İsveçdə İslamın müqəddəs kitabı Qurani-Kərimin Türkiyə səfirliyinin önündə yandırılması qalmaqalından sonra daha bir hadisə yaşanıb.
Hollandiyada İslam əleyhdarı, "Pegia" qrupunun lideri Edvin Vagensveld Quranı əvvəl ayaqlayıb, daha sonra bir-bir vərəqlərini cıraraq yandırmağa başlayıb. Hadisə zamanı təhlükəsizlik tədbirləri alan polisin baş verənlərə müdaxilə etməməsi bütün dünyada təəssüf hissi yaradıb.
Görüntülərdə "Pegia" qrupunun lideri Quranı yırtdıqdan sonra qazana qoyaraq yandırmağa başlayır. Ən təsirlisi ətrafdakıların ona müdaxilə etməməsi olub.
İsveçrənin sağ təmayüllü partiyalarından birinin sədrinin Türkiyə səfirliyinin qarşısında Quranı yandırnasından sonra Hollandiyada da bənzər hadisənin baş verməsi müsəlman aləmində ciddi etirazla qarşılandı. Təsadüfi prosesə oxşamır. Hədəf nə ola bilər və Qurana etiraz niyə hansısa islam təmayüllü ölkənin deyil, məhz Türkiyənin səfirliyi qarşısında edilir? Bu, Türkiyəni provokasiyaya çəkməyə yönəlik addım ola bilərmi?
İlahiyyatçı Tural İrfan “Bakı-Xəbər”ə bildirdi ki, bu, Türkiyəni təxribata, provokisayaya çəkmək üçündür: “Quranın yandırılması məsələləri Hollandiyada, Danimarkada, İsveçdə və müxtəlif ölkələrdə bu müddətdə baş verib. Biz bilirik ki, Fransada Peyğəmbərin karikaturasının çəkilməsi məsələsi də müzakirələrə səbəb olmuşdu. Dünyada islamın təəssübünü çəkən Türkiyədir. Bunu bütün Ərəb dünyası, müsəlman ölkələri etiraf edir. Bu, Osmanlı vaxtında da belə olub. Ona görə də, Qərb çox gözəl bilir ki, Quranın da təəssübünü çəkən Türkiyədir. Təbiidir ki, Türkiyəni təxribata çəkmək istəyirlər. Həmçinin Türkiyənin hədsiz dərəcədə inkişaf etməsi və Avropa ölkələrinin, hətta Amerikanın da məcbur olub Türkiyə ilə hesablaşması xristian dünyasını, Qərb dünyasını çox narahat edir. Ona görə də Quranın yandırılması İslama qarşı olmaqdan çox, Türkiyəyə qarşı atılan bir addımdır. Və təbiidir, təxribata çəkirlər ki, hansısa bir türk getsin həmin şəxsə xəsarət yetirsin, yaxud qarşılıqlı addım ataraq onlar da İncili yandırsınlar. Bütün bu olanlar bu məqsədi daşıyır. Çünki həmin ölkədə eyni zamanda Ərdoğanın şəklini, Türkiyənin bayrağını da yerə qoyub üstündən ayaqlayıb keçirdilər. Sübut olunur ki, bu, Türkiyəyə qarşı yönəldilmiş bir məsələdir. Ona görə də mən hesab edirəm ki, Qərb dünyası tolerantlıq, demokratiya dərsi keçməkdə səmimidirsə, ilk öncə Qərb dairələri, Avropa ölkələrinin rəhbərlikləri bu məsələyə etiraz etsin. Quranı yandırmaq şəxsi təşəbbüsdürsə, bunun arxasında Avropa dövlətləri, böyük güclər durmursa, onlar etiraz etsinlər. Həmçinin xristian din adamları səslərini çıxarsınlar ki, bu, şəxsin öz yanaşamasıdır, biz bunu tənqid edirik, düzgün əməl deyil. Lakin buna etiraz olunmursa, şərait yaradılırsa, artıq burda konkret, açıq-aydın bilinir ki, bunu məhz Qərb dövlətlərinin, həmin hadisənin baş verdiyi dövlətin rəhbərləri birmənalı şəkildə hayata keçiriblər. Amma düşünürəm ki, bunun fəsadları çox ola bilər. Baxmayaraq ki, əvvəllər də bu cür hadisələr çox baş verib, artıq bir ənənəvi hal alması həm də cəmiyyəti buna öyrəşdirmə halına çevirə bilər, adiləşə bilər, başqaları da bu işi görə bilər. Bu da nəticədə böyük iğtişaşlara, qarşıdurmalara gətirib çıxarar. Qərb ölkələrinin özündə müsəlman-xristian qarşıdurmasına, terror hadisələrinə kimi gətirib çıxara bilər. Ona görə də bunun qarşısı birmənalı şəkildə alınmalıdır. İslam dövlətləri başda olmaqla müsəlman ölkələri, yaxşı olar ki, bu məsələyə kəskin etiraz etsinlər. Ölkələrdə mitinqlər təşkil olunsun, etiraz dalğaları yayılsın. Həmçinin Qurani-kərimin yandırıldığı ölkələrin idarəçiliyinə nota da verilməlidir. Çünki birbaşa müsəlmanların hissiyatına toxunulur, baxmayaraq ki, hədəf Türkiyədir. O baxımdan lazımdır ki, xristian və müsəlman din xadimləri bu məsələyə sərt etirazlarını bildirsinlər”.
Məhəmmədəli QƏRİBLİ
