ABŞ-ın baş prokuroru Merrik Qarland Tehranın aparıcı tənqidçilərindən biri olan amerikalı jurnalistə qarşı İranın arxasında olduğu qətl planı ilə bağlı ən azı üç nəfərin ittiham olunduğunu açıqlayıb.
Hadisədə təqsirləndirilən 3 nəfərin məhkəmə qarşısına çıxarılacağını bildirən Qarland, bu ittihamların İran hökumətinin, İran əsilli ABŞ vətəndaşı olan jurnalist, yazar və insan haqları müdafiəçisinə qarşı ABŞ torpaqlarında sui-qəsd cəhdləri ilə bağlı davam edən istintaqdan qaynaqlandığını deyib.
Qarland ittiham aktında sui-qəsd planını təfərrüatlarını açıqlayaraq deyib ki, İran rejimi Şərqi Avropada cinayət təşkilatının üzvü olan və İranla əlaqəsi olduğu iddia edilən Rafət Əmirovu qətllə bağlı görəvləndirib, Əmirov isə Polad Omarov və Xalid Mehdiyevə cinayəti həyata keçirməyi tapşırıb. Mehdiyevin 2022-ci ilin iyulunda sözügedən jurnalistin Nyu-Yorkdakı evinin yaxınlığında hücum silahı və sursatla tutulduğu barədə məlumatı paylaşan Qarland Omarovun da ABŞ-a ekstradisiya edilmək üçün “xarici tərəfdaşların” nəzarətində olduğunu qeyd edib.
FTB direktoru Kristofer Rey isə, yalnız son bir neçə ildə İranla əlaqəli insanların ABŞ-da bir uşaq xəstəxanasına fidyə proqramı hücumu həyata keçirdiyini, ABŞ-ın keçmiş milli təhlükəsizlik müşaviri Mayk Pompeoya ABŞ ərazisində sui-qəsdə cəhd etdiyini və indi də ABŞ vətəndaşı olan jurnalistə qarşı cinayət planı hazırladığını bildirib.
"Əgər bu, İrandan gələn təhlükənin Amerikadakı amerikalılar üçün nə qədər ciddi olduğunu göstərmirsə, başqa nə ola bilər mən bilmirəm", - Ray deyib.
ABŞ-ın Milli Təhlükəsizlik müşaviri Sullivan isə mövzu ilə bağlı verdiyi yazılı açıqlamada Ədliyyə Nazirliyinin ittihamnaməsini İran hökumətinin dəstəklədiyi dünyanın hər yerində iranlıların əsas hüquq və azadlıqlarını müdafiə edən fəalları öldürmək, işgəncə vermək və qorxutmaq cəhdlərinin narahat edici bir modeli adlandırıb.
“Şübhə yoxdur ki, Birləşmiş Ştatlar İranın və ya digər avtoritar rejimlərin ölkəmizdə qanuni yaşayanlara qarşı təhdid və hədə-qorxu ilə dinc müxalifəti susdurmaq səylərini ixrac etməyə imkan verməyəcək”, - deyə Sullivan bildirib.
Qarland və Sullivan açıqlamalarında hədəfə alınan şəxsin adını çəkməsələr də, sözügedən jurnalistin 2021-ci ildə İran kəşfiyyatçıları tərəfindən qaçırılmaq istəndiyi iddia edilən Məsih Əlinejad olduğu güman edilir.
Əlinejad Twitter-də paylaşdığı videoda kirayəlik bir qətl planının qurbanı olduğunu etiraf edərək, həmin gün hadisə ilə bağlı 12 FTB agenti ilə görüşdüyünü və 3 nəfərin saxlandığını deyib.
"Açığı, mən həyatım üçün qorxmuram, çünki bilirəm ki, öldürmək, asmaq, işgəncə vermək, zorlama İranın DNT-sində var", - Əlinejad deyib.
Qeyd edək ki, ABŞ-ın Nyu-York şəhərində yaşayan İran əsilli amerikalı jurnalist Məsih Əlinejadın 2021-ci il iyulun 15-də İran kəşfiyyatçıları tərəfindən qaçırılmaq istədiyi iddia edilib.
Nyu York Federal Məhkəməsi tərəfindən açıqlanan iddianamədə 4 iranlının Əlinejadı qaçırmaq planlarında ittiham olunduğu, şübhəlilərin Əlinejadı İrana keçirmək üçün Bruklin sahilindəki bir məhəllədən onu hərbi tipli sürətli qayıqla Venesuelaya aparmaq istədikləri bildirilib.
Tahir TAĞIYEV
