ABŞ-ın Rusiyadakı yeni səfiri Linn Treysi xarici işlər nazirinin müavini Sergey Ryabkova etimadnaməsinin surətini təqdim edib.
Bildirilib ki, Rusiya Federasiyası yeni səfirdən öz fəaliyyətində Rusiya qanunlarına ciddi riayət etməyi və daxili işlərə qarışmamağı gözləyir. Ryabkovla görüş zamanı Vaşinqtonun ciddi mənfi nəticələrlə dolu olan qarşıdurma kursunun əks-məhsuldarlığı yeni səfirin diqqətinə çatdırılıb. Çox maraqlıdır ki, o, Rusiyaya səfir təyin olunandan qısa bir müddət sonra Moskva ona ölkənin daxili işinə qarışmamaqla bağlı xəbərdarlıq edib.
Qeyd edək ki, Treysi ABŞ-ın Rusiyadakı səfiri vəzifəsində çalışan ilk qadındır. O, sırf diplomat karyerasına malik olan bir şəxsdir. 1986-cı ildə Corciya Universitetinin sovetşünaslıq fakültəsini bakalavr dərəcəsi ilə bitirib. L.Treysi diplomatik fəaliyyətlə 1987-ci ildən məşğuldur. Maraqlıdır ki, onun diplomatik fəaliyyəti əsasən keçmiş SSRİ və daha sonra MDB ölkələri ilə bağlı olub. Belə ki, Treysi 1987-1990-cı illərdə Moskvada yaşayıb və ABŞ səfirliyində işləyib. 1994-cü ildə o, ABŞ Dövlət Departamentində işə başlayıb. ABŞ-ın Türkmənistandakı səfirliyində siyasi məsələlər üzrə katib vəzifəsində çalışıb. 1995-1997-ci illərdə Pakistanın Pişəvər şəhərində ABŞ-ın Baş Konsulluğunda eyni vəzifədə çalışıb. 1997-2000-ci illərdə ABŞ-ın Qırğızıstandakı səfirliyinin Konsulluq şöbəsinin əməkdaşı olub. 2000-ci ildə o, ABŞ-a qayıdıb və Dövlət Departamentində yeni müstəqil dövlətlər üzrə xüsusi elçinin köməkçisi vəzifəsini tutub. 2001-2002-ci illərdə Avropa və Avrasiya Məsələləri Bürosunda (EUR) Gürcüstan, 2003-2004-cü illərdə Qazaxıstan üzrə koordinator vəzifəsində çalışıb. Eyni zamanda, 2002-2003-cü illərdə ABŞ-ın Əfqanıstandakı səfirliyinin siyasi şöbəsində çalışıb. 2004-2006-cı illərdə ABŞ-ın Qazaxıstandakı səfirliyində işləyib. 2006-2009-cu illərdə Pakistanın Pişəvər şəhərində ABŞ-ın baş konsulu olub. 2010-2011-ci illərdə ABŞ-ın Türkmənistandakı səfirinin müavini olub. 2011-ci ildə o, ABŞ-a qayıdıb və Milli Təhlükəsizlik Şurasında Mərkəzi Asiya üzrə direktor vəzifəsini icra etməyə başlayıb. 2012-2014-cü illərdə dövlət katibinin Cənubi və Mərkəzi Asiya məsələləri üzrə köməkçisinin müavini, 2014-2017-ci illərdə isə ABŞ-ın Rusiyadakı səfirinin müavini vəzifələrində çalışıb. Sonra Avropa və Avrasiya İşləri Bürosunda (EUR) Rusiya işləri üzrə baş məsləhətçi vəzifəsində çalışıb.
28 sentyabr 2018-ci ildə ABŞ prezidenti Donald Tramp Treysinin Birləşmiş Ştatların Ermənistandakı səfiri vəzifəsinə namizədliyini irəli sürüb. 2 yanvar 2019-cu ildə onun namizədliyi ABŞ Senatı tərəfindən təsdiqlənib. 2019-cu il fevralın 19-da o, 2023-cü ilin yanvarına qədər ABŞ-ın Ermənistandakı fövqəladə və səlahiyyətli səfiri olub.
Ötən il noyabrın sonunda ABŞ Konqresi Senatının Xarici Əlaqələr Komitəsində namizədliyinin təsdiqinə həsr olunmuş dinləmələrdə diplomat Vaşinqtonun Moskvaya qarşı sanksiya kursu ilə razılaşdığını və bunun sərtləşdirilməsini dəstəklədiyini bildirib. Bununla yanaşı, Treysi Rusiya Federasiyasında həbsdə olan amerikalıların azadlığa buraxılmasını prioritet hesab edəcəyini qeyd edib.
Vidadi ORDAHALLI
