Vüqar Tofiqli: "Kiçik bələdiyyələrin birləşdirilməsi ilə vətəndaş məmnunluğunu təmin edə biləcək səviyyəyə çatılacaq"
Bələdiyyə qanunla müəyyən edilmiş ərazi hüdudları daxilində yerli özünüidarəetmə formasıdır. Bələdiyyənin öz mülkiyyəti və yerli büdcəsi olur. Məlumat üçün bildirək ki, Azərbaycan Respublikasında bələdiyyələr 1999-cu ildə yaradılıb.
Azərbaycanda bələdiyyələrlə bağlı yeni proses başlayıb. Prezident İlham Əliyev "Bələdiyyələrin statusu haqqında" və "Bələdiyyələrin birgə fəaliyyəti, birləşməsi, ayrılması və ləğv edilməsi haqqında" qanunlara dəyişiklikləri təsdiqləyib. Dəyişikliyə əsasən, əhali sayı 3 mindən az olan kəndlərin bələdiyyəsi birləşdiriləcək və böyük bələdiyyələr yaradılacaq.
Beləliklə, əhali sayı 3 mindən az olan kəndlərin bələdiyyələri birləşəcək. Bununla da bələdiyyə sahəsində islahatlara start veriləcək. Kiçik bələdiyyələrin birləşdirilməsi ilə böyük bələdiyyələr yaranacaq. Qeyd edək ki, əksər inkişaf etmiş ölkələrdə xırda bələdiyyələrlə birləşərək böyük bələdiyyələr yaranıb. Bu bələdiyyələrdə öz sahələrinə, ərazilərinə yüksək xidmət göstərir.
Prezident İ.Əliyevin məlum sərəncamı ilə böyük bələdiyyələrin yaradılması, kiçik bələdiyyələrin mümkün qədər sıradan çıxması kimi ilə yeni mərhələyə start veriləcək.
"Bu fərman Azərbaycan bələdiyyələrinin üzləşdiyi problemin həlli istiqamətində atılacaq addımlar biridir"
Mövzu ilə bağlı fikir bildirən "Bələdiyyələrin fəaliyyətinin təbliği" İctimai Birliyin sədri Vüqar Tofiqli "Bakı-Xəbər"ə açıqlamasında bunları dedi: "Bələdiyyələrin birləşdirilməsi bu sahədə yaşanan problemlərin həll olunmasına təsir edəcək. Prezident İlham Əliyevin imzaladığı məlum fərman bələdiyyələrin inkişafında mütərəqqi rol oynayacaq. Bu fərman Azərbaycan bələdiyyələrinin üzləşdiyi problemin həlli istiqamətində atılacaq addımlardan biridir".
V.Tofiqlinin sözlərinə görə, Azərbaycan bələdiyyələri maliyyə resurslarının toplanması, bələdiyyə-icra münasibətlərinin tənzimlənməsi sahəsində problem yaşayırdı. Həmçinin, qanunvericilikdə də boşluqlar var idi: "Məlumdur ki, bu il seçki ilidir. Seçki ilində belə bir fərmanın imzalanması təqdirəlayiqdir. "Bələdiyyələrin statusu haqqında" və "Bələdiyyələrin birgə fəaliyyəti, birləşməsi, ayrılması və ləğv edilməsi haqqında" qanunlara edilən dəyişikliklər bu sahədə yaşanan problem və çətinliklərin aradan qaldırılmasına səbəb olacaq".
Həmsöhbətimiz hesab edir ki, kiçik bələdiyyələrin birləşdirilməsi ilə vətəndaş məmnunluğunu təmin edə biləcək səviyyəyə çatılacaq: "Azərbaycan bələdiyyəsinin 25 illik fəaliyyəti dövründə müəyyən işlər görülüb. Azərbaycan bələdiyyələri 25 illik inkişaf dövründə bir sıra çətinlik və problemlərlə üz-üzə qalsalar da, son bir neçə ildə müvafiq orqanlar tərəfindən atılan addımlar sayəsində müəyyən mənada inkişafa nail olublar. Azərbaycan bələdiyyəsi zamanla lazımi səviyyəyə çatacaq".
Günel CƏLİLOVA
