Elxan Orucov: “Su anbarları azı ildə bir dəfə dezinfeksiya olunmalı və yuyulmalıdır”
“MTK-ların anbarı mütləq ildə azı bir dəfə yuyulmalıdır”. Bunu “Azərsu” ASC-nin mətbuat xidmətinin rəhbəri Anar Cəbrayıllı media nümayəndələrinə açıqlamasında deyib.
Onun sözlərinə görə, əks halda yeni tikili binaların anbarında suyun keyfiyyətinin pisləşmə halları müşahidə oluna bilir.
A.Cəbrayıllı son vaxtlar suyun keyfiyyəti ilə bağlı sosial şəbəkələrdə bəzi həqiqətə uyğun olmayan məlumatların yayıldığına diqqət çəkib: “Azərsu”nun əhaliyə verdiyi su standartlara tam uyğundur. Sosial şəbəkədə bir neçə paylaşımı sona qədər araşdırmışıq və məlum olub ki, suyun keyfiyyətinin aşağı olması halı yeni tikilili binalarda qeydə alınıb. Araşdırmalar zamanı məlum olub ki, bu MTK-ların anbarları illərdir yuyulmur. Ümumiyyətlə, bu gün Bakıda suyun keyfiyyətinə mənfi təsir göstərən iki amil var. Bunlardan biri MTK-ların yuyulmayan anbarı, digəri isə vətəndaşların, xüsusilə ətraf ərazilərdən primitiv qaydada, kustar üsulla çəkdiyi su xətləridir. Çünki bu su xətləri yerin üstü ilə çəkilir və onların çəkilməsində müxtəlif təyinatlı plastik, metal borulardan istifadə olunur. Hətta Sulutəpə ərazisində neft sənayesində işlənmiş borularla da su xəttinin çəkilməsi halına rast gəlinib. Bunlar suyun keyfiyyəti ilə bağlı müəyyən risqlər yaradır. “Azərsu” olaraq MTK rəhbərlərinə, binaların komendantlarına, sakinlərinə və MMC-lərə səslənirik ki, standartlara əsasən su anbarları mütləq ildə ən azı bir dəfə yuyulmalıdır”.
Maraqlıdır, yaşayış binalarının su anbarları yuyulmazsa sakinləri hansı təhlükə gözləyir? Həmçinin, illərdir su anbarlarını yumayan MTK rəhbərlərini hansı cəza gözləyir?
- “Çox təəssüflər olsun ki, binalarda idarəetmə düzgün formalaşmadığı üçün bu məsələ diqqətdən kənarda qalıb və insanlar təmiz olmayan su qəbul edir”
Binaların idarəedilməsi məsələləri üzrə ekspert Elxan Orucov “Bakı-Xəbər”ə açıqlamasında qeyd etdi ki, çoxmənzilli binalarda məlum mövzu ilə bağlı acınacaqlı vəziyyət hökm sürür: “Nəzərə almaq lazımdır ki, binada su anbarları strateji obyekt sayılır. Bu sahəyə də dövlət tərəfindən nəzarət həyata keçirilir. Bu proses "Azərsu" ASC-nin nəzarəti ilə həyata keçirilir. Su anbarları azı ildə bir dəfə dezinfeksiya olunmalı və yuyulmalıdır. Ümumiyyətlə, suyu təmiz saxlamaq üçün anbarlar ildə azı 2 dəfə yuyulmalıdır. Əksər hallarda diqqət yetirilməyən bu məsələ sakinlərin sağlamlığı üçün böyük əhəmiyyət daşıyır. Çox təəssüflər olsun ki, binalarda idarəetmə düzgün formalaşmadığı üçün bu məsələ diqqətdən kənarda qalıb və insanlar təmiz olmayan su qəbul edir".
Həmsöhbətimiz xüsusi olaraq qeyd etdi ki, yeni tikililərdə su anbarlarının təmizləməsi birbaşa sağlamlıqla bağlı məsələdir. Buna riayət etməyən MTK-lar mütləq şəkildə cərimə olunmalıdır. Cərimənin də miqdarı artırılmalıdır.
Günel CƏLİLOVA
.jpg)