Bir müddət əvvəl fars-molla hökuməti sözdə islam inqilabının 44 illiyi ilə bağlı əfv sərəncamı imzaladı. Teleqram kanallarında, sosial mediada siyasi məhbusların da müəyyən bir hissəsinin əfvə düşdüyü qeyd edildi. Amma diqqətdən qaçmayan bir məqam da xüsusi qabardıldı ki, əfv edilənlər əsasən fars millətindən olan siyasi məhbuslar olub.
Amma Güney azərbaycanlıların tələbinə baxmayaraq, Abbas Lisani və başqa azərbaycanlı siyasi məhbuslar əfvə salınmayıb. Güneyli fəallar deyirlər ki, molla rejimi siyasi məhbus məsələsində də ayrıseçkiliyə, riyakarlığa yol verib. Rejim əleyinə olan fars siyasi məhbusları azadlığa buraxır, amma türkləri və başqa qeyri-fars millətlərin nümayəndələrini türmədə saxlayır.
“Güney azərbaycanlı məşhur siyasi dustaq Abbas Lisaninin azad edilməməsi bunun ən bariz nümunələrindəndir”
Şovinist fars molla rejiminin bu addımını mənfi hal kimi qiymətləndirən AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi icmalçı Faiq Ələkbərli “Bakı-Xəbər”ə açıqlamasında bildirdi ki, rejimin bu ayrı-seçkilik addımı həm islam dini qaydalarına, həm beynəlxalq insan hüquq və azadlıqlarına, elə insanlığın özünə ziddir. “Şübhəsiz ki, Tehran rejiminin sözdə islam inqilabının 44 illiyi ilə bağlı verdiyi əfv birmənalı qarşılana bilməz. Əslində, molla-fars şovinist rejiminin bu əfvi müəyyən mənada siyasi diplomatik gedişlərə hesablanıb.
Burada fars kimlikli siyasi məhbuslar azad edilib. Tehran rejiminin bu əfvinin qeyri-fars siyasi məhbuslara şamil edilməməsi qətiyyən qəbuledilən hal deyil. Xüsusən də Azərbaycanın Güneyindən olub siyasi məhbus kimi həyatına davam edən minlərlə insanımız var. Onların bir çoxu İran adlanan ölkədə son aylar baş verən olaylardan öncə həbs edilib. Bizim kütləvi etirazlardan əvvəl həbs edilən siyasi məhbuslarımız var. Onların əksəriyyəti ana dili haqqını tələb etdiyi üçün həbs edilib. Soydaşlarımız Azərbaycan türkcəsinin dövlət dilinə çevrilməsi, eləcə də orta və ali məktəblərdə tədris edilməsi, mədəni haqlarının tanınması tələblərinə görə molla rejimi tərəfindən zindanlara atılıblar. Bu cür günahsız həbs edilən onlarla, yüzlərlə insanımız var. Molla fars rejimi son verdiyi əfv sərəncamını Azərbaycan türkü olan siyasi məhbuslara şamil etmədi və bununla da öz riyakarlığını göstərdi. Molla rejimi bir daha sübut etdi ki, onun yürütdüyü siyasət riyakarlıq, ikiüzlülük üzərində qurulub”.
F.Ələkbərlinin sözlərinə görə, bu da bir daha onu göstərir ki, fars molla rejimi qətiyyən islam adına uyğun hərəkət etmir. O vurğuladı ki, rejim bununla özlərinin yürütdüyü şiəlik məzhəbi xəttini və insan haqlarını tapdayıb. “Bir çox insanlarımız var ki, hələ də həbsdədirlər. Güney azərbaycanlı məşhur siyasi dustaq Abbas Lisaninin azad edilməməsi bunun ən bariz nümunələrindəndir. O günahsız yerə molla rejiminin həbsxanasındadır. Eyni zamanda, əlbəttə, bəluclardan, ərəblərdən və başqa xalqlardan olub siyasi məhbus həyatı yaşayanlar var ki, onlar da əvf edilmədi. Mənə elə gəlir ki, Azərbaycanın Güneyindən olan soydaşlarımız, ümumiyyətlə bu bölgədə yaşayan türklər bu məsələdən ciddi nəticə çıxarmalıdır. Yəni molla rejiminin bugünə qədər yürütdüyü riyakar siyasətə ciddi təpkilər verməlidirlər. Növbəti aksiyalar təşkil edilməlidir, bütün qeyri-fars xalqlar birgə bu rejimə qarşı mübarizə aparmalıdır. Çünki çox ciddi ayrıseçkilik siyasəti yürüdülür”.
F.Ələkbərli qeyd etdi ki, fars molla rejiminin dağılmasına işarələr var və mövcud şərait insanlardan bu prosesi daha da tezləşdirmək tələb edir. O qeyd etdi ki, bu gün bu rejimi ayaqda saxlayan iki əsas xalq varsa onlardan biri məhz Azərbaycan türkləridir. Bu baxımdan, Azərbaycan türklərinin bu məsələyə səssiz qalmayacanı deyən müsahibimiz vurğuladı ki, soydaşlarımız türk siyasi məhbusların əfv edilməsinə nail olmaq üçün öz sözlərini deyəcəklər. "Bununla bağlı müəyyən mesajlar, siqnallar almağa başlamışıq. Amma molla rejimi türklərə və başqa xalqlara münasibətdə geri addım atmaq istəmir”-deyə bildirən F.Ələkbərli qeyd etdi ki, Bütöv Azərbaycan Ocaqları olaraq bu mübarizənin əsl mahiyyətini, nəticəsini Azərbaycan türklərinin vahid şəkildə rejimə qarşı birləşib müqavimət göstərməsində görürlər. O vurğuladı ki, burada başqa qeyri-fars xalqları da rol oynaya bilər, amma bu mübarizənin özəyində Azərbaycan türkləri durarsa, daha ciddi dəyişikliklər olacaq. “Əfv məsələsində ikiüzlü davranan molla rejiminə ən layiqli cavabı Azərbaycan türkləri verəcək. Yeni bir mərhələdə də dəyişikliklər olacaqsa, burada da türklərin rolu olacaq”-deyə müsahibimiz bildirdi.
İradə SARIYEVA
