Tehran rejimi yalnız soydaşlarımıza qarşı deyil, orada yaşayan digər xalqlara qarşı da amansız davranır, repressiyalar həyata keçirir. Bu gün İran adlanan ölkənin “xalqlar həbsxanası” adlandırılması təsadüfi deyil, çünki orada insanlar həm fiziki, həm də mənəvi olaraq həbsxanadadırlar.
Öz milli hüquqları olmayan, hər addımbaşı haqları tapdalanan xalqlar molla rejiminə qarşı dirəniş göstərirlər, onun yanlış, eyni zamanda da faşist siyasətinə etiraz edirlər. Molla rejimi artıq neçə illərdir ki, daxildə digər təriqətlərə qarşı nifrət siyasəti yürüdür. Nəticədə isə ölkənin sünni kəsimi də böyük ziyan çəkir.
Son dövrlər mətbuatda, sosial mediada molla rejiminin sünni din xadimlərinə qarşı da repressiya törətdiyi, qətlə yetirdiyi, həbs etdirdiyi barədə məlumatlar yayılır. Onu da deyək ki, sünni din xadimlərinin əksəriyyəti molla rejiminin amansız repressiyasına qarşı çıxır.
Hətta bir çoxu insanlara ciddi dəstək də nümayiş etdirib.
Azad İran yazır ki, Sistan və Bəlucistan əyalətinin mərkəzi Zahidan şəhərində Rza Rəxşani və Əbdülrəuf adlı bəluc din xadimləri təhlükəsizlik qüvvələri tərəfindən həbs olunaraq naməlum yerə aparılılıblar.
Orada bu kimi halların tez-tez baş verdiyini deyən ekspertlər isə qeyd edirlər ki, molla rejimi başdan təriqət ayrıseçkiliyi yaradıb, bu da onun davamıdır.
“...Sünni müsəlmanlara qarşı daim repressiyalar baş verir və onları “vəhabi” adı ilə şərləyib asırlar”
Milli Cəbhə Partiyasının (MCP) sədr müavini, tanınmış ilhaiyyatçı Tural İrfan “Bakı-Xəbər”ə şərhində bildirdi ki, İran rejimi məzhəbçi bir ideologiya üzərində qurulub. İslam dininin əsas iki qola - sünni və şiə qollarına ayrıldığını deyən T.İrfanın fikrincə, İran rejimini ABŞ, Fransa və başqa Qərb ölkələri qurub və həmin dövrdə götürülən ideoloji xətlərdən biri sünni dünyasına qarşı mübarizədə olmaq olub. “Hətta o vaxt Xomeyni gəlib yerində tam bərqərar olmamış o dövrdə rəsmən İraqa müharibə elan etdi və 8 il müharibə apardı. Bir milyon müsəlmanın qanını tökdü. Öldürülənlərin 800 min nəfəri də şiə əqidəli müsəlmanlar idi. Çünki İraq əhalisinin 60 faizi, İran əhalisinin isə 86 faizi şiədir. Ona görə Xomeyni nəinki sünnilərin, hətta şiələrin də qətlinə fərman verdi. Dəfələrlə Səddam Hüseyn sülh təklif etsə də, Xomeyni qəbul etmədi. Axırda da müəyyən müsəlman dövlətlərinin təzyiqi ilə sülhə getdi və bu, zəhər içmək kimi qiymətləndirildi. Təsəvvür edin ki, bu insan müsəlman qanının tökülməsinin dayandırılmasını “zəhər içmək” adlandırdı. Bu addımı məcburən atmışdı. O zaman onlar “şiə hilalı” deyilən zahiri bir xəritə cızıblar, Yəmən, Suriya, Livan, Azərbaycan, İran, İraq, Səudiyyənin bir hissəsi də daxil olmaqla guya şiə dövləti yaratsınlar. Məqsədləri bu olub. Bunun alt qatında gizlənən mətləb isə odur ki, molla rejimi Sasani imperiyasını yenidən dirçəltsin. Məsələ bundan ibarətdir.
