Son vaxtlar bütün dünya üzrə “ağ ölüm” kimi tarixə düşən narkomaniyaya meyllilik bir qədər də artıb. İndi artıq 12-13 yaşlı uşaqların arasında bu dəhşətli bəlaya mübtəla olanlar var. Təəssüf ki, respublikamızda da bu hallar görünür. Odur ki, Astara rayonunda narkomaniyaya qarşı müxtəlif səpkili tədbirlər ara vermir.
Növbəti belə maarifləndirici seminar rayonun Pensər kənd Folklor Evində baş tutdu. “Narkomaniyaya yox deyək” və “Erkən nikahlar və onların fəsadları” adlanan tədbirin təşkilatçıları isə Astara Rayon İcra Hakimiyyət, Polis Şöbəsi, Gənclər və İdman İdarəsi, Astara rayon Təhsil Sektoru, Pensər kənd İƏD nümayəndəliyi və Pensər kənd Folklor Evi idilər.
Pensər kənd 1 və 2 saylı tam orta məktəblərinin yuxarı sinif şagirdlərin, müəllim heyətinin, valideynlərin iştirak etdiyi tədbiri açan Polis Şöbəsini Xidmət üzrə rəis müavini, polis polkovnik-leytenantı Amin Seyfullayev dedi: - Əsrin bəlası olan, sərhəd tanımayan narkomaniyaya qarşı mübarizə aparmaq məqsədilə belə tədbirlərin həyata keçirilməsi mühüm əhəmiyyət daşıyır. Bugünkü tədbirin təşkilatçılarına da minnətdarlığımi bildirirəm. İndi hər kəs gənc nəslin sağlam böyüməsinə, valideynlərinin etimadının qazanmasına , Vətənə layiq övlad kimi yetişməsinə çalışmalıdır. Acınacaqlı haldır ki, narkomaniyaya meyl edən gənclərə hələ də rast gəlinir. Məhz bu səbəbdən təhsil müəssisələrində, ayrı-ayrı kollektivlərdə izahat işləri müntəzəm aparılmalı, hər bir şagird təhsilə və idmana diqqətlə yanaşmalı, vətənpərvər olmalıdır.
Daha sonra digər çıxışçılar - Polis Şöbəsinin baş inspektoru, polis mayoru Valeh Məmmədov, Rayon İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Fəhmin Qurbanov, Gənclər və İdman İdarəsinin rəisi Rufan Şirinov, Polis Şöbəsinin Yetkinlik yaşına çatmayanlarla profilaktik işin təşkili qrupunun baş inspektoru, polis leytenantı İxtiyar Arizzadə, Rayon İcra Hakimiyyəti başçısının Pensər kənd İƏD üzrə nümayəndəsi Zeynulla Şükürov, Pensər kənd Folklor Evinin direktoru Günel Məlikova tədbirin təşkilində məqsədin Azərbaycan Respublikası Prezidentinin 09 avqust 2005-ci il tarixli fərmanı ilə təsdiq edilmiş “Narkotik vasitələrin, psixotrop maddələrin və onların prekusorlarının qanunsuz dövriyyəsi haqqında” Azərbaycan Respublikası Qanunun, Azərbaycan Respublikası Prezidentinin 22 iyul 2019-cü il tarixli fərmanı ilə təsdiq edilmiş “Narkotik vasitələrin, psixotrop maddələrin və onların prekusorlarının qanunsuz dövriyyəsi və narkomanlığın yayılması ilə mübarizə üzrə Proqramı(2019-2024-ci illər)”nın, 2015-2025-ci illərdə Azərbaycan gənclərinin İnkişaf Strategiyası” nın müvafiq maddələrinin yerinə yetirilməsi, sağlam həyat tərzinin təbliği və tərənnümü olduğunu bildirdilər, keçirilən maarifləndirmə tədbirlərə yüksək qiymət verdilər, narkomaniyanın yaratdığı problemlər göstərdilər, gəncləri dəyərli tövsiyələrə əməl etməyə, narkomaniyaya düçar olmuş insanları doğru yola çəkməyə, dayaq durmağa çağırdılar.
Tədbirdə iştirak edən müxtəlif yaş qruplardan olan valideynlərə, müəllimlərə, gənclərə və məktəblilərə erkən, həmçinin qohumlar arasında nikah və məişət zorakılığının cəmiyyətimiz üçün yaratdığı təhlükə barədə, yetkinlik yaşına çatmayanların hüquqları ilə bağlı müvafiq qanunlar haqqında ətraflı danışıldı. Qeyd olunan problemlərə həssaslıqla yanaşılmasının vacibliyi vurğulandı, eyni zamanda tədbir iştirakçılarının fikir və təklifləri dinlənildi. Sonra narkotikin yaratdığı fəsadlar, dağıdıcı təsirlər barədə video-çarx nümayiş olundu. Həmçinin yekunda hər iki mövzu ətrafında şagirdləri, gənc müəllimləri düşündürən suallar nümayəndələr tərəfindən ətraflı şəkildə cavabını tapdı.
Zəfər ORUCOĞLU Azərbaycan Jurnalistlər Birliyinin üzvü
