Avtomobil yollarında yaranan tıxaclar nəqliyyat sektorunun ən ciddi problemlərindən biridir. Son illər yolların genişləndirilməsi, alternativ yolların salınması, yeraltı və yerüstü keçidlərin, eləcə də körpü və yolötürücülərinin inşa edilməsinə baxmayaraq, hələ də paytaxt yollarında tez-tez tıxaclara rast gəlinir.
Tıxac və ona səbəb olan amillərə gəldikdə isə, onlar müxtəlifdir. Səbəblərdən biri əhalinin sayının artması və sıx məskunlaşma prosesinin sürətlənməsidir. Sıx məskunlaşma yolların ötürücülük qabiliyyətini azaldır. Nəticədə yollarda hərəkət sürəti aşağı düşür, tıxaclar yaranır. Digər faktor isə paytaxt küçələrindəki taksilər və onların fəaliyyət prinsipləridir. Danılmaz faktdır ki, bu gün paytaxt Bakı küçələrində hərəkət edən taksilərin sayı həddindən artıq çoxdur. Açıqlanan statistik məlumatlara əsasən, Bakı ərazisində olan taksilərin sayı İstanbulla müqayisədə qat-qat çoxdur. Ərazi baxımından Bakı İstanbuldan xeyli kiçik olsa da, taksilərin sayı çoxluq təşkil edir. Ancaq həmin taksilərlə bağlı heç də xoş fikir, xoş təəssürat yoxdur. Aparılan araşdırmalar zamanı məlum olub ki, Bakı ərazisində müşahidə olunan tıxacın yaranma səbəblərindən biri də taksilərdir.
Ekspertlər də dəfələrlə qeyd edib ki, taksilər də tıxac yaradan amildir. Taksilərin avtobus dayanacaqlarında, avtobusların isə yolun ikinci və üçüncü zolaqlarında dayanması pik saatlarında tıxacların yaranmasına səbəb olur. Taksi fəaliyyəti ilə məşğul olan şəxslər dayanacağa yaxın, avtobusların saxlama yerlərində avtomobili saxlayırlar. Nəticədə avtobus sürücüləri nəqliyyat vasitələrini yolun ikinci zolağında saxlamağa məcbur olurlar. Bu da axşam saatlarında ciddi tıxacın yaranmasına səbəb olur. Beləliklə, işdən yorğun gələn sərnişinlər yolda əlavə vaxt itirir. Demək olar ki, yol qovşaqlarında hər gün oxşar problem hökm sürür.
“Açıqlanan statistik rəqəmlər də təsdiq edir ki, yol nəqliyyat hadisələrinin qeydə alınmasında yolu tanımayan taksilərin də rolu az deyil”
Sosioloq Aytəkin Kamranqızı “Bakı-Xəbər”ə açıqlamasına qeyd etdi ki, taksilərin sayının yüksələn templə artımı narahatlıq doğurur. İnsanların taksiyə kütləvi tələbatının, eləcə də taksini artıq bir peşəyə çevirənlərin problemi ciddi araşdırılmalıdır: “İnsanlar rayonlarda əkin-biçin ilə məşğul olmaq istəmir. Rayonlarda yaşayanların bir qismi torpağını və ya heyvanını satıb gəlib Bakıda taksi fəaiyyəti ilə məşğul olur. Bu səbəbdən də Bakıda taksi sahəsində bir xaos hökm sürür. Müştəri məmnuniyyəti yoxdur. Taksi sürənlər də, taksidən istifadə edənlər də narazıdır. Bunun səbəbi isə şirkətlərin ancaq qazanc haqqında düşünməsidir”.
Həmsöhbətimiz onu da əlavə etdi ki, taksilərin pərakəndə fəaliyyəti nəqliyyat sistemində dözülməz vəziyyət yaradıb: “Qeyd etdiyim kimi, bu gün taksilərdə çalışanların əksəriyyəti rayondan işləmək üçün paytaxta gələnlərdir. Həmin vətəndaşlar taksi şirkətləri ilə onlayn qaydada razılaşdıqdan sonra işə başlayır. Problem də bundan sonra başlayır. Sürücü yolu tanımır, naviqatorun ümidinə qalır. Dəfələrlə olub ki, naviqator ya işləməyib, ya da yolu səhv tərif edib. Belə olan halda sərnişin gedəcəyi ünvana gec çatır, sinirlər gərilir. Həmçinin, açıqlanan statistik rəqəmlər də təsdiq edir ki, yol nəqliyyat hadisələrinin qeydə alınmasında yolu tanımayan taksilərin də rolu az deyil. Bu səbəbdən də qeyd edilən sahəyə nəzarət gücləndirilməlidir”.
Günel CƏLİLOVA
