Rusiya prezidenti Vladimir Putin Federal Məclisə müraciətində bildirib ki, ABŞ nüvə sınaqları keçirsə, Rusiya da onları keçirəcək. Onun sözlərinə görə, qlobal paritetin məhv edilə biləcəyi ilə bağlı heç bir illüziya olmamalıdır.
Prezident əlavə edib ki, Müdafiə Nazirliyi və “Rosatom”, zərurət yaranarsa, nüvə sınaqları keçirməyə hazırlaşmalıdır:
“Lakin Rusiya onları ilk keçirən ölkə olmayacaq”.
Bundan əlavə, Putin Rusiyanın nüvə sazişində iştirakını dayandırdığını deyib və vurğulayıb ki, Moskva müqavilədən çıxmır, lakin iştirakı dayandırır.
Bununla bağlı o xatırladıb ki, fevralın əvvəlində NATO Rusiyadan hərbi obyektlərimizə yoxlamalara icazə verməklə, strateji silahlar üzrə müqavilələrin icrasına qayıtmağı tələb edən bəyanatla çıxış edib:
“İndiki qarşıdurma şəraitində bu, bir növ cəfəngiyat kimi səslənir. ABŞ və NATO birbaşa deyirlər ki, onların məqsədləri Rusiyanı strateji məğlubiyyətə uğratmaqdır”.
Proseslər nüvə müharibəsinə doğru gedirmi?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, Rusiya prezidenti Putinin fevralın 21 - də olan çıxışı təbliğat xarakterli idi: “Çıxışın əsas səbəbi isə Rusiya elitasını millətçilik uğrunda ayağa qaldırmaq, NATO - nun, Qərbin Rusiyaya qarşı müharibə apardığını aşılamaq və Rusiyanın təhlükəsizliyinə təhdid olduğunu, Rusiyanın yer üzərindən silinməsinə gətirib çıxaracaq müharibə apardığını bəyan etmək idi. Ona görə də, hazır olmaqları haqqında bəyanatla çıxış etdi. Öz çıxışında bildirdi ki, strateji hücum silahları ilə bağlı müqavilədəki iştirakını dayandırır. Rusiya Müdafiə Nazirliyinə nüvə silahlarının sınağının keçirilməsinə başlamaqla bağlı mesajını verdi. Doğrudan da bu, dünya liderlərini çox narahat etdi. Həmin çıxışdan bir neçə saat sonra NATO - nun baş katibi Moskvanın bu qərarına təəssüfləndiyini bildirdi. ABŞ prezidentinin təhlükəsizlik məsələləri üzrə məsləhətçisi Putinin bu qərararının dəyişəcəyinə inandığını və onun ordakı çıxışına cavab olaraq Rusiyanın müharibəyə başladığını bildirdi. Rusiya qoşunlarını Ukraynadan çıxaracaqsa, müharibə də bitəcək. Amma Putin öz çıxışında bildirdi ki, guya bütün Qərb Rusiyaya qarşı müharibə aparır. Lakin müharibə Ukrayna ərazisindədir və bu əraziyə də hamının bildiyi kimi rus qoşunları hücum edib. Yəni bunlar açıq-aşkar Putinin çıxışının birtərəfli olduğunu, bunun da dünya üçün təhdid olduğunu göstərir. NATO-nun baş katibi eyni zamanda bildirdi ki, əgər bizim hər hansı üzvümüz olan ölkənin birinə hücum olarsa, biz də adekvat cavab verəcəyik. Doğrudan da Putinin bu çıxışından sonra siyasi vəziyyət daha da gərginləşib. Polşada çıxış edən ABŞ prezidenti Co Bayden Kiyevdə səsləndirdiyi - "Biz sona kimi Ukraynanın yanındayıq, Ukraynanı silah-sürsatla təchiz edəcəyik, biz imkan verməyəcəyik ki, Rusiya Ukraynanı məğlub etsin" kimi bəyanatı bir daha səsləndirdi. Co Bayden həmçinin bildirdi ki, onlar rus xalqı ilə müharibə aparmır, bu, Putinin müharibəsidir, bunu da Putin dayandırmalıdır. Rusiyanın strateji hücum silahları ilə bağlı müqavilədən iştirakını dayandırmasına Avstriyanın Xarici İşlər Nazirliyi, Böyük Britaniyanın Baş Nazirinin konselyariyası, İtaliyanın baş naziri Meloni, Belçikanın Xarici İşlər Nazirliyi, Fransa dövləti təəssüfləndiklərini bildirdilər və Rusiyanı bu qərarını dəyişməyə çağırdılar. Strateji hücum silahlarının müqaviləsindən çıxmamağa dəvət etdilər. Əgər bu doğrudan da belə davam etsə, Rusiya nüvə silahları ilə silahlanmağa başlasa, eyni zamanda üçüncü dünya müharibəsi deməkdir. Mən güman edirəm ki, bu nüvə təhdidi ancaq sözdə qalacaq, əməldə həyata keçməyəcək. Çünki Rusiyanın da, Qərbin də ağıllı dövlət xadimləri var, onlar heç vaxt imkan verməz ki, bəşəriyyət məhv olsun”.
Məhəmmədəli QƏRİBLİ
