Bakıda "Medera” Hospitalında plastik əməliyyat etdirən qadın vəfat edib. Hospitalın plastik cərrahı Günel Bayramlı elə həmin klinikada, "resepşn”da çalışan Aygün adlı əməkdaşını əməliyyat edib.
Məlum olub ki, Aygün Günel Bayramlıya bədən şəkilləndirmə əməliyyatı etdirib. Əməliyyatdan sonra xanım özünü narahat hiss etdiyini bildirsə də, həkim buna əhəmiyyət verməyib və onu evə buraxıb. Əməliyyat olunan Aygünün iki gün sonra evində halı daha da pisləşib və o, tromplaşmadan dünyasını dəyişib.
“Medera” Hospitalının icraçı direktoru Lalə Babayeva da ölüm faktını təsdiq edib. Hospitaldan bildirilib ki, Günel Bayramlı hazırda işinə davam edir.
Qeyd edək ki, vəfat edən qadın Göyçayda dəfn edilib. O, ailəli olub, bir qız övladı var.
Son vaxtlar ölkədə plastik əməliyyat edənlərin sayı sürətlə artır. Bəlkə də dünyada rekord vururuq. Bu sahədə ölənlərin sayına görə vəziyyət “estetik terror” səviyyəsinə çatıb. Əslən iranlı Sirus Qoçxani adlı bir cərrah var. Əlində indiyə kimi 4-5 tanınmış adam ölüb. Heç bir məsuliyyətə cəlb edilmir. Əhali bu həkimlərin toruna televiziyalardakı reklama görə düşür. Hamısı sosial verilişlərdə baş sponsor olur və özləri də orada şəxsən iştirak edirlər.
Bu sahədə nizam yaratmaq üçün hansı addımlar atılmalıdır?
İxtisasca həkim olan ekspert İlqar Hüseynli “Bakı-Xəbər”ə bildirdi ki, bu istiqamətdə və ümumiyyətlə səhiyyə sistemində çox ciddi problem var: “İkili idarəetmə strukturu yaradıldı. Hazırda tibb müəssisələrinin iki rəhbəri olur. Biri TƏBİB-i, digəri isə Səhiyyə Nazirliyini təmsil edir. Təəssüflər olsun ki, bu iki strukturdan heç biri üzərlərinə düşən funksiyanı yaxşı yerinə yetirə bilmir. Ən ciddi məsələ kadrların idarə olunması ilə bağlıdır. Əslində prosedur belə olmalıdır. 6 il təhsil aldıqdan sonra, bir il də hazırlıq keçirdi. İxtisasa görə, 4 illik rezidentura dönəmində dəqiqləşdirilir ki, bu şəxs hansı sahə üzrə həkim işləyəcək. Yalnız bundan sonra həmin həkimə səlahiyyət verilir ki, uyğun sahə üzrə həkim işləsin. Plastik cərrahiyyə və renoplastikaya yönəlik tələbatlar artdığı üçün kim istədi bu sahə üzrə fəaliyyət göstərir. Onun anatomiyasını və mexanizmlərini mükəmməl bilmək lazımdır. Əməliyyatdan əvvəl, hər bir fərdin üzərində müşahidələr aparılmalıdır. Bu əməliyyatlara çox səthi yanaşılır. Məyusedici bir tələbat var. Artıq kişilər də özlərini əməliyyat etdirməyə başlayıb. Nəticədə belə fəsadlar olur. Bunun qarşısı alınmalıdır. Sertifikasiyası, ixtisasa sahiblik dəqiq araşdırılmalıdır. Səhiyyədə bunu tənzimləyən qanunvericilik aktları var. Amma təəssüf ki, buna əməl edilmir. Özünü reklam etməyi bacaranlar bu sahədə at oynadır”.
Məhəmmədəli QƏRİBLİ
