Məlum olduğu kimi, Azərbaycana işlənmiş avtomobil gətirənlər utilizasiya haqqı ödəyəcək. Bu, "Gömrük Məcəlləsində dəyişiklik edilməsi haqqında" qanun layihəsində öz əksini tapıb.
Məcəlləyə əlavə edilməsi təklif olunan yeni maddəyə əsasən, gömrük ərazisinə gətirilən və istehsal-buraxılış vaxtından 4 il keçən minik avtomobillərinin gömrük rəsmiləşdirilməsi zamanı “Tullantılar haqqında” qanuna uyğun olaraq müvafiq icra hakimiyyəti orqanının müəyyən etdiyi məbləğdə utilizasiya haqqı alınacaq.
“Təmiz Şəhər” ASC-nin Hüquq şöbəsinin müdir müavini Mirzə Laçınov mediaya açıqlamasında işlənmiş avtomobillər üçün utilizasiya haqlarının ilkin məbləğlərini açıqlayıb. O qeyd edib ki, idxal ediləcək köhnə avtomobillər üçün 400-700 manat utilizasiya haqqı nəzərdə tutulur: “1-3 il istehsal müddəti olan avtomobillər üçün ümumiyyətlə utilizasiya haqqı nəzərdə tutulmayıb. 4 ildən 7 ilə qədər istehsal müddəti olan avtomobillər üçün 400 manat, 7 ildən yuxarı avtomobillər üçün isə 700 manat utilizasiya haqqı alınacaq. Lakin bu rəqəmlər hələlik dəqiq deyil, bu istiqamətdə müzakirələr davam etdirilir və dəyişə bilər”.
Onu da qeyd edək ki, bu qərar ictimaiyyət arasında birmənalı qarşılanmır.
- Tahir Mirkişili: “Hər bir dövlətin utilizasiyanı həyata keçirmək üçün iqtisadi gücü yoxdur”
Millət vəkili Tahir Mirkişili bildirdi ki,iqtisadiyyat dayanıqlı və güclü olmasa, dövlətin utilizasiyanı həyata keçirmək imkanı yox dərəcəsindədir. Hər bir dövlətin utilizasiyanı həyata keçirmək üçün iqtisadi gücü yoxdur: “Ölkəmiz bu işlə bağlı xüsusi sənəd qəbul edirsə, demək ki, iqtisadi gücü və potensialı var. Bu, ciddi bir mərhələnin başlanğıcıdır. Ekoloji cəhətdən təmiz avtomobillərin idxal edilməsi bütün vergi və rüsumlardan azaddır. Son zamanlar Bakıda daha çox elektrik avtomobillərini görürük. Hazırda ölkəmizdə avtomobillərin yığılması üçün iki zavod var. Üçüncü zavodun açılması planlaşdırılır. Atılan addımlar qanun layihəsinin daha səmərəli yerinə yetirilməsinə imkan yaradacaq".
- Elməddin Muradlı: “Cərimə meydançalarında 20 ilə yaxın atılmış maşınlar var və onların yığışdırılması mütləqdir”
Nəqliyyat eksperti Elməddin Muradlı bildirdi ki, illərdir cərimə meydançalarında, məhəllələrdə, küçələrdə tərk edilmiş avtomobillər var: “Qanunda belə halların müddəası müəyənləşdirilib və həmin müddətə uyğun olaraq hesablanma aparılmalıdır. Məlumdur ki, cərimə meydançalarında 20 ilə yaxın atılmış maşınlar var və onların yığışdırılması mütləqdir. Bəzi maşınlar var içərisində toyuq-cücə saxlanılır, lakin Mərkəzi İnformasiya sistemində həmin maşın istismar olunan avtomobil kimi qeyd olunub. Vətəndaşlar özləri başa düşməlidirlər ki, belə hallar yolverilməzdir. Utilizasiya prossesi onların xeyrinədir, istismara yararsız avtomobilləri vətəndaş könüllü şəkildə gətirib təhvil verməlidir”.
Leyla QARAXANLI
.jpg)