Molla rejiminin antitürk siyasəti özünü hər addımda göstərir. İstər daxildə, istər bölgədə, istərsə də dünyanın o başında, uzaq Çində mollakratiya türk xalqına qarşı nifrətini gizlətmir.
“Bir budaqda oturub yüz budağı silkələyən” Tehran rejimi uyğur türklərinə qarşı da əsassız ittihamlarda bulunub. Teleqram kanallarında yayılan məlumata görə, İranın rəhbəri Əli Xamneiyə birbaşa bağlı olan "Keyhan" qəzeti uyğur türklərini “terrorçu” adlandırıb.
İran prezidenti İbrahim Rəisinin Çinə səfəri zamanı uyğur müsəlmanlarına qarşı repressiyalara toxunmaması barədə tənqidlərə cavab olaraq “Keyhan” belə yazıb: “Onlar terror qrupudurlar və İngiltərə, Amerika, İsraillə əlaqəlidirlər”.
“Keyhan” qəzetinin baş redaktoru radikal mövqeyi ilə tanınan Hüseyn Şəriətmədari birbaşa Əli Xamneyinin göstərişi ilə vəzifəyə təyin edilib. Belə fikirlər də var.
Göründüyü kimi, Tehran rejiminin rəsmi qəzeti uyğur türklərini aşağılayıb.
Bu nə deməkdir? Bu nifrət hardan qaynaqlanır? Mollaların bu mövqeyini necə şərh edərdiniz?
“...Dövlət nəzarətində olan qəzetin götürüb Çinin ağzından uyğurları “terrorçu” elan etməsi, əlbəttə, təəssüf doğurur”
Siyasi şərhçi Azər Həsrət “Bakı-Xəbər”ə bildirdi ki, molla rejiminin nəzarətində olan rəsmi qəzetin uyğur türklərini “terrorçu” adlandırması yolverilməzdir. “Faktiki olaraq, İran dövlətinin uyğur türklərinə bu yanaşması çox təəssüf doğurur. Çünki özünü “müsəlman dövləti” adlandıran ölkənin rəhbərliyinin birbaşa nəzarətində olan media uzun illərdir Çinin zülmünə məruz qalan müsəlman uyğur türklərinə qarşı törətdiyi əməllərə bu cür reaksiya verməməli idi. Uyğurlar Doğu Türküstanda öz yurdlarındadırlar, onların terrorla, bölücülüklə heç bir işləri yoxdur. Uyğurlar sadəcə normal insan hüquqlarını tələb edirlər, bu da onların haqqıdır. Əlbəttə ki, bütün mütərəqqi bəşəriyyət onların arxasındadır. Özəlliklə də Qərb dövlətləri, türk dünyası onlara dəstək verir. Xatırlayırsınızsa, hətta keçən il Prezident İlham Əliyev Səmərqənddə keçirilən Türk Dövlətləri Təşkilatının zirvə görüşündə bu məsələyə diqqət çəkdi ki, türklər yalnız türk dövlətləri çərçivəsində deyil, ondan kənarda da müdafiə edilməlidir. Yəni bütün bunlar varkən İran İslam Respublikasının birbaşa dövlət nəzarətində olan qəzetinin götürüb Çinin ağzından uyğurları “terrorçu” elan etməsi, əlbəttə, təəssüf doğurur. Bununla bağlı biz konkret olaraq həyəcan təbili də çalmışıq. Şəxsən mən özüm Dünya Uyğur Qurultayının başqanı Dolkun İsa ilə əlaqə saxlamışam. Onun da mövqeyini öyrənmişik, o da təəssüfünü ifadə edib ki, həqiqətən bir müsəlman mediasının başqa bir ölkədəki müsəlmanlara bu cür haqsız yanaşması, onları “terrorçu” adlandırması şok effekti yaradır. Yəni həqiqətən də bu, Tehran rejiminin əsl simasının nədən ibarət olduğunu göstərir. İndi düşünürəm ki, istər türk dövlətləri, türk xalqları, istərsə də bütövlükdə müsəlman xalqları İranın bu əməlinə müvafiq reaksiya verməlidir. Biz bunu belə buraxa bilmərik. Özünə “islam dövləti” adı qoyan bir dövlət müsəlmanların yanında olmaq əvəzinə müsəlmanlara soyqırım tətbiq edənlərin yanında yer tutursa, əlbəttə, bunun cavabı verilməlidir”.
Qeyd edək ki, Dünya Uyğur Qurultayının başqanı Dolkun İsa “BAYRAQDAR MEDİA”ya verdiyi yazılı açıqlamada İran rejiminə bağlı medianın bu yanaşmasını sərt dildə tənqid edib: “Bir müsəlman mediasının başqa müsəlmanları sadəcə etnik və dini kimliyini əsas tutaraq terrorçu olmaqda ittiham etməsini eşitmək çox narahatedici bir durumdur. Bu, rasist və ayrıseçkiliyə dayanan Çinin rəsmi təbliğat uydurmasının təkrar edilməsidir. Çin hökumətinin gerçəkləşdirdiyi soyqırım xarakterli hüquq pozuntuları BMT və onun qurumları tərəfindən geniş şəkildə sənədləşdirilib. Bu qurumlar isə yalnız ABŞ, Böyük Britaniya və İsrail deyil, həm də başqa qlobal aktorlar tərəfindən idarə edilir”.
İradə SARIYEVA