Ona görə də, molla rejiminin birinci düşmənçiliyi sünni müsəlmanalara qarşıdır. Dünyada müsəlman sünnilər çoxluq təşkil edir, bir neçə sünni dövləti var - Pakistan, Əfqanıstan, Səudiyyə Ərəbistanı, İndoneziya və sair. Tehran rejimi daxildəki sünnilərdən möhkəm qorxur.
Görürsüz ki, ermənilərin xristian, qriqoryan olmasına baxmayaraq, rejim onlara nə qədər böyük imtiyazlar verir, bu kəsimə heç “gözün üstə qaşın var” deyən yoxdur. Həmçinin də başqalarına bir söz deyən yoxdur. Amma sünni müsəlmanlara qarşı daim repressiyalar baş verir və onları “vəhabi” adı ilə şərləyib asırlar. Çünki onları edam etmək üçün başqa yolları yoxdur. Vəhabilik də sünnilikdən ayrılan qol olduğu üçün bir az uyğun, inandırıcı gəlir deyə, düzüb-qoşurlar ki, bunlar “vəhabidir”, onların edamına hökm verirlər. Molla rejiminin narahatlığı ondan ibarətdir ki, sünni dövlətlərinin dəstəyi ilə daxildəki sünni müsəlmanlar baş qaldıra, bunların rejiminə xələl gələ bilər. İran rejimində üzdə şiəlik olsa da, amma alt qatında şiəlik deyil, şuibiyyə deyilən, fars millətçiliyinə əsaslanan ideologiyadır, bu da Sasani imperiyasını bərpa etməyə hesablanıb ki, bunlar Qüdsü də İsraildən ona görə tələb edirlər. Baxmayaraq ki, Fələstin müsəlmanları sünnidir. Amma Azərbaycan müsəlmanları şiə olduğu halda İran erməninin tərəfini tutdu.
Sual yaranır ki, bu niyə belədir? Məsələ ondan ibarətdir ki, Vatikanla İranın sıx əlaqələri var. Ümumiyyətlə, bu dövlətlərin içində səlibçi təəssübkeşi xristian qüvvələr də var. Həmin dövlətlərdən biri də Fransadır. O istəyir ki, təəssübkeş xristianlığı bərpa etsin. Quranın yandırılması, islam dininə təhqirlər də həmişə Fransadan qaynaqlanıb. Ona görə də Fransa xristian aləminin din, səlib ideologiyası baxımından öndərlərindən biridir. Xomeyninin də Fransadan gəlməsi buna əsaslanır. Həmçinin ABŞ-da da bu cür güclər var. Məqsəd islam dinini məhv edərək yenidən xristian səlib yürüşlərini bərpa etməkdir. Bilirsiz ki, Qüds xristianların da, müsəlmanların da əlində olub, tarixən əldən-ələ keçib. İranın İsrailə qarşı düşmənçiliyinin hədəfində dayanan da budur ki, yəhidilərin əlindən Qüdsü alaraq xristianlara, səlbçilərə təhvil versinlər. Bunların alt qatdakı ideologiyası budur. Bunun qarşılığında da bazarlıq edərək Sasani impersiyasının bərpa olunmasına xristian dünyasından dəstək almaqdır. İranın Ermənistanı dəstəkləməsinin də alt qatında bu dayanır”.
“O zaman Xomeyninin “imamların qəbri ordadır, onu sünnilərdən almaq lazımdır” - deyib İraqla müharibə aparması da, başqa faktlar da göstərir ki, molla rejiminin sünnilərə qarşı repressiyası yeni deyil” - deyən T.İrfan qeyd etdi ki, bu ideologiya əsrlərdir ki, davam edir...
T.İrfan qeyd etdi ki, molla rejimi bununla islam aləminə münasibətini göstərir və öz iç üzünü, mahiyyətini açır...
Leyla QARAXANLI
