Günəhir camaatının qaz problemi “daşa dirənib”...
Lənkəran rayonunda da əhalinin həyatında böyük önəm daşıyan mavi qazla təmin olunmayan kəndlər çoxdur. Bu rahatlığın, rifahın adını eşidən, lakin uzun illər onun həsrətini çəkən belə kəndlərdən biri də Günəhirdir.
Bu vacib məsələnin həllindən ötrü əhaliyə bol-bol söz verilir, əməli iş gəldikdə isə, o görülmür. Necə deyərlər, aidiyyəti orqanların yalanı üzündən kəndə qaz xəttinin çəkilişi ildən-ilə yubadılır. İndi qaz bir yana qalsın, kənd sakinləri evlərini isitmək üçün odun tapmaqda böyük çətinliklə üzləşməli olurlar. Hətta vaxti ilə yanacaq odun tədarük etdikləri meşələrə onların girməsinə qadağa qoyulub. Eləcə, Günəhir rayonun dağlıq ərazisi olduğuna görə burada yanacağa ehtiyac daha böyükdür. Yeri gəlmişkən, onu da qeyd edək ki, Lənkəranın Daştatük, Bəliton, Türkəncil, Horavenc kəndlərinin camaatı da uzun illərdir analoji vəziyyəti yaşayırlar.
Günəhirlilər deyirlər ki, Prezidentimiz İlham Əliyev ölkənin tərəqqisi, vətəndaşların rifahı naminə gecə-gündüz çalışır. Amma bəzi yerli məmurlar özündən başqa heç kimi düşünmür, dövlətin ayırdığı vəsaitlə xalqın problemlərini yerinə yetirmək əvəzinə əyri işlərlə məşğul olurlar. Nəticədə onların bəd əməllərindən adamlar həllini gözləyən sosial məsəllər ucbatından ağır həyat yaşayırlar. Günəhirdə qazan olmaması məhz bundan irəli gəlir. İllərlə yanacaq sırasında çətinlik çəksək də, bu məmurları zərrə qədər belə narahat etmir.
Bəli, günəhirlilər öz dövlətinə, yurduna bağlı, halal zəhmətlə gün-güzəran keçirən adamlardır. Dinamik inkişaf etdiyi bir ölkənin vətəndaşı olmaqla, indi evlərini isitməkdən ötrü kəndə qaz xəttinin çəkilişini istəyirlər. Və xalqını sevən, həmişə onun rahatlığını öndə saxlayan ölkə başçısına güvənməklə mavi qaz problemə tezliklə əncam çəkiləcəyinə tam inanırlar.
Zəfər ORUCOĞLU
Azərbaycan Jurnalistlər Birliyinin üzvü
