Amerika Birləşmiş Ştatlarının prezidenti Cozef Bayden fevralın 20-də Kiyevdə Ukrayna lideri Volodimir Zelenski ilə görüşüb. Xatırladaq ki, C.Bayden fevralın 20-də gözlənilmədən Ukraynaya səfər edib.
ABŞ Prezidenti Zelenski ilə birgə Kiyevdəki Mixaylovsk kilsəsinə baş çəkib və Ukraynanın müdafiəsi uğrunda həlak olanların xatirəsini yad edib. Həmin vaxt Kiyevdə hava həyəcanı siqnalları verilməyə başlayıb. Bunu Rusiya hərbi təyyarələrinin Belarus ərazisində, yaxud Rusiyanın Ukrayna ilə sərhəd zonalarında havaya qalxması ilə əlqələndirirlər.
Bu, Baydenin ABŞ prezidenti statusunda Ukraynaya ilk səfəridir və Ukrayna paytaxtının demək olar hər həftə raket zərbələrinə məruz qalması fonunda baş verir. Bayden bildirib ki, ABŞ Ukraynaya 500 milyon dollar məbləğində yardım paketi təqdim edəcək.
Ekspertlər hesab edir ki, bu səfər Ukrayna üçün böyük siyasi və mənəvi dəstək yükü daşıyacaq.
Baydenin bu səfəri müharibənin ömrünü uzadacaq, yoxsa tezliklə bitməsini təmin edəcək?
Demokratik Dəyişim Partiyasının (DDP) sədri Əli Mustafa “Bakı-Xəbər”ə bildirdi ki, Baydenin səfəri Ukraynaya kömək məqsədi güdür: “700-dən çox tank, 1000-dən çox texnika gətirdiyini də bəyan edir. Bu, olduqca böyük hərbi dəstəkdi. Müharibəni bitirməyə və Rusiyanı məğlub etməyə yönələn addımdır. ABŞ ilk dəfədir ki, belə açıq jest etdi. Düzdür, indiyə qədər də bunu edirdilər, ancaq örtülü şəkildə. İlk dəfədir ki, prezident səviyyəsində edilən hərbi yardımın həcmi ilə bağlı belə açıq məlumat verilir. Etiraf edək ki, edilən köməyin miqyası da olduqca çoxdur. Bu, Rusiya məsələsini çözmək anlamına gəlir. Düşünürəm ki, Baydenin ora gəlib-getməsi həm də Rusiya ilə razılaşdırılıb. Çünki bu müharibə həm də böyük bir oyunun tərkib hissəsidir. Böyük ehtimalla, Rusiya Baydenin səfəri dönəmində onun təhlükəsizliyinə zəmanət verib. Baydenin təyyarəsi ilk olaraq Vaşinqtondan ABŞ-ın Almaniyadakı aviabazasına gəlib, daha sonra isə buradan Polşaya uçub. ABŞ lideri buradan isə qatarla Kiyevə yollanıb. Təyyarədə prezidentlə yanaşı onun milli təhlükəsizlik məsələləri üzrə müşaviri Ceyk Sallivan və iki jurnalist olub.
Sallivanın sözlərinə görə, ABŞ Co Baydenin Kiyevə səfərindən bir neçə saat əvvəl Rusiyanı bu barədə məlumatlandırıb. Məqsəd isə hər hansı mübahisəli vəziyyətin yaranmasının qarşısını almaq olub. Burada başqa bir maraqlı məqam da var. Gələn il ABŞ-da seçkilərdi. Ola bilsin, Bayden həm də özü üçün bir seçki piarı aparır. Çünki Ukrayna mövzusuna ABŞ-ın daxili siyasətində ciddi önəm verilir. Bu ona kifayət qədər dividend gətirəcək bir addımdır. Həm də digər müttəfiqlərə mesajdır ki, Ukraynaya dəstək verməkdən çəkinməsinlər. Bu addım həm də yeni bir mərhələnin başlanğıcı sayıla bilər. Ola bilsin ki, bu dönəmdən sonra biz Ukraynanın daha ciddi uğurlarına şahidlik edəcəyik. Bütün hallarda, Rusiyanın tarixi sərhədlərinə çəkilməsinə çox vaxt qalmayıb”.
Məhəmmədəli QƏRİBLİ
