Vətəninə, xalqına ürəkdən bağlı olan, öz xeyirxah əməlləri hesabına sonsuz hörmət və ehtiram qazanan Lerik rayonu, Bradi kəndinin dəyərli oğlu Adil Hüseynov ömrünün 75-ci ilini yaşayır. Qəlb dünyası sevdalı olduğuna görə həyatı dərk edən gündən illərini yaxşılıq gözündə ucala-ucala bu kamillik zirvəsinə gəlib çatmışdır.
Necə deyərlər, etibardan, düz ilqardan ürəklərə yol aldıqca elin məhəbbət soraqlı, sədaqət ünvanlı günlərin sayı da on yox, yüz olmuşdur. Elin ağsaqqal oğlu yenə də adəti üzrə eşqində, gözündə bir sehrli nur ömrünü-gününü insanlara verə-verə sadə, yaxşı, doğru həyat yolunu davam edir. Gördükləri, etdikləri isə yalnız məskən saldığı yurd yerinə sevinc gətirir. Xeyirxahlığı, qayğıkeşliyi çoxları xoşbəxtliyə qovuşdurur. Beləcə insanların səadəti naminə təmiz, ülvi hisslərlə ömür sürməsi həm də Adil müəllimin mədəni, mənəvi dünyasına yadda qalan naxışlar vurur. Bir şer parçasında deyildiyi kimidir bu dəyərli şəxsiyyət:
Neynim, yaratmaqdan doymayır ürək,
Mən xalqa, Vətənə vurğun yarandım.
Mənalı bir ömür yaşayam gərək,
Belədir əzəldən mənim də andım.
İlk gündən amalı xoş arzular üzərində qurulan bu halal çörəkli insan Tanrının ona bəxş etdiyi 75 ilinin əksər hissəsini yaratmaq, yaşatmaq eşqi ilə yola salıbdır. Bu ömrün davamı bundan da əzəmətli, mehr - məhəbbətli olar. Yenə Adil müəllim hamının gözündə gözəl dünya yaratmağa qadir uca insan olmaqla özünə ürəklərdə yer edəcəkdir. Ən əsası Adil müəllimin işığına can atıb xoş günlər, eləcə firavan həyat naminə bəhər götürənlərin sayı bilinməz. Mayası paklıqdan yoğurulmuş, hər cür şərdən, xətadan uzaq bir bəşər övladdan kimlər görüb-götürməz ki... Və kamil insanların hesabına bir daha həyat, yaşamaq gözəlləşər.
Öz xoşbəxtliyi insanlara gərək olmaqda görən Adil Hüseynova “Müəllim” sözü çox yaraşır. O, illərinin əksəriyyətini rayonun müxtəlif məktəblərində gənc nəslin təlim-tərbiyəsinə bağlayıb. Əlinə jurnal götürdüyü gündən müqəddəs saydığı müəllim sənətini bitib- tükənməz insan mənəviyyatının sehrli güzgüsü bilir. İllərin səfində ulduz-ulduz alışıb neçə-neçə şagirdin həyat yoluna gur işıq saçıb, gözlərinə nur veribdir. Onlara aşıladığı da düzlük, mərdlik, Vətənə bağlılıq, insana sevgi olubdur. Bir sözlə cəmiyyət üçün ləyaqətli vətəndaşlar yetişdirib. İndinin özündə də hamıya örnək həyat yolu Adil müəllimdən dərs alanları kamilliyə çağırır, insanı yaşadan ilham mənbəyinə, xeyirxahlığa sövq edir...
Adil müəllimi el içində şöhrət zirvəsinə qaldıran onun böyük ürəyi, parlaq idrakı, sağlam əxlaqı, insanlara çox səmimi münasibətidir. Uşaqlarını da öz kimi böyüdüb. Belə ki, ömür-gün yoldaşı Şamama xanımla altı övlad dünyaya gətiriblər. Ailə qarşılıqlı sevgi, hörmət əsasında qurulduğu üçün övladları təmiz, halal, namuslu yaşaya bilir, bütün arzuların zirvəsində Vətənin, xalqın xoşbəxtliyi dayanır. Beləcə, ürəklərə yol alır, saflıq dünyasına dönərək özünə yurd salırlar.
Adil müəllimin adı təkcə yaşadığı diyarda deyil, Lerik rayonunda tanıyanları tərəfindən insanlıq, nəciblik meyarı tək səslənir. Ağıllı məsləhət və faydalı tövsiyələri elin ümid, dayaq yeridir. İşlə, əməllə cəmiyyətə fayda verir. Özü düz, təmiz olduğuna görə başqasını da belə görmək istəyir. İşıqlı arzuları insanı həmişə həyata, yaşamağa, qurub-yaratmağa ruhlandırır. Qəlbi ülvi, bəşəri sevgilərlə dolu olduğu üçün əlindən yalnız yaxşılıq gəlir. Onun kimi olmaq özü böyük xoşbəxtlikdir. Elə bütün bunlara görə dünyanın ən yaxşı adamıdır Adil müəllim. Yaxşılıq edir, özü də yaxşılıq gözündə ucala-ucala, insanlığa sevgi onu yüzə doğru aparır. Adil müəllimin qəlbindən keçənlər bu şer parçasında gözəl əks olunub:
Çatarsa qayğımız Günəşə, Aya,
Göydən də təmizlik alır hissimiz.
Təzədən gəlirik sanki dünyaya
Birinə yaxşılıq eləyəndə biz.
Zəfər ORUCOĞLU Azərbaycan Jurnalistlər Birliyinin üzvü
