Məlum olduğu kimi, IX siniflər üçün buraxılış imtahanı keçirilib. İmtahanın cavabları da artıq bəllidir. Buraxılış imtahanlarında, həmişə olduğu kimi, yüksək nəticə göstərən şagirdlərlə yanaşı, nəticəsi aşağı olan şagirdlər də olub.
Qaydalara əsasən, bir neçə fəndən illik "qeyri-kafi" qiymət alan, habelə dərs məşğələlərinə gəlmədiyi üçün biliyi qiymətləndirilməyən V, VIII və X sinif şagirdləri təkrar sinifdə saxlanılır. Yəni buraxılış sinif şagirdlərinin təkrar sinifdə saxlanılması mümkün deyil.
Ancaq sosial şəbəkədə bir çox valideyn məktəb direktorlarının onları məktəbə dəvət edərək imtahandan zəif nəticə göstərmiş övladlarını məktəbdən xaric etməyə çağırıb, peşə yönümlü məktəblərdə təhsillərini davam etdirmələrinin vacib olduğunu deyiblər. Direktorların məlum istəyi valideyn və şagirdlərin narazılığına səbəb olub.
Maraqlıdır, nəticəsi aşağı olan şagirdlərin tədrisi davam etdirməsinə maneə yaradıla bilərmi?
“Direktorlar zəif nəticə göstərən şagirdlərin məktəbin nüfuzunu aşağı saldığını əsas gətirərək bu addımı atırlar, ancaq onların bu hərəkəti qanunvericiliyə ziddir”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, direktorlar zəif nəticə göstərən şagirdlərin məktəbin nüfuzunu aşağı saldığını əsas gətirərək, bu addımı atırlar. Ancaq onların bu hərəkəti qanunvericiliyə ziddir: “Direktorlar ümumi baxış zamanı zəif nəticə göstərən şagirdlərin məktəbin ümumi reytinqini aşağı salacağını düşünərək bu addımı atırlar. Əvəzində isə kimdənsə pul alaraq yeni şagird qəbulu həyata keçirirlər. Əgər şagird 9-cu sinfə qədər təhsil alıbsa, onun 10-11-ci sinifdə də təhsil almaq hüququ var. Şagird könüllü, yaxud da hansısa səbəbdən təhsilini dayandırmırsa, direktorların onları məktəbdən uzaqlaşdırmağa haqqı yoxdur. Əgər şagird 9-cu sinfə qədər təhsil alıb və imtahanda müsbət nəticə əldə edə bilməyibsə, burada günahkar həm də direktorun özüdür. Deməli, onun direktorluğu dövründə təhsildə uğurlu nəticə əldə olunmayıb, yaxud müvafiq işlər düzgün həyata keçirilməyib”.
Ekspert xüsusi olaraq vurğuladı ki, şagirdlərin təhsil alma hüququ məhdudlaşdırılmamalıdır.
Günel CƏLİLOVA
