Naxçıvan Dövlət Universiteti (1001+) Böyük Britaniyanın “Times Higher Education Impact Rankings 2023” reytinq cədvəlində dünyanın ən yaxşı universitetləri arasında yer alıb.
Bu barədə TNS-ə universitetdən məlumat verilib.
Bildirilib ki, Impact Rankings Birləşmiş Millətlər Təşkilatının Davamlı İnkişaf Məqsədlərinə uyğun olaraq universitetlərin qiymətləndirildiyi yeganə qlobal effektivlik cədvəli hesab olunur. Reytinq dörd geniş sahə üzrə hərtərəfli və balanslaşdırılmış müqayisəni təmin etmək üçün tədqiqat, idarəetmə, təbliğat və tədris göstəricilərindən istifadə edir. Naxçıvan Dövlət Universitetinin təqdim edilən dörd nömrəli “Keyfiyyətli təhsil” dayanıqlı inkişaf məqsədi üzrə reytinq cədvəlində yeri 601-800, dayanıqlı inkişaf məqsədlərinin 7-ci məqsədi “Sərfəli və təmiz enerji” üzrə 601-800, 17-ci dayanıqlı inkişaf məqsədi olan “Məqsədlər üçün tərəfdaşlıq” üzrə 1001+ və son olaraq 10 nömrəli dayanıqlı inkişaf məqsədi “Bərabərsizliyin azaldılması” üzrə reytinq nəticəsi isə 401-600 olaraq göstərilib.
Qeyd edək ki, bu reytinq cədvəlində Azərbaycanın 7 universiteti yer alıb. Reytinqdə ölkəmizi Xəzər Universiteti (601-800), Qərbi Kaspi Universiteti (601-800), Azərbaycan İnşaat və Memarlıq Universiteti (1001+), Azərbaycan Dövlət İqtisad Universiteti (1001+), Bakı Mühəndislik Universiteti (1001+), Bakı Dövlət Universiteti (1001+), Naxçıvan Dövlət Universiteti (1001+) təmsil edirlər.
2023 Impact Rankings beşinci nəşrdir və ümumi reytinqə 112 ölkədən/regiondan 1591 universitet daxildir. Ümumi reytinqə ikinci ildir ki, Avstraliyanın Qərbi Sidney Universiteti başçılıq edir. İkinci yeri Böyük Britaniyanın Mançester Universiteti, üçüncü yeri isə Kanadada yerləşən Kraliça Universiteti tutur.
İnkişaf etməkdə olan iqtisadiyyatın ən yaxşı ali məktəbi dördüncü yerdə olan Universiti Sains Malaysia-dır. Böyük Britaniya 26 qurumla ilk 100-lükdə ən çox təmsil olunan ölkədir, Avstraliya 16, Kanada 15 universitetlə təmsilçiliyə malikdir.
