veriləcək kənar partiyaların dəstəyi ilə bərabər, eyni zamanda, həmin namizədin özünün fərdi keyfiyyətləri də önəm daşıyır. Seçici həm də namizədin şəxsiyyətinə səs verir. 20 ildən artıqdır hakimiyyətdə olan, Türkiyədə xeyli işlər görmüş və dünyada xarizmatik lider kimi qəbul edilən Ərdoğanın da imkanları kifayət qədər genişdir. Amma hazırda Türkiyədəki iqtisadi cəhətdən ciddi problemlər, inflyasiyanın yüksək olması, dağıdıcı zəlzələnin təsirləri seçkilərdə hiss oluna bilər. Yekin sözü Türkiyə vətəndaşları deyəcək.
Məhəmmədəli QƏRİBLİ
