Fevralın 6-da qardaş Türkiyə iki böyük zəlzələ ilə sarsıldı. Saat 05:17-də episentri Kahramanmaraşın Pazarcık rayonunda olan 7,7 bal gücündə zəlzələ baş verdi. Saat 14.24-də yenə episentri Kahramanmaraşın Elbistan rayonu olan 7,6 bal gücündə ikinci zəlzələ baş verib.
Kahramanmaraşda 7,7 və 7,6 bal gücündə iki güclü zəlzələ Hatay, Qaziantep, Malatya, Osmaniyə, Adıyaman, Adana, Diyarbəkir, Kilis və Şanlıurfa başda olmaqla bir çox şəhərdə də hiss olunub. Şəhər və kəndlərdə ciddi dağıntılara səbəb olan iki zəlzələ nəticəsində çox sayda insan həyatını itirib.
Dağıntılar altında qalanların xilası üçün dərhal səfərbər olan Türkiyəyə yüzə yaxın ölkədən gəlmiş xilasedicilər arasında ən böyük xilasedicilər qrupu ilə Azərbaycan da dəstək verir və hazırda da fəlakət bölgəsində axtarış xilasetmə əməliyyatları davam edir.
Prezident Ərdoğanın açıqladığı son rəqəmlərə görə, Kahramanmaraş mərkəzli zəlzələlərdə 35 min 418 nəfər həyatını itirib, 105 505 nəfər xəsarət alıb.
Ümumiyyətlə Türkiyə seysmik cəhətdən aktiv ölkələrdən biri sayılır. Ölkədə bu günə qədər çoxlu sayda irili-xırdalı zəlzələlər baş verib. Türkiyədə bu günə qədər məlum olan ən şiddətli zəlzələ 26 dekabr 1939-cu ildə Ərzincanda 7,9 bal gücündə baş verib. 52 saniyə davam edən zəlzələdə 32.962 nəfər həyatını itirib, 100.000-ə yaxın insan isə yaralanıb. Dünyanın və Türkiyənin ən böyük zəlzələlərindən sayılan bu zəlzələdə 116.720 bina dağılıb.
1900-cü ildən bu yana Türkiyədə müxtəlif vaxtlarda 6 və daha yuxarı bal gücündə 226 zəlzələ baş verib. Bu zəlzələlərdən 85-nin 6,5 bal və yuxarı olduğu qeydə alınıb.
17 avqust 1999-cu ildə Kocaelinin Gölcük rayonunda baş verən və İstanbul başda olmaqla bir çox şəhərdə hiss edilən 7,4 bal gücündə zəlzələdə 17 min 840 nəfər həyatını itirib, 43 min 953 nəfər isə yaralanıb.
12 noyabr 1999-cu ildə Düzcedə baş verən 7,2 bal gücündə zəlzələdə 894 nəfər həyatını itirib, 2 min 679 nəfər yaralanıb.
23 oktyabr 2011-ci ildə Vanda baş verən 7,2 bal gücündə zəlzələdə 601 nəfər həyatını itirib.
24 yanvar 2020-ci ildə Elazığda baş verən 6,8 bal gücündə zəlzələdə 44 nəfər həyatını itirib.
30 oktyabr 2020-ci ildə İzmirdə baş verən 6,6 bal gücündə zəlzələdə 117 nəfər həyatını itirib, 1034 nəfər yaralanıb.
Bununla da Kahramanmaraşda baş verən 7,7 və 7,6 bal gücündə zəlzələlərdə həyatını itirənlərin sayı 35 mini keçərək qardaş ölkə tarixində ən çox itkilərin yaşandığı zəlzələ oldu.
Tahir TAĞIYEV
