Türkiyədə 6 fevral zəlzələlərindən sonra yenidən iki güclü zəlzələ baş verib. AFAD fevralın 20-də saat 21:04-də baş verən 6,4 bal gücündə birinci zəlzələnin episentrinin Hatayın Defne mahalı olduğunu açıqlayıb.
Bu zəlzələdən təxminən 3 dəqiqə sonra 5,8 bal gücündə ikinci zəlzələ bu dəfə Hatayın Samandağ bölgəsində baş verib.
Dəfnə rayonunda zəlzələ 16,74 kilometr dərinlikdə, Samandağ mərkəzli zəlzələ isə 7 kilometr dərinlikdə baş verib.
Zəlzələ Qaziantep, Adana, Şanlıurfa, Malatya, Kilis və Mardində də hiss edilib. Hataydakı zəlzələlər Yaxın Şərq və Şimali Afrika ölkələrində də hiss olunub.
Zəlzələdən sonra AFAD dəniz səviyyəsinin qalxa biləcəyini bildirərək, sahil zolağından uzaq durmağa çağırıb: "Dəniz səviyyəsinin 50 sm-ə qədər qalxma risqinə qarşı vətəndaşlarımızı sahil zolağından uzaq durmağa çağırırıq ".
Sonradan Prezidentin köməkçisi Fuad Oktay Hatayda baş verən 6,4 və 5,8 bal gücündə zəlzələlərlə bağlı açıqlama verib. F.Oktay ərazidən 28 çağırış olduğunu, 8 yaralının xəstəxanalara yerləşdirildiyini deyib. F.Oktay dəniz səviyyəsinin yüksəlməsi xəbərdarlığının da ləğv edildiyini bildirib: “Suyun qalxması xəbərdarlığı 2 saat qüvvədə idi, artıq risq yoxdur. Karaçay su anbarında da risk yoxdur”.
Vətəndaşlara çağırış edilib ki, qəzalı binalara girməsinlər, risqli tikililərdən uzaq olsunlar.
15 gündür zəlzələ fırtınasının yaşandığı bölgədə son təkanlardan sonra mütəxəsislər ərazidə araşdırmalara başlayıb. Əvvəlki zəlzələlərdə ağır ziyan dəymiş bəzi binaların çükdüyü barədə xəbərlər yayılıb, hökumət vətəndaşlara binalardan uzaq durmaları ilə bağlı xəbərdarlıq edib. Mütəxəssislər əvvəlki zəlzələlərin son iki zəlzələni tətiklədiyini bildiriblər. Bölgədə zəlzələlərin davam edəcəyi barədə də xəbərdarlıq edilib.
CNN TÜRK müxbiri Buse Deviren zəlzələni göz yaşları içidə zəlzələ olduğunu deyib: “Biz çadır şəhərciyində idik. Buradakı insanlar da çox qorxdular. Torpaq ayağımızın altından qaçdı. İnanılmaz dərəcədə sarsıldıq. Hamı çadırlarından çölə qaçdı. Sobalar aşdı. Çox güclü, çox sarsıdıcı zəlzələ idi”.
Kanal D müxbiri İhsan Yalçın isə Hatayda baş verən zəlzələnin Qaziantepdə də hiss olunduğunu və olduqları yerdə bir binanın dağıldığını deyib.
Hatay Böyükşəhər Bələdiyyə Başçısı Lütfü Savaş zəlzələ nəticəsində dağılan binaların və dağıntılar altında qalanların olduğunu bildirib.
Zəlzələ Suriyanın müxtəlif bölgələrində də hiss olunub. Xüsusilə İdlib, Hələb, Həma, Afrin, Azez, Cerablus, Bab və Tel Abyad yaşayış məntəqələrində hiss olunub.
Daxili işlər naziri Soylu Hatay mərkəzli zəlzələdə indiyədək 3 nəfərin həyatını itirdiyini, 213 nəfərin isə xəstəxanalara yerləşdirildiyini açıqlayıb.
TAHİR
