Gürcüstanın eks-prezidenti Mixeil Saakaşvili feysbuk səhifəsində ölkəsində olduğunu təsdiq edən video paylaşıb. Videoda Batumi şəhəri əks olunub. “Bu, mənim Batumimdir... Həyatımla risk edib buraya gəldim”, - o yazıb.
M.Saakaşvili hamını sabah keçiriləcək yerli seçkilərdə iştiraka, oktyabrın 3-də isə mitinqə çağırıb.
Saakaşvili deyib ki, oktyabrın 3-də tərəfdaşları ilə birgə Tbilisiyə yollanmaq niyyətindədir. O, bildirib ki, Tbilisidə seçkilərin nəticələrini müdafiə edəcək: “Oktyabrın 3-də səhər bütün Gürcüstandan Tbilisiyə gedəcəyik. Mən avtomobil karvanının birinə qoşulacam. Xahişim budur - bu cür karvanlar çoxsaylı olsun ki, məni saxlaya bilməsinlər”.
Video yayıldıqdan qısa müddət sonra Gürcüstan Daxili İşlər Nazirliyi açıqlama yayaraq Saakaşvilinin dövlət sərhədini keçmədiyini bildirib.
Sabiq prezidentin partiyası olan müxalif Vahid Milli Hərəkat Partiyasının (VMHP) liderlərindən biri Zaal Udumaşvili isə deyib ki, Saakaşvili Gürcüstandadır: "Mixeil Saakaşvilinin Gürcüstana necə və nə vaxt gəlməsi önəmli deyil. Ən əsası odur ki, o, Gürcüstandadır".
Daxili İşlər Nazirliyinin sabiq prezidentin Gürcüstan sərhədini keçməməsi barədə məlumatına gəlincə o deyib ki, “mən Daxili İşlər Nazirliyindən daha çox Mixeil Saakaşviliyə inanıram".
Sabiq prezidentin "Vahid milli hərakat" partiyasındakı digər silahdaşları, eləcə də Ukrayna ofisi də Saakaşvilinin qayıdış faktını təsdiqləyib. Ukrayna ofisinin rəhbəri Mariya Barabaş bəyan edib ki, o, ötən gecə Kiyevi tərk edib.
"Üç gün əvvəl öz komandasını toplayaraq bildirdi ki, Gürcüstana yola düşür, çünki hazırda ölkənin həyatında dönüş anı yaşanır, keçmişlə Avropa arasında seçim etməlidir. Bizə dedi ki, mütləq getməlidir, çünki çox vacib ümumxalq səsverməsi keçirilir və o, Gürcüstanda olmalıdır", - deyə Barabaş Gürcüstanın "Mtavari arxi" telekanalına müsahibəsində qeyd edib.
Onu da qeyd edək ki, Batumi limanından Sputnik Gürcüstan-a dənizdə fırtınaya rəğmən, Ukrayna və Rumıniyadan iki yük gəmisinin daxil olduğunu bildiriblər. Ancaq Ukrayna gəmisinin göyərtəsində Saakaşvilinin olub-olmadığı məlum deyil.
Rusiya Prezidentinin mətbuat katibi Dmitri Peskov da Gürcüstanın keçmiş Prezidenti Mixeil Saakaşvilinin ölkəsinə qayıtması ilə bağlı yayılan məlumatlara münasibət bildirib. “Bu, Kreml üçün maraqlı mövzu deyil. Amma o, harada olursa, orada “sirk” var”, - D.Peskov deyib.
Gürcüstanın Batumi şəhərinə Daxili İşlər Nazirliyinin xüsusi təyinatlı maşın karvanı yola düşüb. Bununla bağlı sosial şəbəkələrdə videokadrlar paylaşılıb. Bu, sabiq dövlət başçısı Mixeil Saakaşvilinin Batumidə olması ilə əlaqələndirilib. Xüsusi təyinatlıların onu həbs edəcəyi bildirilib.
“İmedi” telekanalı məlumat yayaraq Saakaşvilinin Ukraynada olduğunu bildirib. Qeyd edilir ki, Bildirilib ki, o, Ukraynaya Amsterdamdan sentyabrın 24-də yollanıb və ölkəni tərk etməyib. Keçmiş prezidentin son 4 gündə Truskavets kurortunda olduğu vurğulanıb.
Bunun ardınca Gürcüstanın Daxili İşlər Nazirliyi yeni məlumat yayaraq bildirib ki, sabiq prezident Mixeil Saakaşvili Gürcüstan sərhədini keçməyib.
Qeyd olunub ki, Ukrayna tərəfi ilə dəqiqləşdirilib ki, keçmiş dövlət başçısı ölkəni tərk etməyib.
“Mixeil Saakaşvili axtarışdadır. O, Gürcüstan sərhədini keçən kimi həbs olunacaq”, - brifinqdə deyilib.
Günün sonunda Baş naziri İrakli Qaribaşvili xüsusi birifinqdə Saakaşvilinin saxlandığını açıqlayıb.
Onun sözlərinə görə, Gürcüstanın hüquq-mühafizə orqanları sabiq prezidentin hərəkəti barədə öncədən məlumatlı olub və bu proses tam nəzarət altında saxlanılıb.
İ.Qaribaşvili qeyd edib ki, M.Saakaşvili penitensiar müəssisəyə yerləşdirilib.
Baki-xeber.com
